Read lumasaaba Kamakaambila 1 Bible Online

Kamakaambila 1 - lumasaaba bible

Kamakaambila 1

¹Bino nibyo biilomo byeesi Musa aaboolela babaandu ba Isiraeli boosi, nga bali mu mubiimbi, shangelekha we bwaamanyaanga we luluutsi Yorudaani. Baaba bali mu litila lye luluutsi ulwo aambi ni Sufu, akari e shiriimba Parani khu lubeka lutweela, ni biriimba Tofeli, Labani, Hazerosi, ni Dizahabu khu lubeka luluundi.

²Iliwo lukyeendo lwe biifukhu likhumi na shitweela, khukhwaama i Horebu khukhwoola i Kadeshi Barineya, nga waabiriire khu ntsila iye mu ngiingi tsye Seyiri.

³Khu shifukhu shishinyoowa mu mweesi kwe likhumi na mutweela, mu mwiiko kwe kamakhumi kane, khukhwaama nga ba Isiraeli ni baarura mu Misiri, Musa waakanikha isi ba Isiraeli ibyo byoosi byeesi Umukasya aamulakila khuukanikha.

⁴Bino byabawo nga Musa waamalile khuuwula umuyiinga Sihoni uwe ba Amori, n'umuyiinga Ogo uwe ba Bashani, mu busoolo. Umuyiinga Sihoni abe awula nga amenya i Heshiboni, ne Ogo abe awula nga amenya i Ashitaro ni Edireyi.

⁵Mu Mowabu, shangelekha we luluutsi Yorudaani, niyo isi Musa aarakikhila khuusontsoola kamakaambila kano, nga aloma ari:

⁶Nga khuli a Lukiingi Horebu, Umukasya Wele weefwe aakhukanikhayo isi ifwe, nga aloma ari, “Mwaamenyile khu lukiingi luno imbuka indeeyi naabi.

⁷Ni mwinyukhe ano, mwiloosele ni lukyeendo lweenywe. Ni mutsye mu shibala she tsingoongo shishiilimo ba Amori, ni bisiintsa bibishibotokheleele, nga nibyo: Litila lye luluutsi Yorudaani, shibala shishiili mu bikoongo, kumubiimbi, luuyekhe lwe khu nyaantsa, liloba lye ba Kanani ni ba Lebanooni, ni khuutsya khukhwoolela ilala khu luutsi Efurati.

⁸Isho nisho shibala sheesi ise Umukasya weenywe netsuba ndi ikhaashiwe bakuuka beenywe Iburayimu, Isaaka, ni Yakobo, nibo atweela ni babetsukhulu baabwe. Bona shiibala ishosiina, ise naashibaweele, ni mutsye mushikese shisheenywe.”

⁹Musa waalomela babaandu ari, “Khu mbuka iyo, ise nabaloma inywe ndi, ‘Ise senyene sinyala naabaraangirira inywe mweesi ta.

¹⁰Umukasya Wele weenywe waabakholile inywe khuuba baakali naabi, muli busa nga tsinieniesi khwikulu.

¹¹Khali Umukasya Wele uwe bakuuka beenywe abakholile inywe mwiloosela buukali kimiluundi shikana shitweela (1,000), naluundi abawa inywe tsikhabi nga n'abasuubisa inywe.

¹²Ne ise senyene inyala indyeena netwiikha kumukuku kwe khuukhalawo tsikhaayano tsyeenywe ni khuulomana?

¹³Ni murobore khukhwaama mu buli shikuuka, basaani be kamakhula, babaamanyile khuukhalawo, naluundi babaamanyile bibiindu biikali, kane ise imbekese khuuba baraangirisi beenywe.’

¹⁴Inywe mwaantsilamo ise nga muloma muri, ‘Waalomile shishiindu shilayi naabi.’

¹⁵Kila ise imaamba basaani bano, babaali bakesi, naluundi babaamanyile bibiindu biikali, imbekesa khuuba baraangirisi beenywe. Batweela khu nibo baaba baraangirisi be kamaye, nga baraangirira bibuli bye bikana, bitoondo, kamakhumi karaano, namwe likhumi. Babaandi ise nabekesa khuuba baawuli be babaandu, ni babaandi khuuba baakayi.

