Read lumasaaba Kamakaambila 25 Bible Online

Kamakaambila 25 - lumasaaba bible

Kamakaambila 25

¹Musa weloosela waaloma ari, “Nga abeelewo khuukhaandisana akari e babaandu babili, bali ni khuutsya mu kooti isi baakayi bakhalewo mu musaango ukwo. Bali ni khuukhalawo naanu isi kufuurire bamuwe shitaambiso.

²Nga isi kufuurire ali ni khuukhupibwa biiboko, umukayi ali ni khuumulakila akone aasi, bamukhupe biboko bibyoolana ni kumusaango kweesi akholile.

³Ne sebamukhupa biboko bibituumisa mu makhumi kane ta. Ni bituuma awo, baba baamumalilemo lukoosi lweewe.”

⁴Nga ulikho uraambisa iwuunwa mu khuuwuula biilyo, ukhakibowa imunwa ta.

⁵Nga iliwo basooleli babaaloondana, mutweela waayila umukhasi, ne waafwa busa nga ashiili khusaala umwaana ta, namulekhwa weewe ali ni khuukhwaalikha khu bandaaye booyo ufwiile. Mulamuwe uwa namulekhwa ali ni khuumwiilakho, asaalile wandaaye babaana.

⁶Umwaana waabwe umusiinde umukiboole, bali ni khuumutwiikha lisina lya paapawe uwafwa, nio balekhe khumwibilila mu Isiraeli ta.

⁷Ne abe noola wandaaye uw'oyo uwafwa s'akana weela khu mulamu weewe ta, namulekhwa ali ni khuutsya khu shilibwa she shiriimba isi baakayi, abalomele ari, “Mulamu wase waalobile khukhuuntsilakho. S'ali khuukana khuusaala ni nase babaana ta.”

⁸Nio lwanyuma baraangirisi be mu shiriimba balaange mulamu weewe bamureebe. Nga waakhaliilewo ilala ari, “Singane imwiilekho ta,”

⁹namulekhwa ali ni khuumwiisyeenda aambi mu moni tsye baraangirisi, amufuule sapatu yeewe indweela, lwanyuma amufuutse kamare mu moni. Amulomele ari, “Shino nisho sheesi bakhola khuuyo ukhakana weela khu mukha wandaaye ta.”

¹⁰Lisaaye ly'omweene uyo mu Isiraeli bakhaalilaange bari Lisaaye ly'oyo Isi Baarusakho sapatu.

¹¹Basaani babili ni baaba nga balikho basoolana, ne umukhasi uwa mutweela khubeene abo, waatsya khuyeeta uyo uwibwakaale umuseetsa weewe, ne waayila kumukhono waawaamba busaani bw'omusiku uyo,

¹²muli ni khuukhalakho kumukhono kw'omukhasi uyo. Mbaawo khuumuwaambila shiisa ta.

¹³Ukhaba ni bipimo bye tsisaambo tsibili mu shikapu shoowo, shitweela shikali shishiindi shikeekhe ta.

¹⁴Ukhaba ni biipimo bye tsisaambo tsibili muntsu mwoowo, nga shitweela shili shikali, shishiindi shikeekhe ta.

¹⁵Nga mukana mumenyewo imbuka indeeyi khu liloba lyeesi Umukasya Wele weenywe atsya khubawa, muli ni khuuba ni bipimo bituufu.

¹⁶Khulwekhuuba Umukasya Wele weefwe s'akana babaandu babaakhola bibiindu nga ibyo ta.

¹⁷Khebulila sheesi ba Ameleki baakhukhola ifwe nga khuli mu lukyeendo khukhwaama i Misiri.

¹⁸Ni mwaba nga mwaaluyile naluundi mwaaweelemo kamaani, baabaloondakho beera abo abe babaasikasyaamila imukoongo. Abe sibalikho ni khuurya Wele ta.

¹⁹Nga Umukasya Wele weefwe waamalile khuubarusakho baasiku boosi babaabebotookheleele khu liloba lyeesi atsya khubawa inywe nga buusikha bweenywe, muli ni khukhwiira be lisaaye lya Ameleki mulimalewo. Mukhebilila khuushikhola ta.