Read lumasaaba Luka 9 Bible Online

Luka 9 - lumasaaba bible

Luka 9

¹Yesu walaanga baleekelwa beewe liikhumi na babili atweela, wabawa kamaani ni bunyala, khuwoona kimisaambwa kimibi kyoosi mu baandu, ni khuwonesa tsindwaale tsaabwe.

²Aryo wabarumana khuutsya khuboolela kamakhuuwa ke Buyiinga bwa Wele, ni khuwonesa balwaale.

³Wabaloma ari, “Mukhatsya ni shishiindu shoosi ta, akhaba imiimbo, namwe isawu, namwe biilyo, namwe tsinusu, namwe mukhatsya ni ingubo ye khabili ta.

⁴Mu buli intsu yoosi mweesi mwinjila, ne babakaanila, mumenya mu bweenemwo, khukhwoolesa ni mulirura mu shiriimba isho.

⁵Ne isi babaandu bakhabakaanila ta, musisakula lufuumbi luluuli khu bikyele byeenywe nga murura mu shiriimba isho. Khusisakula lufuumbi ulwo khabe nga khabonelo khe khubareewula isi bali.”

⁶Baryo baleekelwa baatsya, bakyeenda mu byaalo byoosi, nga baboolela Kamakhuuwa Kamalayi, luundi nga bawonesa babaandu boosi, buli esi batsyatsaka.

⁷Nga bishiili biryo, Herode umuwuli wa Galilaaya, n'awulila byoosi bibyakholekha, watabukha naabi, lwekhuuba babaandu balala baaba baloma bari, Yokana Umubatisa waalamukhile.

⁸Babaandi baloma bari, Eliya waabonekhele, ni babaandi bari, mutweela khu baŋoosi be khaale waalamukhile khukhwaama mu bafu.

⁹Kila Herode aloma ari, “Ise nalakila baremakho Yokana kumurwe, ne luundi naanu uyu, isi mbulilakho bibiindu bino?” Aryo wakhakakho nga akana abonekho khu Yesu.

¹⁰Baarume ni baamala khukobola, basontsoola Yesu ibyo byoosi byeesi baakhola. Yesu weyawula khu baandu, wayila baleekelwa beewe, waatsya ni nabo bonyene mu shiriimba shishilaangibwa bari Besusaida.

¹¹Ne kamatuuli ke babaandu ni bashimanyakho baryo, bamuloondakho. Aryo Yesu wabakaanila, waababoolela bibiwaamba khu Buyiinga bwa Wele, luundi wawonesa ibo babakana khuwonesebwa.

¹²Inyaanga ni yaba nga ikana khukwa, baleekelwa liikhumi na babili beetsa isi Yesu, bamuloma bari, “Siibula babaandu batsye mu biriimba, ni mu byaalo, bibibotokhelele ano, beeweentseleyo bye khuulya, ni ekhukona. Lwekhuuba shiifwo shino shayitala naabi.”

¹³Ne Yesu wabeelamo ari, “Inywe mwabeene ni mubawe shakhulya.” Nabo bamuloma bari, “Ano khuliwo ni kimikaati kiraano, ni tsinyeeni tsibili, akhali nga khuli ni khuutsya khukulayo biilyo bye babaandu bano boosi.”

¹⁴Lwekhuuba basaani babaabawo baaba boola bikana biraano (5,000). Yesu waloma baleekelwa beewe ari, “Ni mubekhase aasi mu bipuri, nga buli shipuri babaandu kamakhumi karaano.”

¹⁵Baleekelwa beewe baakhola baryo, bekhasa babaandu boosi.

¹⁶Yesu waabukula kimikaati ikyo kiraano, ni tsinyeeni tsibili, wenyusa tsimoni mwikulu, waabiloombela ikhabi, waabimenyulakamo. Aryo waabiwa baleekelwa beewe, baabikabile babaandu.

¹⁷Boosi baalya, bekura. Baleekelwa beewe baabuusanisa buubuya bubwarama, betsusa bibiipo liikhumi na bibili.

¹⁸Lulwoola Yesu aba ali khuuloomba mu shimoonyo, baleekelwa beewe beetsa is'ali, naye wabareeba ari, “Babaandu banomakho bari ise ndi naanu.”

¹⁹Nabo belamo bari, “Balala baloma bari, iwe uli Yokana Umubatisa, babaandi bari iwe uli Eliya, ni babaandi bari, iwe uli mutweela khu baŋoosi be khaale ulamukhile khukhwaama mu bafu.”