¹⁶“Kila inomela baakayi ndi, nga mukhala kimisaango, muli ni khukhwookesanisa bwaŋali, oba kumusaango kuli akari e ba Isiraeli bonyene, namwe akari O umu Isiraeli n'umuundu uwe bulafu busa, umenya ni nanywe.

¹⁷Mu khukhala kimisaango, oba kuli kw'omutaambi, namwe kw'omuyiinda, mulekhe khukhwikhupila luwaande lutweela ta. Abe umuundu ikhaba nga ali naanu, mukhamurya ta, khulwekhuuba Wele niye uuli khuukhalawo, shiili inywe ta. Kimisaango kimisiro naabi, mukireera isi ise, imbe umukayi.

¹⁸Mu mbuka iyo, ise nabalakila inywe bibiindu byoosi byeesi muli ni khuukhola.”

¹⁹Musa weloosela ari, “Lwanyuma khwenyukha khukhwaama khu Lukiingi Sinaayi, khwaabirira mu mubiimbi kumuboofu ukwo nga ni mwakubona, nga khulikho khutsya mu liloba lye ba Amoni, nga Umukasya Wele weefwe, n'akhulakila. Kila khutsya khwoola mu shibala she tsingiingi, shishilaangibwa Kadeshi Barineya.

²⁰Kila ise inooma ndi, ‘Bona ari khwoolile mu shibala she ba Amoni, sheesi Umukasya Wele ali khuutsya khuukhuwa ifwe.

²¹Bona, ifwe Umukasya waakhwookesile shibala. Nashiryo, mukharya namwe mukheyembelela ta, ni muniine mutsye mushiwaambe, nga Umukasya Wele uwe bakuuka beenywe n'alomile.’

²²Kila ndi mweesi mwiitsa isi ise muloma muri, ‘Ne nga khushiili khutsya khukhwiingila mu shibala isho ta, khayo khunyoowe khusiindikheyo babaandu batsye bashimenielese. Nga bano baakoboole, kane bakhuboolele ifwe bibiwaamba khu biriimba bibiiliyo, ni kumukhoosi kweesi khuli ni khuutsiilakho.’”

²³“Ise nambaasa ndi inengekharengekha iyo ili indaayi. Ni nashiryo, ise narobora khukhwaama mu buli shikuuka umuundu mutweelatweela, baaba likhumi na babili.

²⁴Abano baatsiila ilala ni khukhwoola mu litila ly'Esikolo, nga bemenielesa shibala.

²⁵Khaba nga bakobola baabusaasakho bibyaamo byeeyo beetsa ni nabyo. Kila baloma bari, ‘Liiloba lyeesi Umukasya Wele weefwe alikho akhuwa ifwe, lili liilayi lilyaama biilyo biikali naabi.’”

²⁶Ne shitweela busa inywe mwashuukha khu Mukasya Wele weenywe, mwaaloba khutsya mu liloba ilyo.

²⁷Inywe mwarama mu masari keenywe, mweŋuluŋuunya, nga muloma muri, “Ifwe Umukasya akhuyila nga baasiku beewe. Khulwekhuuba aakhurusa ifwe mu Misiri waakhureera ano, ari nio akhwiire nga akhuwaanayo ifwe isi ba Amori.

²⁸Ifwe khunyala khuryeena khwaatsya mu shifwo isho? Khulwekhuuba baalebe beefwe beesi khwarumanayo baakhumalile ifwe kamaani, nga ni bakoboole baakhuboolela bari babaandu b'eeyo bali kimisaani kimiboofu naluundi kimileeyi, khuukhuminya ifwe. Biriimba byaabwe baabibotokhelesa ni kamatikiiyi kamaleeyi, khukhwoola mu ngaaki. Batweela khu misaani ikyo, bali be lisaaye lya Anaki, kukwaba kusaani kuboofu naluundi kuuleeyi.”

