Read lumasaaba Luka 6 Bible Online

Luka 6 - lumasaaba bible

Luka 6

¹Lutweela khu shifukhu sha Sabato, Yesu n'aba nga akyeenda mu mukuunda kwe iŋaano, baleekelwa beewe bakusa bikala bye iŋaano, babifuungila mu bikalabo byaabwe, baalya.

²Batweela khu Bafarisaayo baabareeba bari, “Lwashiina mukhola sheesi likaambila lyeefwe likhafukiilila khuukhola khu Sabato?”

³Yesu waabeelamo ari, “Simwasomatsakakho byeesi Dawudi aakhola ta? Nga niye ni babaandu beewe, intsala ni yabalya?

⁴Niye enjila mu ntsu ya Wele, waabukula kumukaati kukwawaanibwayo isi Wele, niye umweene waalya, waawakho ni babaandu beesi aaba nabo, ate nga shaba she kumusilo khuulya kumukaati kuno, khuurusakho basaayi bonyene?”

⁵Aryo waabaloma luundi ari, “Umwaana w'Omuundu niye Umukasya uwa Sabato.”

⁶Khu shifukhu sha Sabato shishiindi, Yesu waatsya mu ntsu iye khukhwisaayilamo waleekela. Ne mwabamo umusaani uwaba ni kumukhono kweewe kumulayi nga kumuleme.

⁷Baleekeli be kamakaambila ka Musa, ni Bafarisaayo bamulolelela ni khukhwimenielesa khukali nga bakana babone oba nga kane awonesele khu Sabato, nio bamisilekho bamutsuntsumilise.

⁸Ne Yesu wamanya byeesi baaba bambaasa, waloma umusaani uwe kumukhono kumuleme ari, “Yinyukha wiime akari awo.” Aryo umusaani wenyukha weema akari.

⁹Lwanyuma Yesu waabaloma ari, “Imbareeba shireebo; shifukiilisibwa ni likaambila lyeenywe khukhola buulayi khu Sabato namwe khukhola buubi? Khuwonesa buulamu namwe khubuhesa?”

¹⁰Wabebotokhelesamo tsimoni boosi, lwanyuma waloma umusaani ari, “Tsalaasa kumukhono kwoowo.” Umusaani naye wakhola aryo, ni kumukhono kweewe kwaba kwakhile.

¹¹Ne boosi bakhalala naabi, barakikha khukanikhanamo bonyene na bonyene, shiina sheesi banyala khukhola Yesu.

¹²Mu bifukhu ibyo, Yesu waatsya khu lukiingi khuloomba. Ibweene iyo wabuyayo shiilo shoosi nga aloomba Wele.

¹³Ne antsye ni bwasha kumutikhinyi, walaanga baleekelwa beewe, mu nibo warobolamo liikhumi na babili, beesi alaanga ari baarume.

¹⁴Nibo bano: Simoni isi atwiikha ari Petero, ni Andereya wandaaye uwa Petero oyo, Yakobo ni Yokana, Filipo ni Batolomayo,

¹⁵Matayo ni Tomasi, Yakobo umwaana wa Alufayo, ni Simoni uwaba mutweela khuba Zelote,

¹⁶Yuda umwaana wa Yakobo, ni Yuda Isikalyoti uwamulyamo luwomelo.

¹⁷Yesu weekha ni baarume nga ama khu lukiingi, weema mu shiifwo shishakwalaala. Lituuli likali lye baleekelwa beewe, ni babaandu bakali babaabawo nga baama mu Yuda mwoosi, ni Yerusalemu, ni babaandi babaama i Tuulo ni Sidoni, bisiintsa bibibotokhelele inyaantsa.

¹⁸Babaandu bano boosi beetsa khumurekeeresa ni khuwonesebwa tsindwaale tsaabwe. Ni naabo boosi babataambisibwa ni kimisaambwa kimibi, boosi bawonesebwa.

¹⁹Babaandu boosi bakhakakho bari bamutiilekho lwekhuuba abe kamaani kaaba karura khukhwaama mu niye kabawonesa boosi.

²⁰Yesu wenyusa tsimoni isi baleekelwa beewe waaloma ari: “Muli ni ikhabi inywe bataambi, lwekhuuba Buyiinga bwa Wele buli bubweenywe.

²¹“Muli ni ikhabi inywe babaali intsala ana ari, lwekhuuba mulikura. Muli ni khabi inywe babaalila ari, lwekhuuba mulitsekha.

²²“Muli ni khabi inywe noola babaandu bababiiyila luundi babekaana baabatyaabila, baabakhoma khulw'Omwaana w'Omuundu.

²³“Nimwikhoyele shifukhu isho, mwisutake lwe kumwikhoyo, lwekhuuba kumukheemba kweenywe mwikulu kuliba mukali, lwekhuuba bakuuka baabwe bakholatsaka baryo baŋoosi.

²⁴“N'enga she kumutaambo isi inywe bayindifu ana ari, lwekhuuba inywe mwafuna khaale kumwikhoyo kweenywe.

²⁵“Nga she kumutaambo inywe babekurire ana ari, lwekhuuba intsala ilibalya. Nga she kumutaambo inywe babatsekha ana ari, lwekhuuba muli wunamila luundi mulile.

²⁶“Nga she kumutaambo inywe beesi babaandu babuyila, lwekhuuba bakuuka baabwe baloma bibiindu nibyo bitweela isi baŋoosi be bubeeyi.

²⁷“Ne imbaboolela inywe babaali khukhundekeeresa ndi, ni mukanaatsake basiku beenywe, mukholatsake bulayi ibo babababiiyiila.

²⁸Muwe tsiikhabi abo babaakholakho bibiindu biibi, muloombele abo babaabaraangana inywe.

