Read lumasaaba Luka 24 Bible Online

Luka 24 - lumasaaba bible

Luka 24

¹Awo khu Sabiti, shifukhu shishinyoowa mu wiiki, nga bushiili kumutikhinyi mu mamilimili naabi, bakhasi ibo beetsa khu ŋani nga bareera bibiwunya bulayi byeesi baaŋoonaŋoona.

²Baryo banyoola nga libaale lyayilingisiwile khukhwaama khu ŋani.

³Ne ni benjilamo, balekha khunyoolamo kumulaambo kw'Omukasya Yesu ta.

⁴Baryo ni baaba nga bashilaliila lweesho, bona, basaani babili bemikha aambi ni nabo, nga bakwaarire tsingubo tsitsimwekhamwekha.

⁵Mu khurya khukali, bakhasi abo benama, baalolelela aasi. Ne basaani baabaloma bari: “Lwashiina muweentsela umulamu mu bafu?

⁶S'ali ano ta, ne waalamukhile. Ni mukhebulile sheesi aabaalomela nga ashiili mu Galilaaya

⁷ari, ‘Umwaana w'Omuundu shimwaakhila khuweebwayo mu mikhono kye babaandu baboonaki, atsaangililwe khu musalaba, ni khu shifukhu she khataru alamukhe khukhwaama mu bafu.’ ”

⁸Baryo bakhasi baashebulila bilomo byeewe.

⁹Ne ni baakobola khukhwaama khu ŋani, baboolela ibo liikhumi na mutweela ni babaandu boosi ibyo byoosi byeesi baabona.

¹⁰Ni bakhasi ibo baaba nibo Malyamu Magadalena, Yohanina, ni Malyamu maayi wa Yakobo, ni bakhasi babaandi atweela, nibo bababoolela baarume bino byoosi.

¹¹Ne isi baarume bilomo ibyo byafwaana nga bikhalimo ta, nashiryo balekha khubifukiilila ta.

¹²Ne Petero wenyukha watiikhula indimo, waatsya khu ŋani, wenamamwo, weshengamwo ne walekha khubonamwo shishiindu shoosi ta, akhali tsingubo tseesi bamusiikhamo tsonyene. Aryo wakobolayo ingo, nga eyaanga, lweebyo bibyaba byakholekhile.

¹³Khu shifukhu sheenesho, babili khu baleekelwa ba Yesu baaba batsya khu shaalo shitweela, lisiina lyasho Emausi; nga shoolesa tsi kilomita nga liikhumi na ndweela khukhwaama i Yerusalemu.

¹⁴Nibo baaba bakanikha bonyene na bonyene khu biindu byoosi bibyaba byabelewo.

¹⁵Ne ni baaba nga bakanikha, luundi nga bareebana khu biindu bino, Yesu umweene wesyeenda isi bali, wakyeenda ni nabo.

¹⁶Ne nibo tsimoni tsaabwe tsawaambiwa lukhaleesi, balekha khumwofwaasa ta.

¹⁷Aryo kila Yesu abareeba ari, “Bilomo shiina bino byeesi mureebana nga mukyenda?” Nibo bemikha nga kumutaambo kwabawaambile.

¹⁸Mutweela khu nibo ulaangiwa bari Kuleopa, welamo ari, “Iwe wenyene niye umukyeni mu Yerusalemu ukhamanyile bibiindu bino bibibeelewo mu bifukhu bino?”

¹⁹Naye Yesu waabareeba ari, “Bindu shiina?” Nabo baamwiilamo bari, “Bibiindu bibiwaamba khu Yesu uwe Nazareesi, uwaba Umuŋoosi uwe kamaani mu byeesi akholatsaka ni byeesi akanikhatsaka mu moni tsa Wele, ni mu moni tse babaandu boosi.

²⁰Basaayi bakhulu ni bawuli be weefwe bamuwaanayo khukhalilwa kumusaango kwe khuufwa, bamutsaangilila khu musalaba.

²¹Ne ifwe khwaba khwayiyikina khuri niye uliwonesa Isiraeli. Ni nebyo nga bishiili biryo, shino nisho shifukhu she khataru khukhwaama bino byoosi ni bibeelewo.

²²Naluundi batweela khu bakhasi be weefwe bakhwiyaangisile, ni bawuunile khu ŋani kumutikhinyi mu mamilimili,

²³balekha khunyoolayo kumulaambo kwa Yesu ta. Bakoboole bakhuboolela bari, baboone khubonekhelwa nga bamalayika bababoolela bari, Yesu ali umulamu.

²⁴Nga bishiili biryo, batweela khu basheefwe batsiile khu ŋani banyoola nga esi bakhasi balomele, ne niye sibamunyoolele ta.”