²⁹Kila ise imbalomela inywe indi, “Mukharya namwe mukheyembelela ta.

³⁰Khulwekhuuba Umukasya Wele weenywe ubaraangirira inywe, niye umweene anabasoolanila, nga n'asoolanisa ba Misiri nga mwabeene mubona.

³¹Inywe mwabeene mwebonelekho nga Umukasya n'akhuliindile ifwe imbuka isi khwabeleele mu mubiimbi, waaba busa nga paapa n'enaana khu mwaana weewe, khukhwoolisa ni khweetsile khwoola mu shifwo shino.”

³²Ne shitweela busa, inywe mwaalekha khuuloondelela naluundi mwalekha khufukiilila byeesi Umukasya Wele weenywe aaloma ta,

³³ikhaba nga niye uwakhuraangirira ifwe naakhwookesa abe isi khuli ni khuutsya. Naluundi abe kumuusi ekyela kamafuumbi, ni mu shilo wekyela kumulilo, nga akhumulikhila ifwe isi abe khuli ni khuutsya.

³⁴“Umukasya waawulila byeesi inywe mwaloma, lirima lyaamuwaamba, kila etsuba nga aloma ari,

³⁵Mbaawo na mutweela khu baandu be kumuboolo kumwoonaki kuno, ulibonakho khu liiloba liilayi lyeesi netsuba ndi ikhaaliwe bakuuka beenywe ta.

³⁶Akhali Kalebu, umusoleeli uwa Yefune, ni babaana beewe, nibo beesi kane imbe liiloba lyeesi amalile khuukyeendamo. Khulwekhuuba niye yenyene uloondeleele byeesi Umukasya aloma.”

³⁷Waakila ni nase Umukasya waakhalila kumusaango, waaloma ari, “Musa, ikhaba iwe nawe, singane wingile khu liloba lyeesi nabalomela ta.

³⁸Akhali Yoswa umusoleeli uwa Nuni, uli umuyeeti woowo, niye ukhengile mu liloba ilyo. Mwisemo kamaani, khulwekhuuba ali ni khuuyeeta ba Isiraeli khuumenya mu liloba ilyo.

³⁹Ni khufuurisila ilala, babaana beenywe beesi mwaambaasa muri baasiku balibawaamba batsye ni nabo, ni babaana beenywe babaakhalikho ni kumusaango ta, abo bakhengile mu liloba ilyo. Ikhaalibawe, libe lilyaabwe.

⁴⁰Ne inywe yinyukha muwaambe intsila, mukwe khu lukyeendo mwiileyo mu mubiimbi, luwaande lwa Inyaantsa Imbesemu.

⁴¹“Kila inywe mwangobolamo nga muloma muri, ‘Ifwe khwaakholile shishoonako mu moni tsy'Omukasya. Ari khwaafuukiliile, kane khuniine khutsye khusoolane nga Umukasya Wele weefwe n'alomile.’ Nashiryo buli mutweela khus'iinywe waabukula bye busoolo, mwaambaasa muri kane shibe shaangu khuuniina mutsye musoolanise, lwanyuma muwaambe shibala isho.

⁴²Ne Umukasya waanomela ise ari, ‘Bareewure bakhaniina ingaaki khuutsya khusoolana ta, khulwekhuuba ise singane imbayeete ta. Kane baasiku baabwe babafuure.’

⁴³Ise nababoolela, ne inywe mwaalekha khurekeeresa byeesi Umukasya aloma ta, mwamushuukhakho, mwaafuungiliila mwaatsya mwebwakala shibala she mu bikoongo isho.

⁴⁴Ne ba Amori abe babaamenya mu shibala isho ni baabebwakala inywe, mwatitukha nga beesi intsukhi ibwakaale. Baabatimisa khukhwoolisa ni mwengila mu Edomu, baatsya baabafuurira mu shiriimba shilaangibwa Homari.

⁴⁵Kila mulilila Umukasya kamasika, n'Umukasya walekha khubenaanakho ta.

⁴⁶Ni nashiryo khwaarama i Kadeshi khuumala imbuka indeeyi naabi.”