Read lumasaaba Luka 8 Bible Online

Luka 8 - lumasaaba bible

Luka 8

¹Lwanyuma lwa bino, Yesu wakyeenda mu biriimba ni mu byaalo, nga aboolela kamakhuuwa kamalayi ke Buyiinga bwa Wele. Baleekelwa liikhumi na babili baaba ni naye,

²atweela ni bakhasi balala babawonesebwakho kimisaambwa kimibi, ni tsindwaale. Mu nibo mwabamo: Malyamu uwalaangiwa Magadalena, uwawoonebwakho kimisaambwa kimibi musaafu,

³ni Yohanina umukyelema wa Kuza uwaba umubiikhi wa Herode, ni Susana, ni bakhasi babaandi swa. Bakhasi bano baayeeta kumulimo kwa Yesu, ni baleekelwa beewe, nga baraambisa bibiindu byaabwe byeesi baaba nabyo.

⁴Babaandu ni beloosela khukhwiitsa isi Yesu khukhwaama mu buli shiriimba, ni betsulawo, Yesu waabakanikhila lusimo luno ari:

⁵“Umumiitsi aarura khuumiitsa bumiitso bweewe mu mukuunda. Ne n'aba nga amiitsa, bumiitso bulala bwakwa khu ntsila, babaandu baabusambakilila, ni binywiinywi bye mu ngaaki byabulya.

⁶Bubuundi bwakwa khwiloba lye khu lwaanda, ne ni bwaarura bwaniaala, lwekhuuba liiloba shilyaba ni kameetsi kakaamala ta.

⁷Bumiitso bubuundi bwakwa akari mu mawa, bwatsowela atweela ni nako, ni kamawa kabusindakilila.

⁸Ni bumiitso bubuundi bwakwa khu liiloba liilayi, bwatsowa, bwaanakho bibyaamo, khu buli shisina shitoondo shitweela.” Yesu n'amala khubakanikhila bilomo bino, waaloma ari, “Lekha uyo yeesi uli ni kamaru ke khuwulila awulile.”

⁹Baleekelwa beewe bamureeba bari, “Lusimo luno lumanyisa shiina?”

¹⁰Yesu wabeelamo ari, “Inywe mwawebwele khumanya bimoonyo bye Buyiinga bwa Wele, ne isi babaandu babaandi, bili musimo tsonyene, nio, khulola balole, ne balekhe khubona ta; khurekeeresa barekeerese, ne balekhe khubimanya ta.”

¹¹“Kamakhulu ke lusimo luno niko kano, bumiitso nibwo Ilomo ya Wele.

¹²Bumiitso bubwakwa khu ntsila, nibo babaandu babaawulila Ilomo ya Wele, ne Sitaani weetsa wabawutulamo Ilomo iyo mu myoyo kyaabwe, nio balekhe khufuna buuwonesi nga babira mu khufukiilila ta.

¹³Bumiitso ibwo bubwakwa khu liiloba lye khu lwaanda, nibo babaandu babawulila Ilomo, bakifukiilila ni kumwikhoyo, ne lwekhuuba sibali ni tsiindi tsindeeyi ta, bafukiililakho khakyeekhe, ne mu mbuka ye khuukhakibwa, bakhasikhana.

¹⁴Bumiitso bubwakwa mu mawa, nibo babaandu, babaawulila Ilomo bulayi, ne nga baatsiile, nilwe khukhwiyembelela, ni buyiindifu, ni kumwikhoyo kwe buulamu buno, bakhasikhana, baalekha khwaama bibyaamo ta.

¹⁵Ne bumiitso bubwakwa khu liiloba lilayi, nibo babaawulila Ilomo, bakiiliinda bulayi mu myoyo kyaabwe ni bubwiyikinwa. Bawulila Ilomo, bakibiikha bulayi, ni lwe khukhwikhalilikha, baanakho bibyaamo bilayi.”

¹⁶“Mbaawo umuundu uwaambisa itaala, lwanyuma waakifumalikhakho shishipo ta, namwe waakira munguriiri ta. Ne akiwaambisa, waakira khu shisiindi, nio akile buli uwingila mu ntsu abone buwaanga.

¹⁷“Lwekhuuba mbaawo shishiindu shishabisibwa, shikhalibonesebwa ta. Namwe, mbaawo shishabisibwa shikhalimanyisibwa ta, namwe khureerebwa mu buwaanga ta.

