Read lumasaaba Kamakaambila 15 Bible Online

Kamakaambila 15 - lumasaaba bible

Kamakaambila 15

¹“Lwanyuma lwa buli kimiiko musaafu, muli ni khukhwiyakhila abo beesi mubaantsa, nga mukhalamo kamakobi ako.

²Muli ni khuukakhalamo mu saambo yino: uyo yeesi uwamala khukhwikopisa umu Isiraeli uwasheewe kamapeesa, ali ni khuukhalamo likobi ilyo. Akhamubaantsa ta, khulwekhuuba kuli nikwo kumwiiko kweesi Umukasya alakiile ari bari ni khuukhalamo kamakobi.

³Likaambila lino liwaamba khu mapeesa keesi mwekopisa ba Isiraeli bonyene, ne babaandu babaakhali ba Isiraeli ta, muli ni khuubabaantsa babasasule.

⁴“Ne ikhabayo umutaambi mu ba Isiraeli ta. (Khulwekhuuba Umukasya Wele weenywe, alikho atsya khubawa liloba, naluundi abawe tsikhabi mu busikha bweesi mutsya khufuna).

⁵Shonyene indi muli ni khuuloondelela byeesi Umukasya Wele weenywe aloma, naluundi muloondelele kamakaambila keesi ise ndikho imbawa lwe shaleelo.

⁶Khulwekhuuba Umukasya Wele weenywe kane abawe inywe tsikhabi, nga n'abasuubisa. Kane inywe mube ni buyiindifu bukali khuuminyisa kamanaambo kakaandi; naluundi kane mube ni kamaani kamakali, mwikele baawuli be kamanaambo kakaandi.

⁷“N'iiba bari mwoolile mu biriimba bye liiloba lyeesi Umukasya atsya khubawa inywe, ne mwaabamo umuundu umu Isiraeli umutaambi mus'iinywe, mukhamukhupa kumukoongo ta.

⁸Akhali ndi muli ni khuumwokesanisa kumwoyo kumulayi, nga mumwikopesa byeesi niye ekoomba.

⁹Muli ni khukhwitsiliilisa, mulekhe khuba ni bibyambaaso biibi bye khuuloma biri, ‘Singane ikhwikopise ta, khulwekhuuba kumwiiko kwe khuukhalamo kamakobi kuli aambi.’ Shiba she kumutaambo isi umuundu uwambaasa aryo, waalekha khuyeeta baalebe beewe babaali bataambi ta. Ni muloba khubayeeta ta, isho shili shishoonako. Ne ni balilila Umukasya, kane Umukasya abakhalile inywe kumusaango.

¹⁰Ni muwe busa bataambi bibiindu nga mwikanisa, akhali khukhwilomela ta. Khulwekhuuba nga simwelomeele ta, Umukasya Wele weenywe, kane abawe inywe tsikhabi, nio buli sheesi mukhola shibatsiile buulayi.

¹¹Khulwekhuuba ise naamanyile indi busheele ikhaabatsakewo bataambi musiinywe; isho nisho shikilile nabawa likaambila indi, mukhabapa kumukoongo ta.”

¹²Musa weloosela waaloma ari, “N'uba bari waakula umu Isiraeli washoowo, khuuba umukulwa woowo, ali ni khuukhuraambira iwe khuumala kimiiko kisesaba. Mu mwiiko kwe kumusaafu, uli ni khuumulekhuula atsye.

¹³Nga umulekhuula khuutsya, akhatsya kamakhono kamaŋaara busa ta.

¹⁴Uli ni khuumuweela ilala bibiindu khukhwaama mu byaayo byoowo, mu bilimwa byoowo, ni mu viini yoowo. Nga Umukasya waakhuwa bibiindu biikali, nawe uli ni khuumuwa bibiindu biikali.

¹⁵Ise ndi khuubalakila inywe shaleelo ndi, muli ni khuuloondelela byeesi Umukasya Wele weenywe aloma, khulwekhuuba aabawonesa inywe khukhwaama mu bubowe i Misiri.

¹⁶“Ne umukulwa uyo, n'aaba bari waakhusiima iwe ni be muntsu mwoowo, naluundi amenya buulayi ni nanywe, ne waaloma ari, ‘Ise ingana iname ano ni nanywe,’

¹⁷uli ni khuumuyila amulyaango we ntsu yoowo, uwaambe shishiindu shishooki umuruundure khukhuru shingile mu lwiitsi. Umukulwa uyo, oba umusaani namwe umukhasi, ekela uwoowo buulamu bweewe bwoosi.

¹⁸Ukhaba ni khukhwiŋuluŋuunya nga waalekhuulile umukulwa waatsiile ta. Khulwekhuuba akhuraambire iwe khuumala kimiiko kisesaba, nga abe umusasula shisiintsa she kumukheemba kweesi abe ali ni khuufuna. Nashiryo nga waamulekhulile waatsiile, kane Umukasya Wele weenywe abawe tsikhabi.

¹⁹“Nga shiikiboole sheesi shishaayo shoowo shisaalile shili sh'eseetsa, uli ni khuushiwaanayo isi Umukasya Wele weenywe. Ukhashiraambisa mu khukhola kimilimo muungo mwoowo ta.

²⁰Akhali ndi, buli kumwiiko, uli ni khuuwaamba sh'eseetsa isho, ushiyile mu shifwo sheesi Umukasya Wele weenywe, akhalilewo ari mumwisaayilemo. Iwe ni be muungo mwoowo, muli ni khuushiwaanayo nga isaayilo isi Umukasya, nashiryo mushilye nga bitweela khu biilyo bikhosefu.

²¹“Ne n'iiba bari shishaayo isho shilikho buuleme bwoosi, namwe shaalemala, namwe shaafwa imoni, mukhashiwaanayo nga isaayilo isi Umukasya Wele weenywe ta.

²²Munyala mwaashikhoonyela ingo weenywe mwaashilya, shaaba busa nga babaalya inyama iy'ekhisi, namwe khaasolo khoosi kheesi mwirire khukhwaama mwiiswa.

²³Ne shonyene indi, mukhalya kamalasile kaasho ta; muli ni khuukatsukha aasi, nga babaatsukha kameetsi.”