²⁰Kila Yesu abareeba ari, “Ne inywe? Munaanga ise khuuba naanu?” Petero welamo ari, “Iwe Uli Kristo wa Wele.”

²¹Abweenewo Yesu waabakhoonyakilila naabi, balekhe khuboolelakho shino umuundu yeesi ta.

²²Aryo kila Yesu abaloma ari, “Umwaana w'Omuundu shimwaakhila khuutaambisibwa musaambo tsingali, basakhulu ni basaayi bakhulu, ni baleekeli be Kamakaambila ka Musa bamwikaane. Bali mwiira, ne khu shifukhu she kataru, alilamusibwa khukhwaama mu bafu.”

²³Lwanyuma waabaloma boosi ari, “Buli muundu yeesi ukana khuuba umulondeleli wase, aakha khukhwiyikaana umweene, etyuukhe kumusalaba kweewe buli shifukhu anoondelele.

²⁴Lwekhuuba buli muundu yeesi ukana khuuwonesa buulamu bweewe alibufwilwa, ni nooyo ufwiilwa buulamu bweewe khu lwase, alibuwonesa.

²⁵Umuundu shimuyeeta shiina khukhwifunila shiibala shino shoosi, n'endi wakosa namwe wafwiilwa buulamu bweewe?

²⁶Buli muundu uwumambiwila ise kamaŋaanyu, ni bilomo byase, Umwaana w'Omuundu naye alimuwaambiwila kamaŋaanyu n'alikobola mu shiriifwa sheewe, ni mu shiriifwa sha Paapa, ni she bamalayika beewe bakhosefu.

²⁷Ilala mbaboolela ndi, iliwo batweela khuubo babemikhile ano, bakhalitsemakho khuufwa na khafwiiti ta, khukhwoolesa ni balibona Buyiinga bwa Wele.”

²⁸Lwanyuma lwe bifukhu shinaane khukhwaama nga Yesu n'aloma bilomo ibyo, wayila Petero, Yokana, ni Yakobo, waniina khu lukiingi, khuloomba.

²⁹Ne n'aba nga aloomba, imbonekha ye mu moni mweewe yakalusibwa, ni bikwaaro byeewe byekyela biwaanga nga bimweekhamweekha.

³⁰Abweenewo abonekhawo basaani babili nga bakanikha ni naye; nga nibo Musa, ni Eliya.

³¹Babonekha mu shiriifwa she angaaki naabi, nga bakanikha ni naye bibiwaamba khu mbuka iye khururawo khweewe, iyaba ili aambi khukhwoolelela khuubirira mu khuufwa khweewe i Yerusalemu.

³²Ne Petero ni basheewe baaba bawungukhila lukali, ne ni basisimukha, babona shiriifwa sheewe, ni basaani babili babaaba beemile ni naye.

³³Ne basaani babili bano ni baaba barekukhawo isi Yesu, Petero waloma Yesu ari, “Musakhulu nga shilayi ifwe khuuba nga khuli ano! Ari khakhusimikhe bisari bitaru; shitweela shishoowo, shitweela sha Musa, ni shishiindi sha Eliya.” (Ne ilala Petero s'amanya shaloma ta).

³⁴Ne Petero n'aba nga ashiloma aryo, namufweeli weetsa wabafusilisa, nabo betsula khuurya, nga namufweeli abafusilisa.

³⁵Ulwo likono lyarura mu namufweeli nga liloma liri; “Oyu Umwaana wase, isi narobola, ni mumurekeerese.”

³⁶Likono ni lyamala khukanikha, banyoola nga Yesu ali yenyene. Baleekelwa bashisilila busa, balekha khuboolelakho umuundu yeesi, mu mbuka iyo byeesi baabona ta.

³⁷Shifukhu shishelakho, Yesu ni baleekelwa beewe ni baaba nga beekha khukhwaama khu lukiingi, lituuli lye babaandu bakali lyamwakaanana.

³⁸Mu lituuli ilyo, mwabamo umusaani uwayokesela angaaki ari, “Umuleekeli, ikhwikontselela, n'uwaambile umusoleeli wase shiisa lwekhuuba niye umwaana wase mutweela yenyene.

³⁹Shisaambwa nga shamuwaambile, awayuluukha, shimutuunda aasi, abalikhaka, wafuura lifulo imunwa. Shimukholatsaka shiryo, nga shimutaambisa, shikana khumuwesa.

⁴⁰Ni nase nikontseleele baleekelwa boowo khushiwoona shimururekho, ne bakhasikhana.”