¹⁸“Nashiryo ni mwitsililise, isaambo yeesi murekeeresamo. Lwekhuuba buli muundu uli ni shishiindu balimuloselakho. Ne uyo ukhalikho na shiindu shoosi ta, balimurusakho ni khafwiiti abe kheesi ambaasa ari ali nakho.”

¹⁹Lulwoola, maayi ni babandaaye ba Yesu, beetsa khumubona, ne baalekha khwoola is'ali ta, lwe lituuli lye babaandu.

²⁰Mutweela khu baandu babaabawo waaboolela Yesu ari, “Maayi woowo, ni babandaayo bali ibulafu bakana khukhubona.”

²¹Yesu waabaloma boosi ari, “Maayi wase ni babandaayase nibo babaarekeeresa Ilomo ya Wele, baakhola nga n'iloma.”

²²Lutweela Yesu waloma baleekelwa beewe ari, “Kha khwambukhe injelekha we nyaantsa.” Baryo baniina mwikhoŋolo baatsya.

²³Ne ni baaba nga batsya, Yesu liilo lyamuwaamba. Lubaluba abalukhawo ikhuungu ye kamaani yawuutsa khu nyaantsa, ni likhoŋolo lyarakikha khukhwitsulamo kameetsi, baaba nga bali mu buwaangafu bukali naabi.

²⁴Baleekelwa baatsya isi Yesu bamusisimusa, nga baloma bari, “Musakhulu, Musakhulu, khwahela!.” Aryo Yesu wenyukha, wakhookhela ikhuungu, ni khutumbuukha khwe kameetsi, byawoleela; abawo khukwalaala khukali.

²⁵Yesu kila abareeba ari, “Khufukiilila khweenywe khuli ena?” Ne boosi baarya naabi, belaliila nga betsuule lisuno nga baloma bari, “Umusaani yuno niye naanu, bona akhookhela ikhuungu ni kameetsi byamuwulila?”

²⁶Lwanyuma Yesu ni baleekelwa beewe boola khu shaalo she Bagerasene, shishilolelaniile ni Galilaaya.

²⁷Ne Yesu n'arura mwikhoŋolo, nga ali khu lwoomu, wakanana umusaani uwabakho kimisaambwa kimibi, nga ama mu shiriimba. Kimisaambwa kino kyaba kyamumalakho imbuka indeeyi, nga s'akwaara tsingubo ta, luundi nga s'amenya mu ntsu ta, khurusakho mu mafuluma keesi basiikhatsakamo baafu.

²⁸Umusaani n'abona Yesu, walilila angaaki, wakwa aasi mu moni tsa Yesu, waloma ni likono likali ari, “Yesu, Umwaana wa Wele Uuli Angaaki lukali, ufunisa ise shiina? Ikhwikontselela ukhaamba shitaambiso ta.”

²⁹Umusaani aloma aryo lwekhuuba Yesu aba walakiile kimisaambwa khumururamo. Lwekhuuba tsifuunda ngali, nga kimisaambwa kino kyamuwaambile, abe abowebwa kiminyololo kamakhono ni bikyele byeewe, waliindibwila ilala, ne shitweela busa, aba anyala watingula kiminyololo, kimisaambwa kyamupemesa, kyamuyila iyo mu mubiimbi.

³⁰Yesu waamureeba ari, “Lisiina lyoowo naanu?” Naye welamo ari, “Ise liiye likali.” Lwekhuuba kimisaambwa kimibi mikali kyaba kyamwingilamo.

³¹Kiryo kimisaambwa kimibi kino kyekontselela Yesu naabi kiri alekhe khukikhookhela khuutsya khuwelela imakoombe ta.

³²Ne aabawo tsimbiitsi tsingali tsitsaba tsiliila khu ndulo khwe lukoongo. Kiryo kimisaambwa kimibi kino kyekontselela Yesu kiri, akilekhe kitsye mu mbiitsi itso, naye Yesu aryo, waakifukiilila.

³³Ne kimisaambwa kimibi ni kyarura mu musaani, kyaatsya kyaweela mu mbiitsi, ni tsimbiitsi tsoosi tsafulumukha, tsaselengela ilumya, tsaweela mu nyaantsa, tsahela.

³⁴Babaayi be tsimbiitsi ni babona bino, barindimukha tsindimo, baatsya basalanisa kamakhuuwa kano mu shiriimba ni mu byaalo.

³⁵Baryo babaandu bakali barurayo beetsa khubona bibibeelewo. Ne ni beetsa isi Yesu, banyoola umusaani isi kimisaambwa kyaruramo, nga wekhaale aasi abikyele bya Yesu, nga wakwaarire tsingubo, luundi nga kamakyesi kamukobolemo; babaandu baarya naabi.

