Read lumasaaba Kamakaambila 10 Bible Online

Kamakaambila 10 - lumasaaba bible

Kamakaambila 10

¹“Mu mbuka iyo, Umukasya waanomela ise khuukhootsayo kamabaale kakaandi kabili, kakaali nga abe keesi nanyoowa khuukhootsa, ikhole isanduuku, lwanyuma iniine ni kamabaale ako khu lukiingi khu ngaaki.

²Waanomela ise ari niye atsya khurona khu mabaale ako bilomo byeesi abe aarona khu mabaale kakaanyoowa, keesi ise naaraaka. Nio lwanyuma ingare mu sanduuku.

³“Nashiryo ise naakhola isaanduuku khukhwaama mu kuusaala ku akasiya, naakhootsa ni kamabaale kabili, kakaali nga abe kakaanyoowa. Lwanyuma ise naaniina khu lukiingi nga naasutile kamabaale ako.

⁴Umukasya waarona khu mabaale ako kamakaambila likhumi, nga n'arona kumuluundi kukwanyoowa. Bino byaba bilomo ni bibyeene byeesi Umukasya aabakanikhila inywe nga n'akanikha isi lituuli, nga ali mu mulilo khu lukiingi. Umukasya waamaambisa ise kamakaambila ako.

⁵Ise naama khu lukiingi khu ngaaki, naakobola aasi, naawaamba kamakaambila ako, naakara mu sanduuku tsana isi nakhola, nga Umukasya n'andakila. Kashiili ni mu sanduuku umwo.

⁶“Lwanyuma babaandu baakyeenda khukhwaama i Beyerosi Bene Yakani, khuutsya khukhwoola i Mosera. Nga bali ibweene iyo, Aroni waafwa, baamusiikha iyo. Umusoleeli weewe Eliyazaari, waamwiila mu bikele byeewe nga umusaayi.

⁷Khukhwaama awo, baakyeenda baatsya i Gudagoda. Khukhwaama awo, baatsya i Yotibasa, shibala shishiilimo tsintsitsi tsingali.”

⁸Musa weloosela waaloma ari, “Lwanyuma lwayo, Umukasya waarobora be shikuuka sha Levi khuuba nibo babaasuta i sanduuku iye indakaano, ni khuuba basaayi babaawa babaandu tsikhabi. Bashiikhola buuraambi ubwo khukhwoolisa ni shaleelo.

⁹Ni nashiryo be shikuuka sha Levi singane bafune kumukabo kwe liiswa ta, khulwekhuuba Umukasya umweene niye akhaabawatsake sheesi bakana.”

¹⁰Musa weloosela waalomela ba Isiraeli ari, “Nga ni naba naayilile kamabaale kaabili khu lukiingi, naamalayo biifukhu kamakhumi kane ni biilo kamakhumi kane, nga abe ni namala kumuluundi kukwanyoowa. Kumuluundi kuno nakwo, Umukasya waamba ise sheesi namuloomba, waalekha khubahesa inywe ta.

¹¹Ne akhali waanomela ise ari, ‘Musa, raangirira babaandu bano, ubayile batsye bawaambe shibala sheesi ise netsubila bakuuka baabwe, indi ikhaawe lisaaye lyaabwe.’

¹²“Ne ari ba Isiraeli, sheesi Umukasya abakanakho shili shiri: Mwisaayatsake Umukasya Wele weenywe, muloondelele byeesi abalakila, mumukane, naluundi mumwakaanise niye ni kimyooyo kyeenywe kyoosi, ni buulamu bweenywe bwoosi.

¹³Naluundi, muloondelele kamakaambila keewe, ni biilakilo byeewe, byeesi ise imbaweele inywe, khukhwaama shaleelo ni khukhwoolisa ni mufwa.

¹⁴Muli ni khuushimanya muri likulu, ni shibala, ni n'ebyo byoosi bibiili mu shibala, bili by'Omukasya, Wele weefwe.

¹⁵Ne shitweela busa, Umukasya waakana bakuuka beenywe, kila lwanyuma alekha kamanaambo koosi, waarobora lisaaye lye bakuuka beenywe.

¹⁶“Nashiryo, ari ni mulekhe khuumiinyaalila Umukasya.

¹⁷Khulwekhuuba Umukasya Wele weefwe, ali Wele uwe ba wele, naluundi ali Umukasya uwe bakasya. Ali uwe angaaki, naluundi uwe kamaani, ukhola bye kamakaanga, uwamanya khuukhala kimisaango, naluundi ukhalya iwoongo ta.

¹⁸Umukasya waamanya khuutseeta banamulekhwa ni baafuubi. Enaanayo kh'ubeetswa, nga abawa biilyo ni bikwaaro.

¹⁹Muli ni khuukana babeetswa nga mubenaanakho, khulwekhuuba nanywe mwaba babeetswa mu Misiri.

²⁰“Nashiryo muli ni khukhwisaaya Umukasya Wele weefwe, mumwakaanise niye yenyene nga mumwiyomisilakho. Ikhaba byeesi musuubisa, muli ni khuuraambisa lisiina lyeewe.

²¹Ali Wele weenywe, niye yenyene isi muli ni khuuruuya. Khulwekhuuba niye waabakholeele inywe bibiindu bye kamakaanga, byeesi mwabeene mwiboonelekho ni tsiimoni tsyeenywe.

²²Isi bakuuka beenywe baatsiila khuumenya mu Misiri, abe bali babaandu kamakhumi musaafu bonyene. Ne bona Umukasya Wele weefwe waabawa inywe tsikhabi, ari muli busa nga tsinieniesi tse khwikulu.”