Read lumasaaba Kamakaambila 18 Bible Online

Kamakaambila 18 - lumasaaba bible

Kamakaambila 18

¹Basaayi, nga nibo ba Levi, ni khuyilila atweela shikuuka she ba Levi shoosi, sibalikho ni kumukabo namwe buusikha mu Isiraeli mwoositsana ta. Bali ni khufuna khukhwaama khu saayilo tsyeesi bawaanayo isi Umukasya.

²Nibo sibali ni khuuba ni she buusikha mu Isiraeli ta; khulwekhuuba nga Umukasya umweene n'aloma, niye ali she buusikha bwaabwe.

³Abo babawaanayo isi Umukasya isaayilo iye iwuunwa namwe lisheese, bali ni khuuwa basaayi bino: shikele sh'ebweeni, tsisaya ni byeenda.

⁴Khukhwaama mu likesa lyeenywe, muli ni khuubawa khu byeesi mukyesile, ni khukhwaama khu viini imbya, ni khukhwaama khu bwooya bweesi mubeka khu masheese keenywe.

⁵Khulwekhuuba khukhwaama mu bikuuka bye ba Isiraeli boosi, Umukasya waabarobora nibo khuuba babaakanisi mu lisina lyeewe.

⁶Umu Levi n'aba bari waawuuyile khukhwaama mu shiriimba shishiindi mweesi amenya, ne weetsa mu mwoyo kumulayi khuumenya mu shifwo sheesi Umukasya aba waaroboore,

⁷ali ni khuuba umwakaanisi mu lisina ly'Omukasya, Wele weefwe, nga ba Levi baashe ni bakhola.

⁸Naye ali ni khuufuna kumukabo nga baashe ni bafuna, ikhaba bari waafuna kamapeesa khukhwaama mu khukulisa byeesi aba ni nabyo.

⁹Nga mwengiile khu liloba lyeesi Umukasya Wele weefwe atsya khubawa, mukheyika khuukhola bibiindu biibi byeesi kamanaambo kakaandi kakhola ta.

¹⁰Ikhabawo mus'iinywe umuundu uwaanayo umwaana weewe nga isaayilo ta, namwe waakhola buulosi, namwe buubini ta,

¹¹namwe waalakula, namwe waatsya mu khwireeba khu misaambwa ta.

¹²Umukasya alikho atimisa kamanaambo kakaandi khukhwaama mu liloba ilyo, khulwe bikholwa biibi; nashiryo umuundu yeesi ukhola shishiindu isho, aba waakholile sh'embikho isi Umukasya.

¹³Muli ni khuuba babeyikinwa isi Umukasya.

¹⁴Kamanaambo keesi mukana khutimisa katsye, karaambisa babaalakula ni khukhwireeba khu bisaambwa. Ne inywe, Umukasya Wele weefwe s'abafukiilila mwaakhola isho ta.

¹⁵Umukasya Wele weefwe umweene kane abarobolele umuŋoosi uuli nga ise, khukhwaama mu mwabeene. Muli ni khuurekeeresa byeesi ababoolela.

¹⁶Khulwekhuuba nga mwabuusanila isi Umukasya Wele weefwe aasi e lukiingi Horebu, isyo nisyo sheesi mwaloomba, nga muloma muri, “Ni khuwulila likono ly'Omukasya, Wele weefwe, khunyala khwaafwa.”

¹⁷Umukasya waanomela ari, “Sheesi balomile shili shaŋali.

¹⁸Kane ise imbaroborere umuŋoosi uuli nga iwe khukhwaama mu lituuli lyaabwe lilyeene. Kane ise imuleekele byeesi ali ni khuubaboolela, nio ababoolele buli shishiindu sheesi ise kane imulakile niye.

¹⁹Umuundu yeesi n'alekha khureekelesa byeesi umuŋoosi uyo ababoolela mu lisina lyase, ikhaamuwe shitaambiso.

²⁰Ne umuŋoosi uwikholisa busa ari ali khuukanikha mu lisina lyase, waakanikha byeesi ise ikhamulomeele khuukanikha ta, namwe waakanikha mu lisina lye ba wele babaandi, uyo ali ni khukhwiiribwa.”

²¹Munyala mwereeba muri, “Ne kane khumanye khuryeena, oba buurume bwaamile isi Umukasya, namwe ta?”

²²Singa sheesi umuŋoosi akanikha mu lisina ly'Omukasya shilekha khukholikha, namwe shaaba nga n'ashilomile ta, buurume ubwo buba sibwaamile isi Umukasya ta. Umuŋoosi uyo aba wekholisile busa, mukhenaanayo khu burume ubwo ta.