Read lumasaaba Kamakaambila 13 Bible Online

Kamakaambila 13 - lumasaaba bible

Kamakaambila 13

¹Musa weloosela waaloma ari, “Abe ikhabawo umuŋoosi, namwe batweela khuubo babaamanya khuusoma bye kamarooro, akhabawa buukakafu ari she kamakaanga shitsya khukholikha,

²naluundi ilala sheesi aababoolela shaakholikha, ne abe akhaloma ari, ‘Ni mwiitse khutsye khwisaaye ba wele babaandi,’ beesi inywe mukhaamanya ta,

³mukharekeeresa bilomo by'omuundu ufwaana aryo ta. Khulwekhuuba isho shiba busa ndi, Umukasya Wele weenywe alikho abakhakilisa inywe, abone oba inywe mumukana niye ni kimyoyo kyeenywe kyoosi, ni buulamu bweenywe bwoosi, namwe ta.

⁴Muli ni khuuba babeyikinwa isi Umukasya Wele weenywe, naluundi mumwisaaye niye. Muli ni khuurekeeresa likono lyeewe, nga muloondelela byeesi aloma, mumwakaanise naluundi mumwikumisilekho.

⁵Ne umuŋoosi uyo, namwe uwamanya khuusoma bye kamarooro uyo, ali ni khukhwiiribwa. Khulwekhuuba aba waalekeele babaandu ari baminyaalile Umukasya Wele weenywe, uwabarusa inywe khukhwaama mu shibala she Misiri, isi aabaamisa nga mutaambisibwa. Umuundu uyo aba waabarusire inywe khukhwaama khu mukhoosi kweesi Umukasya Wele weenywe, aabalakila inywe khuuloondelela. Nashiryo muli ni khuurusawo shishoonako isho, khukhwaama akari enywe.

⁶“Wandaayo, namwe umwaana woowo umusiinde, oba umukhaana, namwe umukhasi woowo, namwe musaale woowo ufuura buulayi, anyala waakhukhoongelesa mu shimoonyo busa nga aloma ari, ‘Khayo khutsye khwisaaye ba wele babaandi,’ beesi iwe namwe bakuuka boowo bashiili khwisaayatsakakho ta.

⁷Ba wele bano be babaandu babaakhwibotokheleele iwe, banyala baaba bali aambi namwe aleeyi ni nawe.

⁸Ukhaloondelela byeesi aloma, namwe waabirekeeresa, namwe waamuwaambila shiisa, namwe waamulekha khuuba umulamu, namwe waamukukhulila ta.

⁹Ne akhali muli ni khuumwiira. Iwe wamweene isi bakhoongelesile uli ni khuuba unyoowa khuumukhupa kamabaale, nio babaandu babaaramire nabo balooselekho.

¹⁰Muli ni khuumukhupa kamabaale, khukhwoolisa n'aafwa.

¹¹Ari nga ba Isiraeli boosi baawuliile khu shiindu shino, kane babe ni khuurya khuukali, nio alekhe khubayo umuundu yeesi ukhola shishiindu she bubwoonaki nga isho ta.

¹²“Lwanyuma lw'Omukasya Wele weenywe khuubawa biriimba ari mumenyemo, munyala mwaawulila tsilomo tsye kamatsi tsitsiwaamba khu bitweela khu biriimba ibyo.

¹³Munyala mwaawulila bari iliwo babaandu baboonaki, babaakhongelesile buli mutweela mu biriimba ibyo, khukhwisaaya ba wele babaandi, ikhaba nga ba wele bano bashiili khubakholelakho shishiindu shoosi ta.

¹⁴Muli ni khuuweentselesa imbola mubone oba tsilomo itsyo tsili tsya ŋali namwe ta. N'iba bari babaandu be mu shiriimba isho baakholile shishiindu she kamaŋaanyu nga isho mu shibala sheenywe,

¹⁵muli ni khuuwaamba buli mutweela lurima lweewe, mubeere boosi, atweela ni bibyaayo byaabwe byoosi.

¹⁶Lwanyuma mubuusaase bibiindu bye babaandu abo, akari mwikaantso, mubyooshe atweela ni shiriimba sheene. Shino shili ni khuuba nga shiwaanwa shishooshe, isi Umukasya Wele weenywe. Shiriimba isho shili ni khuurama busa nga imuumbi ye likoshe, mbaawo khuushoombekha bushaakha luundi ta.

¹⁷Mukheebiikhila mwabeene shishiindu shoosi sheesi bakhalila kumusaango bari shili ni khukhwoonakisibwa ta, muli ni khuubihesa biwewo. Nio shinyalise Umukasya abawaambile inywe shiisa, abalekhewo, lisaaye lyeenywe libalaahe, nga n'aalomela bakuuka beenywe.

¹⁸Ni nashiryo, muli ni khuuloondelela byeesi Umukasya Wele weenywe aababoolela, nga muloondelela kamakaambila keewe, keesi ise imbawa inywe shaleelo, naluundi nga mukhola ibyo bibikhoyesa Umukasya Wele weenywe.”