²⁵Ulwo Yesu waabaloma ari, “Inywe nga muli basilu! Naluundi kimyoyo kyeenywe si kifukiilila wangu ibyo byeesi baŋoosi bakuukuula khaale ta!.

²⁶Kristo sishimwakhila khutaambisibwa bibiindu bino byoosi, nio anyalise khukhwinjila mu shiriifwa sheewe?”

²⁷Yesu wabasontsoola ibyo bibyakanikhibwa khu niye mu byaronebwa bikhosefu, nga anyoowela khu Musa, ni baŋoosi boosi.

²⁸Ni baaba nga boolele aambi ni shishaalo mweesi baaba batsya, Yesu wafwaana nga abe wuutsya khwilooselayo.

²⁹Ne nibo bamwikontselela bari arame ni nabo nga baloma bari, “N'urame ni nafwe, bona antsye bulikho bwilabula, ni inyaanga yamalile khuukwa.” Aryo wenjila, warama ni nabo.

³⁰Ne n'aba nga wekhaale ni nabo ashikabilo, wabukula kumukaati, wakuloombela ikhabi, wakumenyulamo, wakubakabila.

³¹Ulwo tsimoni tsaabwe tsabimbukha, bamwofwasa, n'endi wabakoraanakho.

³²Lwanyuma bareebana bonyene bari, “Kimyoyo kyeefwe sikibeele kyokhelela nga kumulilo, niye n'abeele nga akhukanikhayo khu ntsila, nga akhusontsoola ifwe bibyaronebwa bikhosefu?”

³³Lubaluba benyukha belayo i Yerusalemu, ibweeneyo banyoola baleekelwa liikhumi na mutweela, ni babaandu babaandi atweela ni nabo, nga babusaane atweela,

³⁴nga baloma bari, “Ilala Umukasya waalamukhile, abonekheele ni Simoni!”

³⁵Ne basaani babili bano nabo baabasontsoola bibibeelewo khu ntsila, naluundi ni saambo isi bamwofwaasile nga amenyulamo kumukaati.

³⁶Ne ni baaba nga bashikanikha bino, Yesu umweene wemikha akari waabwe, waabaloma ari, “Lukoosi lube ni nanywe.”

³⁷Nabo barakikha khuryaryamukha, nga barya bari baboone shisimu.

³⁸Aryo waabaloma ari, “Shiina shibariisa? Shiina kila mwikanakana mu myoyo kyeenywe?

³⁹Ni mubone bibyaaba byase, ni bikyele byase, ise niye Umweene. Ni mumambekho mubone. Shisimu sishili ni kumubili namwe ni kamakuumba ta, nga ni mubona ise ndi nabyo.”

⁴⁰Aryo n'amala khuloma isho, wabokesa bibyaaba ni bikyele byeewe.

⁴¹Ne ni baaba nga bashiili khushifukiilisa ta lwe kumwikhoyo kumukali ni khukhwilaliila, wabareeba ari, “Ne muliwo ni khekhuulya ano?”

⁴²Bamuwa shisiintsa she nyeeni intsoshe.

⁴³Washakaanila, washilya nga boosi babona.

⁴⁴Lwanyuma waabaloma ari, “Bino nibyo bilomo bibyeene byeesi nababoolela nga ishiili atweela ni nanywe ndi, shaakhila byoosi khukhwoolelesebwa mu byaronebwa khusiise; mu makaambila ka Musa, ni mu bilomo bye baŋoosi ni mu Zabuli.”

⁴⁵Aryo wabimbula kamakyesi kaawe khumanya bibyaronebwa bikhosefu;

⁴⁶waabaloma ari, “Shino nisho shisharonebwa shiri: Kristo aakha khuutaambisibwa, ni khuulamukha mu bafu khu shifukhu she khataru,

⁴⁷naluundi ni khukhwibiiyisa ni khukhwiyakhilwa khwe bibyoonako byaakha biboolelwe mu manaambo koosi mu lisiina lyeewe, ni khunyoowela mu Yerusalemu.

⁴⁸Inywe muli bajulisi beebyo byoosi.

⁴⁹Ne ise samweene intsya khubakaanisa shiwaanwa sheesi Paapa abalomela. Ne mwakha murame mu shiriimba khukhwoolesa nga mwakwaarisiwile ni kamaani khukhwaama angaaki.”

⁵⁰Lwanyuma nga Yesu wabayilile ibulafu, waboolesa aambi ni Besaniya, wenyusa kamakhono keewe, wabawa tsikhabi.

⁵¹Ne n'aba nga ashibawa tsikhabi, wabarurakho wayilibwa mwikulu.

⁵²Nabo bamwisaaya, baryo bakobolayo i Yerusalemu nga bali ni kumwikhoyo kumukali naabi.

⁵³Baryo baabatsaka mu Lisaayilo Likhulu buli busheele, nga babuyila Wele.