Read lumasaaba Luka 23 Bible Online

Luka 23 - lumasaaba bible

Luka 23

¹Baryo, babaandu boosi babaaba mu lubusano, benyukha bayila Yesu wa Pilato.

²Ibweene iyo barakikha khumuwabila nga baloma bari, “Umusaani yuno khwamunyoolele nga akosaasa babaandu be linaambo lyeefwe, nga abareesa khuuwanda kumusolo isi Kayisaali, naluundi nga elaanga khuuba niye Kristo Umuyiinga.”

³Kila Pilato waamureeba ari, “Iwe uli Umuyiinga we Bayudaaya?” Yesu wamwiilamo ari, “Shili nga iwe n'ulomele.”

⁴Aryo Pilato waloma basaayi bakhulu ni lituuli lye babaandu boosi ari, “Ise simbona ilomo iye kumusaango khu muundu yuno ta.”

⁵Ne nibo beloosela khutsuntsumilisa bari, “Niye asasamasa babaandu ni indeekela yeewe mu Yuda mwoosi. Anyoowela mu Galilaaya, ni aluno woolile ni neeno yoosi.”

⁶Ne Pilato nga wawuliile shino, wareeba ari, “Umuundu yuno umu Galilaaya?”

⁷Naye n'ashimanyakho ari Yesu ama mu shisiintsa shishiwuliwa ni Herode, wamwakaanisayo isi Herode, uwaba nga naye ali mu Yerusalemu mu bifukhu ibyo.

⁸Ne Herode n'abona Yesu, wekhoya naabi, lwekhuuba awulilatsakakho busa bilomo byeewe, ne nga khukhwaama khaale aba akana khu mubonakho, nga asuubila khubonakho nga akhola she kamakaanga shoosi.

⁹Herode wareeba Yesu bireebo bikali, ne Yesu walekha khumwiilamo ni lomo yoosi ta.

¹⁰Basaayi bakhulu ni baleekeli be kamakaambila ka Musa, bemikhawo nga bamutsuntsumilisa naabi.

¹¹Aryo Herode ni basilikhale beewe, bakhomyaasaka Yesu nga bamutyabila. Bamukwaarisa ingubo imelamela, lwanyuma bamukobosayo isi Pilato.

¹²Khukhwaama ni khu shifukhu sheenesho, Herode ni Pilato bekyela be busaale, ne nga abe mataayi baaba babiiyanila.

¹³Pilato walaanga atweela basaayi bakhulu, ni bawuli ni babaandu,

¹⁴waabaloma ari, “Inywe mundereere ano umuundu yuno nga muloma muri akoraanisaka babaandu. Ne bona ise namureebelesile mu moni tseenywe, ne nakhunyoolakho ilomo yoosi ikila mwamuwabila ta.

¹⁵Ikhaba ni Herode naye wakhunyoolakho ilomo yoosi isi mumufunisa ta, lwekhuuba wamukhukoboseele fwabeene nga ni mumubona. Umuundu yuno mbaawo sheesi akholile shishaakhila khumwiirisa ta.

¹⁶Ni nashiryo, ni ngane imale khumulatsakakho, kane imulekhuule.”

¹⁷Ne khu buli mayiiya ke Khuubirakho, abe Pilato ali ni khulekhuulakho umubowe mutweela esi babaandu bakanatsaka bari alekhuulibwe.

¹⁸Ne lituuli lye babaandu bayokesela angaaki bari, “Uyo n'umwiire, ne ifwe ukhulekhuulile Baraba.”

¹⁹(Ne Baraba uyo aba wabowebwa mu mapuusu lwe khureera shishitulungu shishaba mu shiriimba isho, nilwe bubwiiri.)

²⁰Ne Pilato wakanikha luundi isi bali nga akana khulekhuula Yesu.

²¹Ne nibo beloosela khuyokesela angaaki bari, “Mutsaangilile khu musalaba, mutsaangilile khu musalaba.”

²²Aryo Pilato waabakanikhayo luundi ifuunda iye khataru ari, “Ne lwashiina? Shiina shisheene sheesi akholile? Ise simbona ilomo yoosi khu niye ikila yamwiirisa ta. Aso ni kane imale khumulatsakakho, kane imulekhuule.”

²³Ne nibo beloosela khuyokesela angaaki lukali lweene bari, Yesu aakha atsaangililwe khu musalaba, ni khuuyokesa khwaabwe khwaabiramo.

²⁴Aryo kila Pilato akhalawo ari, sheesi bakana shibakholewele.

²⁵Aryo waabalekhuulila umuundu isi baakana, uwaba waabowebwa lwe shishitulungu ni bubwiiri. Ne waawayo Yesu khuumukhola nga ni bakana.

²⁶Ulwo basilikhale ni baaba nga bayila Yesu, bawaamba Simoni Umu Kurene, uwaba ama mu shaalo nga etsa mu shiriimba, bamutwikhisa kumusalaba khukusuta nga alondelela Yesu.

²⁷Lituuli lye babaandu bakali bamuloondakho, ni mu nibo mwabamo bakhasi babaaba balila luundi nga bamwantsuyila.

²⁸Ne Yesu weshebukha, waabaloma ari, “Bakhasi be Yerusalemu, mukhaandilila ise ta, ne ni mwililile mwabeene ni babaana beenywe.

²⁹Lwekhuuba bifukhu bilyoola lweesi babaandu baliloma bari, ‘Nga bali ni tsikhabi bakhasi bakuumba, ni bisoombo bibikhasaalatsakakho ta, ni kamabeele kakakhanunisatsakakho ta.’

