Read lumasaaba Kamakaambila 22 Bible Online

Kamakaambila 22 - lumasaaba bible

Kamakaambila 22

¹Nga waaboone iwuunwa namwe lisheese ly'owashoowo lilikho litaangataanga busa, uli ni khuukiwaamba ukimuyilile.

²Nga umweene uwe shishaayo isho amenya aleeyi, namwe nga siwaamumanya ta, shiyile ingo woowo, ushiliinde khukhwoolesa n'ashiweentsa. Nga weetsile, muwe atsye ni nasho.

³Ikhaba nga waanyoolile isikilya iy'owashoowo, namwe shikwaaro sheewe, namwe shishiindu shoosi, n'ukhole isaambo niyo indweela. Ukhashilekha busa ta.

⁴Nga isikilya iy'owoosho namwe ikhaafu yeewe yaaremeleele khu ntsila, ukhabira busa ta. Muyeete ukinyuse khu ngaaki.

⁵Umukhasi akhakwaaratsaka bikwaaro bye basaani ta, namwe umusaani naye, akhakwaaratsaka bikwaaro bye bakhasi ta. Khulwekhuuba Umukasya Wele weefwe s'akana shino ta.

⁶Nga waanyoolile shiiswi she khanywiinywi khu kuusaala, namwe aasi busa, namwe aambi ni intsila, ne nga kha maawe khali khu maki, namwe khali ni kamaana, ukhawaamba maawe waasuta ni kamaana ta.

⁷Nga uyila kamaana, lekha kha maawe khatsye, nio byeesi iwe ukhola bikhutsiile buulayi, naluundi nio umenyewo buulamu buleeyi.

⁸Nga woombekha intsu imbya, uli ni khuurakho luweendo khu ndulo. Khulwekhuuba umuundu anyala waahanukha khukhwaama khu ngaaki waakwa, iwe waaba ni kumusaango.

⁹Ukhabyaala bikuuka bibili bye biilimwa mu mukuunda kwe kimizabibu mutweela ta. N'ukhola isho, kimizabibu ni byeesi ubyaalilemo kane bibe bye mbikho.

¹⁰Nga ulimisa kumukuunda, ukhabowa iwuunwa n'isikilya khwikyooki litweela ta.

¹¹Ukhakwaara bikwaaro byeesi batuunga nga batubaasa bubwooya bwe kamasheese ni byeesi baamisa khu bisaala ta.

¹²Khu kaantsu isi ukwaara, uli ni khuurakho buyeeye mu soonda tsyoosi tsine.

¹³“Umusaani n'ayila umukhasi wetubaasa ni naye, ne lwanyuma waaba nga siwamusiimile ta,

¹⁴ne waakendisa lisina lyeewe nga amukanikhakho tsilomo tsiimbi ari, ‘Umukhasi isi ise nayila, sinamunyoola nga ali indungubaasi ta.’

¹⁵“Paapa ni maayi b'omukhaana bali ni khuureera buukakafu khu shilibwa, isi baraangirisi be mu shiriimba, bubwookesanisa buri abe ali indungubaasi.

¹⁶Nio paapawe uw'omukhaana alomele baraangirisi ari, ‘Ise nawa yuno umwaana wase khuuba umukhasi weewe. Ne bona ari, s'amukana ta.

¹⁷Waamwoonakisiile lisina nga aloma ari, Ise sinanyoola umwaana weenywe nga ali indungubaasi ta.’ Abweenewo, basaali beewe bali ni khuubaayuulila ibweeni we baraangirisi be mu shiriimba boosi, shikwaaro shishookesanisa shiri abe ali indungubaasi.

¹⁸Baraangirisi bali ni khuuyila umusaani uyo bamuwe shitaambiso.

¹⁹Bali ni khuumuloma aliyile paapawe uw'omukhaana ikilo ndweela iy'efeetsa, khulwekhuuba umusaani uyo aba waakyeendisile khu mukhaana umu Isiraeli lisina liibi. Ali ni khuurama nga umukhasi weewe; ali ni khuurama ni naye buulamu bweewe bwoosi.

²⁰“Ne siinga shiba shituufu, yaalekha khubawo bujulisi bubwookesanisa buri umukhaana uyo abe ali indungubaasi ta,

²¹bali ni khuumura mulyaango mwe ntsu ya paapaawe, basaani be mu shiriimba bamukhupe kamabaale bamwiire. Khulwekhuuba aba waakholile she kamaŋaanyu mu bakhaana ba Isiraeli, mu khukhola she buyeyani, nga ashiili mu ntsu ya paapaawe. Muli ni khuurusawo kumusaango kuno khukhwaama mu lituuli lyeenywe.

²²“Ni banyoola umusaani nga alikho etubaasa n'umukhasi wo washe, beesi bawaambile boombi bali ni khukhwiiribwa. Muli ni khuurusawo kumusaango kuno khukhwaama mu lituuli lyeenywe.

²³“Umusaani siinga anyoola mu shiriimba umukhaana nga ashiili indungubaasi, ne wetubaasa ni naye,

²⁴muli ni khuubayila boombi khu shilibwa she shiriimba, mubakhupe kamabaale, mubeere. Khulwekhuuba umukhaana s'akuukuulile ta; n'umusaani aba woonakisile umukhasi uw'omuundu ukuundi. Muli ni khuurusawo kumusaango kuno khukhwaama mu lituuli lyeenywe.

²⁵“Ne siinga iba nga umusaani anyoola busa umukhaana mu shifwo shishikhalimo babaandu ta, ne waamuwaamba ni kamaani, umusaani yenyene niye isi muli ni khukhwiira.

²⁶Umukhaana mukhamukholakho shishiindu shoosi ta. Kumusaango ukwo kuli busa nga kw'omuundu uwibwakala weera uwashe.

²⁷Khulwekhuuba umusaani uyo aba anyoola umukhaana uyo nga ali yenyene, abe akhaba nga akhupa liyoombo, abe mbaawo unyala waatima waamuyeeta ta.

²⁸“Umusaani n'akaana indungubaasi, nga mbaawo uwamuselela ta, ne waamuwaamba ni kamaani mu khuuba ni naye, lwanyuma shaamanyikhana,

²⁹ali ni khuuliyila paapaawe w'omukhaana uyo aambi ikilo indweela iy'efeetsa, ali ni khuumuyila abe umukhasi weewe, khulwekhuuba waamwoonakisile. Ali ni khuuba umukhasi weewe buulamu bweewe bwoosi.

³⁰“Umuundu s'anyala wawaamba umukhasi uwa paapaawe waamwikesa umukhasi uweewe ta. Awo aba wengiliile lukoosi lwa paapaawe.”