⁴¹Yesu welamo ari, “O inywe bakhafukiilila ta, luundi kumuboolo kukwaborokha, kane imenyatsake ni nanywe khumala mbuka shiina nga imbekhalilikha? Reera ano umusoleeli woowo.”

⁴²Ne umusoleeli n'aba nga etsa, shisaambwa shiibi tsana shamukhupa aasi, wabalikha. Ne Yesu wakhookhela shisaambwa, wawonesa umusoleeli, wamukoboselayo paapawe.

⁴³Boosi beyaanga, lwe kamaani ka Wele kamakali. Ne boosi ni baaba nga bashiyaanga lweebyo byeesi Yesu akhola, waloma baleekelwa beewe ari,

⁴⁴“Ni muwulilise bulayi, mulekhe khwibilila ibyo byeesi intsya khubaboolela ta: Umwaana w'Omuundu atsya khuwaanibwayo mu mikhono kye babaandu.”

⁴⁵Ne baleekelwa nibo balekha khumanya sheesi shino shimanyisa ta. Shaba shababisiwilekho, balekha khumanya ta, ne baarya khumureeba shilomo isho nga ni shili.

⁴⁶Aabawo khukhaandisana akari e baleekelwa ba Yesu, nga bakhaandisana bari, naanu ufuura bukhulu mu nibo.

⁴⁷Ne Yesu n'amanya bibyambaaso bye mu myoyo kyaabwe, aryo wawaamba umwaana umufwiiti, wamwiimisa mu mbafu mweewe,

⁴⁸waabaloma ari, “Buli muundu yeesi uwakaanila umwaana umufwiiti nga yuno mu lisiina lyase, aba waantsakaanile ise. Na buli mutweela uwuntsakaanila ise aba wakaaniile uyo uwanduma ise. Lwekhuuba uyo uuli umufwiiti mus'iinywe mweesi niye ufuura bukhulu.”

⁴⁹Yokana waaloma ari, “Musakhulu, khwaboone umuundu nga awoona kimisaambwa kimibi, nga araambisa lisiina lyoowo, khwakhakakho khuumukhangabisa, lwekhuuba s'ali mutweela khusiifwe ta.”

⁵⁰Yesu waamwiilamo ari, “Mukhamukhangabisa ta, lwekhuuba uyo ukhalikho busiku is'uli, aba uwe khu luwaande lwoowo.”

⁵¹Ni lwoola bifukhu nga bili aambi, Yesu aniinisiwe mwikulu, waakhalilawo ilala khuuwaamba intsila iye khuutsya i Yerusalemu.

⁵²Aryo waarumana baarume khumwinyoowayo ibweeni, batsye mu shaalo she Samariya, khuumuŋoonaŋoonela byoosi.

⁵³Ne babaandu b'eyo baalekha khumwakaanila ta, lwekhuuba baamanya bari, atsya i Yerusalemu.

⁵⁴Ne baleekelwa beewe, Yokana ni Yakobo, ni baabona baryo, baaloma Yesu bari, “Umukasya, ukana khulaangile kumulilo kwiikhe khukhwaama mwikulu, kubooshe?”

⁵⁵Yesu washuukha waababiiyisa lwe lomo iyo.

⁵⁶Baryo Yesu ni baleekelwa beewe baatsya mu shaalo shishiindi.

⁵⁷Ni lwoola, ni baaba nga bali mu ntsila batsya, umusaani mutweela waloma Yesu ari, “Kane ikhuloondelelatsake oosi isi kane utsyatsake.”

⁵⁸Yesu waamwiilamo ari, “Tsishipwe tsili ni kamalowo kaatso, ni binywiinywi bye mu ngaaki bili ni biiswi byabyo, ne Umwaana w'Omuundu s'ali ni isi ara kumurwe ta.”

⁵⁹Lwanyuma Yesu waaloma umuundu ukuundi ari, “Iwe inoondelele.” Ne umuundu uyo waamwiilamo ari, “Umukasya, ndekhe inyoowe intsye isiikhe paapa wase nio.”

⁶⁰Yesu waamuloma ari, “Lekha baafu basiikhe baafu baabwe, ne iwe n'utsye uboolele kamakhuuwa ke Buyiinga bwa Wele.”

⁶¹Umuundu ukuundi waamuloma ari, “Umukasya, ise kane ikhuloondelele, ne khanyoowe intsye, isibule be muungo mwase nio.”

⁶²Yesu waamuloma ari, “Mbaawo umuundu ulimisa n'imbako iye tsikhaafu, ne weshebukhaka imukoongo, s'akhila Buyiinga bwa Wele ta.”