²⁹Isi uyo ukhukhupa luuyi khu lusaya, muyusile lusaya lwe khu lubeka luluundi nalwo. Ni n'oyo unyala wakhurusakho ikooti yoowo, lekha ayile ni isaati nayo.

³⁰Buli muundu yeesi ukhuloomba shishiindu, n'umuwaatsake, ni nooyo ukhunuulakho shishiindu shoowo, ukhamuloomba khu shikhukobosela ta.

³¹Ne ni mukholatsake khu baandu babaandi muryo nga nanywe ni mukana nibo babaakhole khuusi inywe.

³²“Inywe ni mukana ibo babakana bonyene, ikhabi shiina yeesi muli nayo? Mbo ni baboonaki nabo bakhola baryo nga bakana abo babaabakana.

³³Ne ni mukholela buulayi isi ibo babaakholela inywe buulayi bonyene, ikhabi shiina yeesi muli nayo? Mbo ni babonaki nabo bakhola baryo.

³⁴Ne inywe ni mwikhopesa bibiindu byeenywe isi ibo beesi musuubila khubakobosela bonyene, ikhabi shiina yeesi muli nayo? Mbo ni babonaki nabo bakhola baryo, bekhopesa babonaki bashaawe beesi bambaasa bari kane babakobosele mu bwitsufu.

³⁵Ne ni mukanaatsake basiku beenywe, naluundi mubakholatsake buulayi, mubekhopatsake nga simwiyikina muri, kane babakobosele shishiindu shoosi ta. Ni nashiryo, kumukheemba kweenywe kuliba mukali, luundi muliba babaana booyo, Wele Uuli Angaaki Lukali. Lwekhuuba Wele ali umulayi isi babaakhasiima ni baabi beene.

³⁶Nimube be shiisa nga Paapa weenywe n'ali ni shiisa.

³⁷“Mukhakhalila babaandi kumusaango ta, ni nanywe Wele s'alibakhalila kumusaango ta. Mukhekiitsatsaka babaandi muri kwabafuurire ta, ni nanywe Wele alekhe khubekiitsa ari kwabafuurire ta. Ni mwiyakhile basheenywe, ni nanywe Wele alibeyakhila.

³⁸Ni muwaane isi babaandi, ni nanywe Wele alibawa. Ilala muliweebwa shipimo shibakhila shilayi, sheesi bamiinile, shishisisikhiwile bulayi, luundi nga shitsutsukhaka aasi, nisho shilitsukhiwa mu makhono keenywe. Lwekhuuba shipimo sheesi muraambisa khupimilamo babaandi nisho sheesi Wele aliraambisa khubapimilamo nanywe.”

³⁹Kila Yesu ababoolela lusimo luno ari, “Umuundu umubofu anyala khuraangilila umubofu washeewe? N'akhola aryo, boombi sibanyala baakwa mwilowo?

⁴⁰Mbaawo umuleekelwa ufuura umuleekeli weewe ta, ne n'aba nga waleekiwiile mu bwitsufu, naye kane abe nga umuleekeli weewe.”

⁴¹“Iwe shiina shikila walolelela khasosono khakhaali mu moni ya wandaayo, ne walekha khumanya kukyeenga kukuuli mu moni yoowo wamweene?

⁴²Unyala uryeena waloma wandaayo uri, ‘Wandaayase khayo ikhurusemo khasosono khakhaali mu moni yoowo,’ n'enga wamweene s'unyala khubona kukyeenga kukuuli mu moni yoowo wamweene ta? Uba wiwombesa busa. Iwe umubeeyi nyoowa urusemo kukyeenga kukuuli mu moni yoowo wamweene, nio unyalise khubona bulayi khukhwinyusamo khasosono khakhaali mu moni ya wandaayo.”

⁴³“Mbaawo kusaala kulayi kukwaana bibyaamo biibi ta, namwe mbaawo kusaala kuubi kukwaana bibyaamo bilayi ta.

⁴⁴Buli kusaala bakumanyila khu byaamo byakwo byeesi kwama. S'unyala wabuta tsisabibu khukhwaama khu mawa ta, namwe sibabuta kamakhuyu khukhwaama khu marakalu ta.

⁴⁵Umuundu umulayi arusa bilayi nga abyaamisa mwibiikhilo lyeewe lilayi lye mu mwoyo kweewe. Ne umuundu umubi naye arusa biibi byeewe nga abyaamisa mwibiikhilo lyeewe liibi. Lwekhuuba kumunwa kw'omuundu kuloma ibyo bibitsuule mu mwoyo kweewe.”

⁴⁶“Lwashiina munangilisa muri, ‘Umukasya, Umukasya’, ne nga simukhola byeesi mbalomela khukhola ta?

⁴⁷Buli muundu yeesi uwiitsa isiindi, wawulila bilomo byase, ne wakhola nga ni biloma, kane imbokesanise umuundu uyo nga nafwaana:

⁴⁸afwaana nga umuundu uwayaba kumusiinji kumuleeyi naabi, wombekha intsu yeewe, warakikhila kumusiinji khu lwaanda. Ne kameetsi ni ketsula kasalasala, kumukhuura kwakhupa intsu iyo ni kamaani, ne yalekha khutengaala ta, lwekhuuba intsu iyo yombakhiwa khu lwaanda.

⁴⁹Ne umuundu uwulila bilomo byase bino, ne walekha khubikholelakho ta, ali nga umuundu uwombekha intsu yeewe khwiloba nga mbakhulima kumusiinji ta, ne kameetsi ni ketsula, kumukhuura kwakikhupa, intsu iyo yakwa, ni kumuwuulo kwayo kwaba kwe kamaani!”