Read lumasaaba Kamakaambila 11 Bible Online

Kamakaambila 11 - lumasaaba bible

Kamakaambila 11

¹Musa weloosela waaloma ari, “Nashiryo, busheele muli ni khuukanaatsaka Umukasya Wele weenywe, muloondelele byeesi ababoolela, nga nibyo indeekela, biilakilo, ni kamakaambila keewe.

²Lwe shaleelo, muli ni khuushebulila ibyo byeesi mweyika khukhwaama isi Umukasya Wele weenywe, nga mulimo khukhwookesana kamaani, ni khuuraambisa bibiyaangisa. Inywe mwabeene nibo mumwabona bibiindu bino, shiili bari babaana beenywe ta.

³Inywe mwabona bye kamakaanga byeesi niye aakhola khu Faraawo, umuyiinga uwa Misiri, ni khu ba Misiri boosi.

⁴Ikhaba byeesi aakhola khu liiye lye ba Misiri, nga n'onakisa tsiŋwaaŋwa tsaabwe ni kamakaali kaabwe, nga n'alekhuula kameetsi ke mu Inyaantsa Imbesemu kaabamila nga abe balikho babaloonda khusiinywe. Ni khukhwoolisa shifukhu she shaleelo, inywe mwabeene mushebulila ibyo byeesi Umukasya aakhola.

⁵Mushebulila ni n'ebyo byeesi aabakholela inywe nga muli mu mubiimbi, khukhwoolisa ni mweetsa mwoola ano.

⁶Mwabona sheesi Umukasya aakhola khu Dasani ni Abiramu, babaana ba Eliyabu, uwe mu shikuuka sha Rewubeni. Nga ni aakhola liloba lyaabayuukha, lyaabamila nibo ni be muungo tsaabwe, ni tsiintsu tsyaabwe, ni byeesi baaba ni nabyo byoosi, nga ba Isiraeli boosi baboone.

⁷Inywe mwabeene mwabona ni tsimoni tsyeenywe, nga Umukasya araambisa kamaani keewe khuukhola bibiindu bino byoosi.”

⁸Musa weloosela waaloma ari, “Bona muli aambi khuukhalisa luluutsi Yorudaani. Ni muloondelela kamakaambila keesi indikho imbawa inywe shaleelo, kane mube ni kamaani kakaabamala khuuwaamba liiloba ilyo,

⁹lyeesi Umukasya aalomela khuuwa ba kuuka beenywe, ari kane awe lisaaye lyaabwe, nga nibo inywe. Lili liiloba liilayi naabi, lilyaama biilyo biikali, naluundi kane mulimenyemo imbuka ndeeyi.

¹⁰Khulwekhuuba liiloba lyeesi mutsya khuwaamba lili liilayi, silili nga liloba lye mu Misiri abe isi mumenya ta. Lye mu Misiri abe mutaambisibwa ni khuutsukhilila ikhaba tsinyanyi, nio tsitsowe.

¹¹Liiloba lyeesi mutsya khuwaamba lili lye mu ngiingi ni mu matila, nga nilyo lili ni kameetsi khukhwaama khu fula,

¹²khulwekhuuba Umukasya Wele weenywe, enaanayo naabi khu liloba ilyo, khukhwaama nga kumwiiko ni kunanikha, khukhwoolisa ni kwaakama.

¹³“Ni kane muloondelele kamakaambila k'Omukasya keesi ise ndikho imbawa inywe lwe shaleelo, naluundi ni kane mumukane naabi ni kimyoyo kyeenywe kyoosi, ni buulamu bweenywe bwoosi,

¹⁴Umukasya kane abawe inywe ifula mu mbuka inyene iye khuulima biilyo, nio akile mube ni nabyo mu bukali, nga mulimo kimizabibu, ni kimi olivu.

¹⁵Naluundi akhaabawe inywe kamaayilwe kamalayi ke bibyaayo byeenywe, naluundi mube ni biilyo biikali.

¹⁶Muli ni khukhwitsiliilisa mubone muri kimyoyo kyeenywe sikikhoongelesebwa, mwaarura khu Mukasya, mwesaaya ba wele babaandi ta.

