Read lumasaaba Luka 3 Bible Online

Luka 3 - lumasaaba bible

Luka 3

¹Mu mwiiko kwe liikhumi na kiraano kwe buwuli bwa Kayisaali Tiberiya, nga Pontiyo Pilato abe niye uwula Yuda, ni Herode nga niye uwula Galilaaya, wandaaye Filipo aba niye uwula bisiintsa bye Ituriya ni Trakoniti; ni Lisaniya nga niye umuwuli wa Abilene,

²nga Anasi ni Kayafa nibo basaayi bakhulu; Ilomo ya Wele yetsila Yokana umwaana wa Zekariya, nga ali mu mubiimbi.

³Aryo Yokana waatsya mu bisiintsa bibibotokheleele Yorudaani, nga aboolela babaandu khu khubatisibwa khwe khukhwibiiyisa, nio akile Wele abeyakhile bibyoonako byaabwe.

⁴Bino byoosi byaba nga ni sharonebwa mu burone bw'omuŋoosi Yisaaya shiri: “Iliwo likono ly'oyo ulomela angaaki mu mubiimbi liri; ‘Ni muŋoone kumukhoosi kw'Omukasya, mukwalaase tsintsila tseewe.

⁵Buli litila lyoosi litsusiwe, buli lukiingi ni lukoongo bikwalaasibwe, kimikhoosi kikyaborokha kiteresebwe, tsintsila tse kamatikwi tsikwalasibwe.

⁶Ni babaandu boosi balibona buwonesi bwa Wele.’ ”

⁷Yokana waloma kamatuuli ke babaandu babeetsa is'ali khubatisibwa ari, “Inywe tsindemu, naanu ubarewuule khukhwilukha burafu bwa Wele bubuuli khukhwiitsa?

⁸Nimwane bibyaamo bibyokesanisa khukhwibiiyisa khwe bibyoonako, naluundi mukharakikha khuloma muri, inywe muli ni Iburayimu nga Umukuuka wenywe ta. Lwekhuuba imbaboolela ndi, Wele anyala khukalusila Iburayimu babaana khukhwaama mu mabaale kano.

⁹Ni alunaari inywe mufwaanana ni bisaala; iyaywa yareerewele khaale khu shisina she bisaala, nabuli kusaala kukhaana bibyaano bilayi, kane bakureme bakutuume mu mulilo.”

¹⁰Kila babaandu bamureeba bari, “Ne ari ifwe kane khukhole khuryeena?”

¹¹Yokana kila abeelamo ari, “Umuundu uli ni tsingubo tsibili, akabilekho uyo ukhalikho nayo ta, ni nooyo uli ni biilyo naye nakhole aryo.”

¹²Ni babuusanisi be kumusolo nabo biitsa khubatisibwa. Bamureeba bari, “Umuleekeli nafwe khukhole khuryeena?”

¹³Kila abalomela ari, “Mukhabusaanisatsaka kumusolo khubiririsa isho sheesi babalakila ta.”

¹⁴Ari basilikhale nabo bamureeba bari, “Ne ifwe, kane khukhole khuryeena?” Naye wabeelamo ari, “Mukhariisariisa babaandu ni khubarusakho tsinusu tsaabwe ni kamaani ta, namwe khuwayilisa babaandu khubikhalimo ta, ne kumukheemba kweenywe kubamalatsake.”

¹⁵Mu mbuka nyene iyo, babaandu baaba bayisuunga khukhwiitsa khw'Omukasya, baryo barakikha khukhwikanakana ni khukhwireeba mu myoyo kyaabwe noola Yokana Umubatisa anyala khuuba niye Kristo.

¹⁶Yokana Umubatisa wabeelamo ari, “Ise mbabatisa inywe ni kameetsi busa, ne iliwo uli khukhwiitsa uwufuura ise kamaani, ni nase isi ikhaakhila khukangulula lukhoba lwe bilaalo[3] byeewe ta. Umweeneyo alibabatisa n'Umwoyo Umukhosefu ni kumulilo.

¹⁷Ali ni lulweelo lweewe mu mukhono kweewe, khu kyekyendula iŋaano yeewe ili khu lwaanyi, ni khukibuunga mu shiirara, likhuutsi alyooshe ni kumulilo kukhasima ta.”

¹⁸Aryo musaambo iyo, ni khuubirira musaambo tsitsiindi tsingali busa, Yokana waleekela babaandu nga abaleekela kamakhuuwa kamalayi, nga abesamo kamaani.

