Read lumasaaba Kamakaambila 16 Bible Online

Kamakaambila 16 - lumasaaba bible

Kamakaambila 16

¹Musa waalomela babaandu ari, “Mu mweesi kukulaangibwa Abibu, muli ni khuulya kamayiiya ke Khuubirakho, kamayiiya k'Omukasya, Wele weefwe. Khulwekhuuba mu mweesi kwa Abibu, Umukasya Wele weefwe, aakhumusa ifwe khukhwaama mu Misiri, mu shilo.

²Isaayilo iye Khuubirakho ili ni khuuba ikhaafu, namwe lisheese, namwe imbusi, isi muli ni khuuwaanilayo mu shifwo sheesi Umukasya aarobora ari bamwisaayilemo.

³Khu nyama iyo, mukhaliilakho kimikaati kikiilimo kamamela ta. Muli ni khuumala biifukhu musaafu nga mulya kimikaati kikikhalimo kamamela ta, khukhwookesanisa kumutaambo. Khulwekhuuba mwarura mu Misiri mu khaangu. Shino kane shibashebusatsake inywe mu buulamu bweenywe bwoosi, shifukhu sheesi mwaruriramo mu Misiri.

⁴Khuumala biifukhu musaafu, mbaawo uwaamba khu mamela, namwe waakabiikha mu ntsu yeewe ta. Muli ni khuulya inyama iye isaayilo iyo, mukimalewo mu shilo isho; mbaawo khuukibiikhakho khukhwoolisa kumutikhinyi ta.

⁵“Mbaawo khuuwaanilayo isaayilo iye Khuubirakho, mu shiriimba shoosi sheesi munyoolile ta.

⁶Ili ni khuuwaanibwila mu shifwo sheesi Umukasya umweene aarobora, ari bamwisaayilemo. Muli ni khukhwiira shishaayo isho angoloobe nga inyaanga ikwa, khu mbuka isi mwaruriramo mu Misiri.

⁷Muli ni khuukiteekha mukiliile abweene awo, mu shifwo sheesi Umukasya aroboore ari bamwisaayilemo. Kumutikhinyi muli ni khukhwiilayo mu tsiingo tsyeenywe.

⁸Muli ni khuulya kimikaati kikikhalimo kamamela ta, khuumala biifukhu bisesaba. Khu shifukhu she kumusaafu, ili ni khuubawo lubusano lukhosefu, isi Umukasya Wele weefwe. Mbaawo khuukhola buraambi bwoosi khu shifukhu she kumusaafu ta.”

⁹Musa waaloma ari, “Muli ni khuubala tsisaabiiti musaafu, khuurakikhila khu shifukhu sheesi murakikhirakho khuukesa biilimwa byeenywe mu mikuunda.

¹⁰Nio lwanyuma mulye kamayiiya ke Likesa, khulw'Omukasya, Wele weefwe. Abweene awo, muli ni khuuwaanayo, nga buli mutweela ekanisa busa, khuuloondekhana ni byeesi Umukasya Wele weefwe aba waabaweele.

¹¹Inywe mwabeene, atweela ni babaana beenywe, ni baraambi beenywe, muli ni khukhwikhoyela ibweeni w'Omukasya, Wele weefwe. Muli ni khukhwikhoyela atweela ni ba Levi babaali mu biriimba byeenywe, ni bakeni, ni baafuubi, ni banamulekhwa, beesi mumenya ni nabo. Bino bili ni khuuba mu shifwo sheesi Umukasya Wele weefwe umweene aroboore ari bamwisaayilemo.

¹²Muli ni khuushebulila muri inywe mwaba baakulwa mu Misiri; ni nashiryo muli ni khuuloondelela kamakaambila kano.”

¹³Musa waaloma luundi ari, “Nga mwaamalile likesa lye bilimwa byeenywe ni kimizabibu kyeenywe, muli ni khuulya kamayiiya ke kamasari khuumala biifukhu musaafu.

¹⁴Khu mayiiya kano, muli ni khuukalya ni babaana beenywe, ni baraambi beenywe, ni ba Levi, ni bakeni, ni baafuubi, ni banamulekhwa, babaali mu biriimba byeenywe.

¹⁵Muli ni khuulya kamayiiya kano khuumala biifukhu musaafu; nga mukaliila mu shifwo sheesi Umukasya Wele weefwe aroboore. Khulwekhuuba Umukasya Wele weefwe, kane abawe tsikhabi mu byeesi mulima byoosi ni byeesi mukhola, nio akile mube ni kumwikhoyo kumukali.

¹⁶“Basaani bali ni khuutsya mu moni tsy'Omukasya kimiluundi kitaru, buli kumwiiko: Khu Mayiya ke Khuubirakho, Khu Mayiya ke Likesa, ni Khu Mayiya ke kamasari. Mbaawo uwiitsa isi Umukasya mukhono busa ta.

¹⁷Buli mutweela ali ni khuureera biwaanwa, khuuloondekhana ni nebyo byeesi Umukasya, aba waamuweele.

¹⁸“Roborayo baakayi mubare mu buli shiriimba sheesi Umukasya Wele weefwe atsya khubawa inywe. Bali ni khuukaya kimisaango nga beemikha khu bwaŋali.

¹⁹Mbaawo khuufwofwaayisa kumusaango, namwe khukhwikhupila luubeka luutweela ta. Mbaawo khukhwakaanila iwoongo ta, khulwekhuuba iwoongo imaliyisa tsimoni, naluundi yaashuusaŋana byaŋali.

²⁰Loondelela bwaŋali, naluundi bwaŋali bwonyene, nio akile mumenye imbuka ndeeyi khu liloba lyeesi Umukasya Wele weenywe atsya khubawa.

²¹“Mukharawo kusiindi kwoosi kukufwaanana nga ku Ashera kweesi besaayilakho wele umukhasi, aambi ni shisheeso sheesi mutsya khukholela Umukasya Wele weefwe ta.

²²Mukharawo libaale muri likhosefu lye khukhwisaaya ta, khulwekhuuba Umukasya Wele weefwe s'akana isho ta.”