¹⁷Ni mukhola isho, Umukasya kane abawaambile lirima, akamise ifula ilekhe khukhupa ta. Shino kane shikile mutaambe biilyo, mufwe muwewo khu liloba lyeesi Umukasya alikho atsya khubawa inywe.

¹⁸“Nashiryo, mu myoyo kyeenywe ni buulamu bweenywe, muli ni khuushebulilatsaka kamakaambila k'Omukasya. Mukarone, mukabowe khu makhono keenywe, ni mubweeni bweenywe, nio munyalise khuukashebulila.

¹⁹Muli ni khuuleekela babaana beenywe kamakaambila kano, buli oosi isi muli, nga muli ingo, mukyeenda khu ntsila, angoloobe ni kumutikhinyi.

²⁰Muli ni khuukarona khu bisiindi bye kimilyaango kyeenywe, ni khu bilibwa byeenywe.

²¹Shino kane shibanyalise inywe mwabeene ni babaana beenywe, khuumenya naluundi musaale mubalaahe, nga muli khu liloba lyeesi Umukasya aamala khuulomela bakuuka beenywe. Kane mumenyemo biilo ni biilo.

²²Khulwekhuuba siinga mwitsiliilisa nga muloondelela kamakaambila k'Omukasya keesi indikho imbawa inywe, mwaakhola buli byeesi aloma, naluundi mwaamwiwaambilakho ilala,

²³kane Umukasya atimise kamanaambo ako koosi, nga inywe mushiili na khwoolayo ta, muryo inywe munyalise khuuwula mu busoolo, kamanaambo ako kakaalimo babaandu baakali, naluundi ke kamaani khuubaminyisa inywe.

²⁴Buli liiloba lyeesi mukhaandakakho, likhaabe lilyeenywe. Mukhawaambe khukhwaamila mu mubiimbi kukuuli ibikyele we tsingiingi tsya Lebanoni, ni khukhwaamila khu luutsi Efurati ibwaamanyaanga, khuutsya khukhwoola khu nyaantsa Meditereniyani.

²⁵Mbaawo umuundu na mutweela ukheemikhe khuubasoolanisa inywe ta. Umukasya Wele weenywe umweene akhaakhole nga n'asuubisa: Babaandu boosi babe ni buuri nga baababoone inywe.

²⁶“Lwe shaleelo muli ni khuukhalawo: Mukana Umukasya abawe ikhabi, namwe abawe shitsubo?

²⁷Nga mwaloondeleele kamakaambila k'Omukasya keesi indikho mbawa shaleelo, kane Umukasya abawe inywe ikhabi.

²⁸Ne ni mulekha khuuloondelela kamakaambila k'Omukasya, Wele weenywe, keesi indikho mbawa lwe shaleelo, mwaatsya mwesaaya ba wele babaandi busa, kane abarekho shitsubo.

²⁹Ne lwanyuma nga Umukasya Wele weenywe waabayilile waabaweele liiloba lyeesi mutsya khuwaamba, muli ni khuuniina khu lukiingi Gerizimu, mukuukuule isaambo isi Umukasya kane abawe tsikhabi, naluundi mukuukuulile khu Lukiingi Ebali, isaambo isi Umukasya kane abawe bitsubo.

³⁰Mwaamanya muri tsingiingi tsiibili tsino tsili ibukwanyaanga we Luluutsi Yorudaani, mu liloba liliilimo naluundi liliwulibwa ni ba Kanani, babaamenya mu litila lye Yorudaani. Tsingiingi tsino tsili ibwamanyaanga we lukuuto, aambi ni kimisaala kye khukhwisaayilamo, i More shangelekha wa Gilugaali.

³¹“Muli aambi khuukhalisa luluutsi Yorudaani, mutsye muwaambe liiloba lyeesi Umukasya Wele weenywe abaweele inywe. Nga mwaamalile khukhwiyombakha ibweene iyo,

³²muli ni khukhwitsiliilisa mubone muri muloondelela bilakilo ni kamakaambila keewe, keesi ise ndikho imbawa inywe, lwe shaleelo.”