³⁶Ni naabo babaabona nga kimisaambwa kimibi kirura mu musaani, baboolela babaandu isaambo isi awonesebwamo.

³⁷Ni abweenewo, babaandu boosi be mu bisiintsa bibyesaane ni Gerasene, bekontselela Yesu bari, arure isi bali atsye, lwekuba baaba bariire naabi. Aryo Yesu waniina mwikhoŋolo, wakobolayo.

³⁸Ne umusaani uwarusibwamo kimisaambwa kimibi, waloomba Yesu ari, atsye ni naye. Ne Yesu wamusiibula ari,

³⁹“Kobolayo ingo weenywe, uboolele bikali byeesi Wele akhukholele.” Aryo umusaani waatsya mu shiriimba mwoosi, waboolela babaandu byeesi Yesu amukholela.

⁴⁰Ni lwoola, Yesu n'akobola, babaandu bamwakaanila lwekhuuba baaba bamuliindile.

⁴¹Ne aabawo umusaani lisiina lyeewe Yayiro, uwaba umuwuli w'entsu ye khukhwisaayilamo, weetsa, waakwa aasi abikyele bya Yesu, waamwikontselela ari atsye, enjile mu ntsu yeewe,

⁴²lwekhuuba umukhaana weewe mutweela yenyene, uwaba uwe kimiiko liikhumi na kibili, aba mulwaale, nga ali aambi khuufwa. Aryo Yesu n'aba nga ali mu ntsila atsya, babaandu baaba nga bayindana naabi tsimbeka tsoosi.

⁴³Mubeene ibo mwabamo umukhasi umulwaale we khukhwibeena kamafuki khumala kimiiko liikhumi na kibili; uwaba wamalila bibiindu bye mu bulamu bweewe khu bakaangi, n'enga mbaawo unyala khumuwonesa ta.

⁴⁴Umukhasi uyu weetsa, nga amila imukoongo wa Yesu, watiila khu ndulo khwe ngubo yeewe, khaangu akho khukhwibeena khwe kamafuki khwakamilawo.

⁴⁵Yesu wareeba ari, “Naanu uwundiililekho?” Babaandu babaabawo boosi ni bekaanaka, Petero waloma Yesu ari, “Musakhulu, babaandu boosi bakhubotokhelele nga bayindana busa, basiindikhana.”

⁴⁶Ne Yesu waaloma ari, “Iliwo umuundu uwundiililekho, lwekhuuba ise niwuulile nga kamaani kambwamo.”

⁴⁷Umukhasi n'amanya ari s'anyala webisa luundi ta, weetsa nga nanikina, wakwa aasi abikyele bya Yesu. Waboolela Yesu akari mu baandu boosi, lwashiina amutiililekho, luundi nga nawonelewo bulwaale bweewe khaangu akho.

⁴⁸Yesu wamuloma ari, “Mukhaana wase, lwe khufukiilila khwoowo wawonisibwile. N'utsye mu lukoosi.”

⁴⁹Yesu n'aba nga ashikanikha, umurume waama mu ntsu ya Yayiro, umuraangilisi tsana w'entsu ye khukhwisaayilamo, nga aloma ari, “Umukhaana woowo wafwiile, ukhataambisa umuleekeli luundi ta.”

⁵⁰Ne Yesu n'awulila shino, waloma Yayiro ari, “Ukheyembelela ta, iwe n'ube busa ni khufukiilila, n'umukhaana woowo kane awonesebwe.”

⁵¹Yesu n'ola khu ntsu ya Yayiro, s'afukiilila umuundu yeesi khukhwinjila ni naye mu ntsu ta, khurusakho Petero, ni Yokana, ni Yakobo, ni paapa ni maayi b'omwaana.

⁵²Boosi babaabawo baaba balila, nga bakhupa kimibala. Ne Yesu waabaloma ari, “Mukhalila ta, umukhaana yuno mbakhufwa ta, ne wakonele busa.”

⁵³Babaandu bamutsekhelela busa, lwekhuuba baaba bamanyile bari wafwiile.

⁵⁴Ne Yesu wamuwaamba kumukhono, wamuloma ari, “Mwaana wase, yinyukha.”

⁵⁵Bulamu bweewe bwakobola, khaangu akho wenyukha weema. Lwanyuma Yesu waabaloma bamuwekho khe khuulya.

⁵⁶Basaali beewe baasamilila busa, ne Yesu waabakhoonyakilila ari, balekhe khuboolelakho umuundu yeesi ibyo bibibeelewo ta.