³⁰Lwanyuma balilakikha khuloma tsinjiinji bari, ‘Ni mukhukwekho,’ ni tsingoongo bari, ‘Ni mukhubiimbilile.’

³¹Lwekhuuba babaandu ni bakhola shino khu kusaala kubisi, ne khu kusaala kukwoomu, shiliiba shiryeena?”

³²Aabawo basaani babaandi babili, bafuniaaki be kamakaambila, nabo bayilibwa khukhwiiribwila atweela ni Yesu.

³³Ne ni boola mu shifwo sheesi balaanga bari “Shihaanga,” baamutsaangilila abweene awo, atweela ni baafuniaaki be kamakaambila tsana, mutweela khu mukhono kwa Yesu kumulayi, n'ukuundi khu mukhono kumunyeletsi.

³⁴Yesu waaloma ari, “Paapa, n'ubeyakhile, lwekhuuba sibaamanyile byeesi bali khuukhola ta.” Baryo baakabanana bikwaaro byeewe nga babikhupilakho buukokha.

³⁵Babaandu bemikha balolelela, ni bawuli be Bayudaaya bamwoonela nga baloma bari, “Awonesatsaka babaandi, ari ne yiwonese umweene, noola niye ali Kristo, Umurobole wa Wele.”

³⁶Ni basilikhale nabo beetsa bamutsekhelela, beetsa is'ali bamuwa iviini indulutse, nga baloma bari,

³⁷“Iwe noola uli Umuyiinga we Bayudaaya, ni wiwonese wamweene.”

³⁸Ne angaaki khu musalaba kweewe abaawo burone bubuloma buri, “YUNO NIYE UMUYIINGA WE BAYUDAAYA.”

³⁹Mutweela khu beesi kumusaango kwafuura, abe uwatsaangililwa atweela ni Yesu warakikha khufwotsola Yesu nga aloma ari, “Iwe s'uli niye Kristo ta? Ni wiwonese wamweene, ni nafwe nafwe ukhuwonese.”

⁴⁰Ne ukuundi uyo wamwikiitsa, nga aloma ari, “Iwe ni khuurya, s'urya Wele ta? Bona ifwe khuli khu shitaambiso shitweela busa ni naye.

⁴¹Ne ifwe, iwe ni nase, kumusaango kwakhufuurire lweebyo byeesi khwakholile. Ne umusaani uyu, mbaawo shiibi shoosi sheesi akholile ta.”

⁴²Lwanyuma waloma Yesu ari, “Yesu, ushebulilatsaka lweesi uliitsila mu shiriifwa she buyiinga bwoowo.”

⁴³Yesu wamwiilamo ari, “Ilala, ikhuboolela ndi, shaleelo kane ube ni nase mu shifwo she sangaalo mwikulu.”

⁴⁴Ulwo tsisaawa tsaba nga tsisesaba tse mwihangilwe, shishiilima shakwawo khu shiibala shoosi, khukhwoolesa khu saawa nga syeenda tse angoloobe,

⁴⁵lwekhuuba inyaanga yakamisa khukhwaburukha. Ni ingubo iyatiimbibwa mu Lisaayilo Likhulu yonuukhamo khabili akari.

⁴⁶Yesu waalomela angaaki ni likono likali ari, “Paapa, mu mikhono kyoowo indamo bulamu bwase.” Aryo nga n'amala khuloma aryo, wikhisa kumwoyo kweewe wafwa.

⁴⁷Umukhulu we kamaye n'abona ibyo byoosi bibibeelewo, waabuyila Wele nga aloma ari, “Ilala umusaani yuno abeele umuundu umukwalaafu.”

⁴⁸Ni kamatuuli ke babaandu babaabawo nga baabusaane, ni baabona bibibeelewo bino, bekhupaka mu shifuba nga beelayo ingo waabwe.

⁴⁹Ne abo boosi abe babaamanya Yesu, ni bakhasi babaamuloondelela khukhwaama i Galilaaya, beemikha aleeyikho, nga balolelela bibiindu bino byoosi.

⁵⁰Aabawo umusaani lisiina lyeewe Yusufu, uwaba umukhulu mu shiriimba she Yuda shishilaangibwa bari Alimaseya. Abe ali umusaani umulayi, nga naye abe aliindilila khukhwiitsa khwe Buyiinga bwa Wele. Ne abe ikhaba nga aba mutweela khu bakhulu be mu lukhobo, ne niye s'afukiilisana ni neesho sheesi baakhalawo ni sheesi baakhola ta.

⁵¹

⁵²Yusufu yuno waatsya isi Pilato, wamuloomba kumulaambo kwa Yesu.

⁵³Aryo wakuwanulayo, wakubowelela musuukha iwaanga, wakura mu ŋani iyabeetsebwa mu lwaanda, nga yakhusiikhiwatsakamo umuundu yeesi ta.

⁵⁴Shifukhu shaba she khukhwiŋoonaŋoona, lwekhuuba Sabato yaba ili aambi khurakikha.

⁵⁵Ne bakhasi babaloondelela Yesu khukhwaama i Galilaaya, baatsya ni Yusufu, babona iŋani, ni kumulaambo kwa Yesu nga ni kwareebwamo.

⁵⁶Lwanyuma bakobolayo ingo, baŋoonaŋoona bibiwunya bulayi ni kamafura. Ne khu shifukhu sha Sabato bawola, nga likaambila ni liloma.