¹⁹Ne Yokana n'ekiitsa Herode Umuwuli lwe khubeyisa Herodiya umukhasi wa wandaaye Filipo, ni lwe biibi bibiindi swa byeesi Herode akhola,

²⁰ni khwiibyo byoosi, Herode walooselakho shiibi shishiindi shifuurira ilala: wawaamba Yokana Umubatisa waamubowa mu mapuusu.

²¹Lulwoola babaandu boosi nga bamalile khubatisibwa, Yesu naye weetsa wabatisibwa. Ne lwanyuma lwe khubatisibwa nga alikho aloomba, likulu lyabayuukha,

²²Umwoyo Umukhosefu wamwikhakho mu shifwaani she liwuusi, ni likono lyarura khukhwaama mwikulu nga liloma liri, “Iwe uli Umwaana wase isi ingana, musiiwe ndi ni kumwikhoyo.”

²³Yesu aaba ni kimiiko nga kamakhumi kataru kye bukhulu, khu mbuka isi aarakikhila buraambi bweewe. Babaandu abe bamwaambaasilisa khuuba umwaana wa Yusufu, uwaba umwaana wa Heli.

²⁴Heli aaba umwaana wa Matati, Matati umwaana wa Levi. Levi aaba umwaana wa Meleki, Meleki umwaana wa Yanayi. Yanayi aaba umwaana wa Yusufu,

²⁵Yusufu umwaana wa Matatiya. Matatiya aaba umwaana wa Amosi, Amosi umwaana wa Nahumu. Nahumu aaba umwaana wa Esuli, Esuli umwaana wa Nagayi.

²⁶Nagayi aaba umwaana wa Mahati, Mahati umwaana wa Mahatatiya. Mahatatiya aaba umwaana wa Semeyi, Semeyi umwaana wa Yoseki. Yoseki aaba umwaana wa Yoda.

²⁷Yoda aaba umwaana wa Yohanani, Yohanani umwaana wa Resa, Resa umwaana wa Zerubabeli. Zerubabeli aaba umwaana wa Seyaluteli, Seyaluteli umwaana wa Neri,

²⁸Neri umwaana wa Meleki, Meleki umwaana wa Adi, Adi umwaana wa Kosamu, Kosamu umwaana wa Elumadamu, Elumadamu umwaana wa Eri,

²⁹Eri umwaana wa Yoswa, Yoswa umwaana wa Eliyazari, Eliyazari umwaana wa Yorimu, Yorimu umwaana wa Matati, Matati umwaana wa Levi.

³⁰Levi aaba umwaana wa Simeoni, Simeoni umwaana wa Yuda, Yuda umwaana wa Yusufu, Yusufu umwaana wa Yonamu, Yonamu umwaana wa Eliyakimu,

³¹Eliyakimu umwaana wa Meleya, Meleya umwaana wa Mena, Mena umwaana wa Matata, Matata umwaana wa Natani, Natani umwaana wa Dawudi,

³²Dawudi umwaana wa Yese, Yese umwaana wa Obedi, Obedi umwaana wa Bowazi, Bowazi umwaana wa Salumoni, Salumoni umwaana wa Nahasoni.

³³Nahasoni aaba umwaana wa Aminadabu, Aminadabu umwaana wa Adumini, Adumini umwaana wa Aruni, Aruni umwaana wa Kezironi, Kezironi umwaana wa Perezi, Perezi umwaana wa Yuda,

³⁴Yuda umwaana wa Yakobo, Yakobo umwaana wa Isaaka, Isaaka umwaana wa Iburayimu, Iburayimu umwaana wa Tera, Tera umwaana wa Nakori,

³⁵Nakori umwaana wa Serugi, Serugi umwaana wa Rewu, Rewu umwaana wa Pelegi, Pelegi umwaana wa Eberi, Eberi umwaana wa Sela.

³⁶Sela aaba umwaana wa Kayinani, Kayinani umwaana wa Arupakusadi, Arupakusadi Semu, Semu umwaana wa Nowa, Nowa umwaana wa Lameka,

³⁷Lameka umwaana wa Mesusela, Mesusela umwaana wa Enoka, Enoka umwaana wa Yaredi, Yaredi umwaana wa Malaleli, Malaleli umwaana wa Kayinani,

³⁸Kenani umwaana wa Enosi, Enosi umwaana wa Seezi, Seezi umwaana wa Adamu, Adamu umwaana wa Wele.