Read lumasaaba Kamakaambila 17 Bible Online

Kamakaambila 17 - lumasaaba bible

Kamakaambila 17

¹Musa weloosela waaloma ari, “Mukhawaanayo isi Umukasya Wele weefwe, iwuunwa, namwe lisheese liliikho buuleme bwoosi khu mubili kwasho, namwe buubi bwoosi ta. Khulwekhuuba isho shili she kumusilo isi Umukasya Wele weefwe.

²“Umu Isiraeli umukhasi namwe umusaani, umenya atweela ni nanywe mu biriimba byeesi Umukasya abawa inywe, anyala waanyoolikhana nga alikho akhola she bubwoonaki shishifuniaaka indakaano, mu moni tsy'Omukasya, Wele weefwe.

³Anyala khuuba bari waarurire khu makaambila k'Omukasya, waatsiile khukhwisaaya ba wele babaandi, namwe wesaayile inyaanga, namwe kumweesi, namwe tsinieniesi, byeesi Umukasya aabalobela khuukhola.

⁴Nga mwaawuliile bilomo bino byeesi bababooleele, bibiwaamba khu muundu ukholile shishiindu nga isho, muli ni khuunyoowa muweentselesele ilala, bibiwaamba khu shikholwa isho. N'iiba bari shili shaŋali, bari umu Isiraeli waakholile shishiindu nga isho,

⁵muli ni khuumuwaamba, mumuyile khu shilibwa she shiriimba, mumukhupe kamabaale, mumwiire.

⁶Muli ni khukhwiimikha khu bujulisi bwe babaandu babili namwe bataru, nio mukhupe umuundu uyo kamabaale; mukheemikha khu bujulisi bw'omuundu mutweela yenyene ta.

⁷Baajulisi bali ni khuuba nibo babaanyoowa mu khumukhupa kamabaale, nio babaandu babaaramire nabo balooselekho. Nashiryo muli ni khuurusawo shishoonako isho, mu lituuli lyeenywe.”

⁸Musa waaloma luundi ari, “N'iiba bari bareerire mu moni tsyeenywe kumusaango kukuuli kumuhangafu naabi khuukhalawo, oba kuwaamba khu bwiiri, namwe kumusaango kwoosi, ni mukuyile isi Umukasya Wele weenywe akhalewo.

⁹Muli ni khuutsya isi basaayi, nga nibo ba Levi, naluundi isi umukayi uuli khu mulimo imbuka iyo. Muli ni khuubereebakho, babaakhalilewo mu musaango ukwo.

¹⁰Byeesi kane babe baakhalilewo nga bali mu shifwo sheesi Umukasya aroboore, nibyo byeesi muli ni khuutsiilakho. Muli ni khukhwitsiliilisa mubone muri mukhola ibyo ni bibyeene byeesi babalakila.

¹¹Muli ni khuukhola khuuloondekhana ni likaambila lyeesi baabawa ni indeekela isi baabawa inywe. Mukhashuusakho na khafwiiti, ibyo byeesi baabaleekela ta.

¹²Umuundu ulekelesa byeesi umukayi namwe umusaayi aloma, nga weemikhile mu shifwo mweesi Umukasya Wele weefwe aarobora, ali ni khukhwiiribwa. Muli ni khuurusawo shishoonako isho, mu lituuli lye ba Isiraeli.

¹³Babaandu boosi ni kane bawulile shino, kane babe ni khuurya khuukali naabi, balekhe khulekelesa luundi ta.

¹⁴“Nga mwaamalile khukhwiingila khu liloba lyeesi Umukasya Wele weenywe atsya khubawa, naluundi nga mwaamalile khuulimenyamo, munyala mwekoomba muri, ‘Khali nafwe khubeele n'umuyiinga ukhuwula, nga kamanaambo kakaandi ni kali.’

¹⁵Muli ni khuubona muri mwikhasa khu shitsoloŋo she buyiinga umuundu isi Umukasya Wele weefwe umweene aba waaroboore. Ali ni khuuba umu Isiraeli, mukhekhasakho umuundu ukhali umu Isiraeli ta.

¹⁶Shonyene ndi, umuyiinga akhebuusila bibiindu waaba ni tsiŋwaaŋwa tsye khuuraambisa mu busoolo tsingali naabi ta. Khulwekhuuba shino shinakila awaaneyo babaandu khuutsya mu Misiri, ari nio bamuwe tsiŋwaaŋwa. Shikila Umukasya waabalomeele ari, ‘Mukheelayo iyo luundi ta.’

¹⁷Akhayila bakhasi baakali ta. Khulwekhuuba banyala baamukhoongelesa, waalekha khuuba umwiyikinwa isi Umukasya ta. Naluundi akhebuusila buyiindifu buukali naabi ta.

¹⁸“Nga waamalile khukhwikyela umuyiinga, ali ni khukhwironera umweene kamakaambila kano, nga akaamisa khu basaayi, nga bali nibo ba Levi.

¹⁹Ali ni khuuba ni kamakaambila ako, nio anyalise khuukasoma mu buulamu bweewe bwoosi, eyike khukhwisaaya Umukasya Wele weefwe. Naluundi nio anyalise khuuloondelela buulayi bubweene bilomo bye kamakaambila kano n'indeekela yino.

²⁰Akheyila khuuba niye uwe angaaki, waashuusakho kamakaambila ako ta. N'akaloondelela buulayi, kane shimunyalise niye ni lisaaye lyeewe khuuba baawuli ba Isiraeli, khuumala imbuka indeeyi.”