Read lumasaaba Kamakaambila 23 Bible Online

Kamakaambila 23 - lumasaaba bible

Kamakaambila 23

¹Musa weloosela waaloma ari, “Umusaani yeesi isi baamala khuukhalakho tsimiitso tsye busaani, namwe nga baatsinyalula, s'afukiilisibwa khuuba mu lituuli lye babaandu b'Omukasya ta.

²“Umuundu isi baasaala nga basaali beewe bashiili khuyilana ta, ikhaba be lisaaye lyeewe, khukhwoolesa mu muboolo kukuukhola likhumi, sibafukiilisibwa mu lituuli lye babaandu b'Omukasya ta.

³“Mbaawo umu Amoni, namwe umu Mowabu, uuli ni khukhwiingila mu lituuli lye babaandu b'Omukasya ta. Shili ni khuuba shiryo akhaba khukhwoola khu miboolo likhumi.

⁴Khulwekhuuba ni mwaba nga mwaama i Misiri, sibaabawa byeesi abe mwikoomba ta. Akhali baaloma Balaamu, umwaana uwa Beyori khukhwaama i Aramu, khuubatsuba inywe.

⁵Ne shonyene ndi, Umukasya Wele weenywe waalekha khurekeeresa bya Balaamu ta, waashuusa shitsubo isho shaabekelelamo inywe ikhabi. Khulwekhuuba Umukasya Wele weefwe abakana inywe naabi.

⁶Mu buulamu bweenywe bwoosi, mukhakholatsakakho ni nabo indakaano ta.

⁷“Mukhenyinyibala ba Edomu ta, khulwekhuuba bali baalebe beenywe. Mukhenyinyibala ba Misiri ta, khulwekhuuba mwamenya mu shibala shaabwe nga babeetswa.

⁸Kumuboolo kwaabwe kukuukhola khataru kunyala kwengila mu lituuli lye babaandu b'Omukasya.

⁹“Nga mwirekekha khuutsya khwibwakala baasiku beenywe, mukhewaambilakho mu bye bubwoonaki byoosi ta.

¹⁰Nga mutweela khu basaani be mu kaambi ali ni buulwaale bwe khuurura kameetsi mu shilo, ali ni khuurura mu kaambi atsye amenye ibulafu wayo.

¹¹Ne angoloobe ali ni khukhwisiinga, uli inyaanga ikwa akobole mu kaambi.

¹²“Muli ni khuurawo shiifwo ibulafu we kaambi, isi muli ni khuutsya khukhwiyeetelamo.

¹³Muli ni khuutsya ni lusaala lweesi muli ni khuuyabila lilowo. Lwanyuma lwe khuumala khukhwiyeeta, muli ni khuubibiimbililakho.

¹⁴Muli ni khuumenya nga ikaambi yeenywe ili imiliwu naabi, khulwekhuuba Umukasya Wele weenywe akyeendamo. Nashiryo muli khuubona muri mbaawo shishimukhalasa waabaantsukhila baasiku beenywe ta, ikaambi yeenywe ili ni khuuba ikhosefu.

¹⁵“Nga umukulwa waakhwilukhiile isi iwe, ukhamuwaanayo isi umukoosi weewe ta.

¹⁶Khayo amenye ni nanywe khukhwoolisa nga nakana, mu shiriimba shoosi sheesi arobora. Mukhamumiinikhilisa ta.

¹⁷“Mbaawo umu Isiraeli umusaani namwe umukhasi uuli ni khuukhola kwe buheyani bwe khukhwisaaya ta.

¹⁸Mukhareera muntsu y'Omukasya, Wele weefwe, byeesi basaani namwe bakhasi babaakhola bye buheyani, mu lisaayilo bari ukholelakho shisuubiso ta. Umukasya Wele weefwe s'ashikana ta.

¹⁹“Nga wekopisile wandaayo kamapeesa namwe biilyo, ukhamusaba uri akhuweelekho kamafuurisa ta.

²⁰Babaandu babaandi munyala mwaabarusakho kamafuurisa, ne s'iili khu ba Isiraeli basheenywe ta. Nga mwaloondeleele shino, kane Umukasya Wele weefwe abawe tsikhabi.

²¹“Nga waakholile shisuubiso isi Umukasya Wele weefwe, ukhakaalakaala khuushiwaanayo ta. Khulwekhuuba Umukasya Wele weenywe kane ashikhukanekho, naluundi kane ube ni kumusaango kwe shishoonako.

²²Ne nga siwakholile shisuubiso ta, singane ubekho ni kumusaango ta.

²³Buli sheesi uloma, uli ni khuubona uri ushikhola. Khulwekhuuba iwe wamweene ukhalilewo waakholela Umukasya Wele weefwe shisuubiso nga wiikanisa busa wamweene.

²⁴Nga waatsiile mu mukuunda kw'owasho, unyala waalya kimizabibu kyoosi kyeesi ukana. Ne ukharakho mu shikono waasuta waayila ingo ta.

²⁵Nga waatsiile mu mukuunda kw'owasho, unyala waabutila bikala mu mukhono n'ulya. Ne ukharaambisa kumubano khuukesa ta.”