Read lumasaaba Kamakaambila 27 Bible Online

Kamakaambila 27 - lumasaaba bible

Kamakaambila 27

¹Musa atweela ni baraangirisi ba Isiraeli baalakila babaandu bari: “Muli ni khuuloondelela kamakaambila koosi keesi ise imbawa lwe shaleelo.

²Nga mwaakhalisile luluutsi Yorudaani, mwengiile khu liloba lyeesi Umukasya Wele weefwe atsya khubawa inywe, ni murewo kamabaale kamaboofu, mukawakhekho shishiindu shiwaanga.

³Rona khu mabaale ako bilomo byoosi bye kamakaambila kano, nga mwaamalile khuukhalisa, mwengiile khu liloba lyeesi Umukasya Wele weefwe atsya khubawa. Lili liiloba liilayi naabi, nga lyaama biilyo biikali, nga Wele n'asuubisa bakuuka beefwe.

⁴Nga mwaakhalisile luluutsi Yorudaani, rawo kamabaale tsana ako khu Lukiingi Ebali, nga ise n'imbalakiile, mukawakhekho shishiindu shiwaanga.

⁵Ibweene iyo muli ni khukhwombakhilayo Umukasya Wele weefwe shisheeso, nga muraambisa kamabaale. Mukhakuunyakho ni shiibya shoosi ta.

⁶Ni mwombekhele Umukasya Wele weefwe shisheeso, nga muraambisa kamabaale kakaali kamabuufu busa keesi bakhakhupakilemo ta. Lwanyuma muwaanilekho isaayilo intsoshe, isi Umukasya Wele weefwe.

⁷Waanilayo ibweene iyo tsisaayilo tsitsireera lukoosi, mutsilye nga mwikhoyela mu moni tsy'Omukasya, Wele weefwe.

⁸Bilomo byoosi bye kamakaambila k'Omukasya, Wele weefwe, muli ni khuukarona khu mabaale keesi mureerewo.”

⁹Kila Musa atweela ni basaayi, nga nibo babaaba ba Levi, balomela ba Isiraeli bari, “Ba Isiraeli, ari ni musile busa, murekeerese! Ari inywe mwekelile babaandu b'Omukasya, Wele weefwe.

¹⁰Shonyene indi, muli ni khuuloondelela kamakaambila ni biilakilo by'Omukasya, Wele weefwe, byeesi ise ndikho imbawa inywe shaleelo.”

¹¹Khu shifukhu ni shisheene, Musa waalakila babaandu ari,

¹²“Nga mwaakhalisile Luluutsi Yorudaani, babaandu be mu bikuuka bino bali ni khukhwiima khu lukiingi Gerizimu, bawe babaandu tsiikhabi: Simeoni, Levi, Yuda, Isakaari, Yusufu, ni Benyamini.

¹³Ne bikuuka bino, bili ni khukhwiima khu lukiingi Ebali khuukuukuula bitsubo: Rewubeni, Gadi, Asheri, Zebuluni, Dani, ni Nafutali.”

¹⁴Nio lwanyuma ba Levi bakuukuule isi ba Isiraeli boosi ni likono lye angaaki nga baloma bari,

¹⁵“Umuundu yeesi ubuumba shifwaani, shishiindu sheesi Umukasya akhakana ta, waashirawo busa mu shimoonyo, kane atsubibwe. “Nio babaandu boosi beelemo bari, ‘Amiina!’

¹⁶“Umuundu yeesi ukheesamo paapa weewe ni maayi lukoosi ta, kane atsubibwe.” Nio babaandu boosi beelemo bari, “Amiina!”

¹⁷Umuundu yeesi usyeenda kamasiintsi khu lwaakha lwe liiswa ly'owashe, kane atsubibwe. Nio babaandu boosi beelemo bari, “Amiina!”

¹⁸“Umuundu yeesi ukila umubofu waatiima intsila, kane atsubibwe.” Nio babaandu boosi beelemo bari, “Amiina!”

¹⁹“Umuundu yeesi ukhabirisa buulayi babeetswa, baafuubi, ni banamulekhwa, kane atsubibwe.” Nio babaandu boosi beelemo bari, “Amiina!”

²⁰“Uyo yeesi uwaamba umukhasi uwa paapawe waamukhola umukhasi uweewe, kane atsubibwe. Khulwekhuuba aba woonakisile lukoosi lwa paapa weewe.” Nio babaandu boosi beelemo bari, “Amiina!”

²¹“Umuundu yeesi uwaamba shishaayo waashikhola umukhasi, kane atsubibwe.” Nio babaandu boosi beelemo bari, “Amiina!”

²²“Umuundu yeesi uwaamba umukooko weewe, nga ali uwe muunda iya paapawe namwe iya maayi weewe, waamukhola umukhasi, kane atsubibwe.” Nio babaandu boosi beelemo bari, “Amiina!”

²³“Uyo yeesi uwaamba maayi weewe umumasaala waamukhola umukhasi, kane atsubibwe.” Nio babaandu boosi beelemo bari, “Amiina!”

²⁴“Umuundu yeesi uwiira uwashe mu shimoonyo busa, kane atsubibwe.” Nio babaandu boosi beelemo bari, “Amiina!”

²⁵“Umuundu yeesi uwakaanila iwoongo ari nio atsye eere uyo ukhalikho kumusaango ta, kane atsubibwe.” Nio babaandu boosi beelemo bari, “Amiina!”

²⁶“Uyo ukhakane awaambe kamakaambila kano naluundi akaloondelele, kane atsubibwe.” Nio babaandu boosi beelemo bari, “Amiina!”