Read lumasaaba Kamakaambila 28 Bible Online

Kamakaambila 28 - lumasaaba bible

Kamakaambila 28

¹ Musa waalomela babaandu ari, Siinga murekeeresela ilala byeesi Umukasya Wele weefwe aloma, naluundi mwaaloondelela kamakaambila keewe keesi ise imbawa inywe lwe shaleelo, Umukasya Wele weefwe kane abaniinise inywe angaaki khuufuurisakho kamanaambo kakaandi koosi.

²Ni murekeeresa likono ly'Omukasya, Wele weefwe, kane abawe inywe tsikhabi tsino tsyoosi, tsibe khusiinywe.

³Kane mufune tsikhabi mu mikuunda kyeenywe ikhaba ni mu biriimba isi mukholela bye buukusi.

⁴Lisaaye lyeenywe kane lifune tsikhabi, ikhaba ni biilimwa byeene, mukhaakese biikali. Ikhaba bibyaayo byeenywe, tsikhaafu, kamasheese ni tsimbusi, bikhasaale tsinyana tsingali.

⁵Umukasya kane abawe inywe tsikhabi tsye khuuba ni biilimwa biikali ni bye khuulya biikali.

⁶Umukasya kane abawe tsikhabi nga mwinjila luundi nga murura.

⁷Umukasya kane abanyalise inywe khuuwula baasiku babaabebwakala inywe. Ikhaba nga beetsa khuubebwakala inywe nga bali lipupu litweela, ne kane batime nga basalanila tsimaande tsyoosi.

⁸Umukasya kane abawe inywe bye buyiindifu biikali naabi. Naluundi kane abawe inywe tsikhabi mu byeesi mukhola byoosi, ni biilimwa byeenywe bibe biikali naabi, biitsuse birara byeenywe.

⁹Umukasya nga n'amala khaale khuubetsubila inywe, ni muba bari mwaloondeleele kamakaambila keewe, kane inywe mube babaandu beewe ba buraawa.

¹⁰Ni nashiryo, babaandu be khu shibala shoosi kane babone bari inywe muli babaandu b'Omukasya, baryo babarye inywe naabi.

¹¹Umukasya kane abawe inywe buyiindifu bukali naabi nga mwoolile khu liloba lyeesi aaloma khuuwa bakuuka beenywe, mube ni babaana baakali, ni bibyaayo biikali, ni biilimwa biikali.

¹²Khukhwaama mu libiikhilo lyeewe lye buyiindifu liliili mwikulu, Umukasya kane abasiindikhile inywe ifula mu mbuka niyo inyene, naluundi abawe inywe tsikhabi mu buli byeesi inywe mukhola. Mukhaabe ni bye buyiindifu biikali naabi, akile kamanaambo kakaandi keetse khukhwikopa khukhwaama isi inywe.

¹³Ni muba mwaaloondeleele kamakaambila k'Omukasya, Wele weefwe keesi ise ndikho mbawa inywe lwe shaleelo, naluundi mwakawaamba buulayi, kane inywe mube babaanyoowa mu buli shiindu, akhuba babaaseembayo ta.

¹⁴Mukhashuusakho na khafwiiti khari kamakaambila keesi ise ndikho imbawa inywe lwe shaleelo, mwaarakikha khukhwisaaya ba wele babaandi ta.

¹⁵Ne ni mulekha khuurekeeresa naluundi mwaaloondelelela kamakaambila ni biilakilo by'Omukasya, Wele weefwe, byeesi indikho imbawa shaleelo ta, kane bitsubo bino byoosi bibabe khus'inywe.

¹⁶Kane mufune bitsubo mu mikuunda kyeenywe, ikhaba mu biriimba mweesi mukholela bye buukusi byeenywe.

¹⁷Kane mufune shitsubo mulekhe khuba ni biilimwa biikali ta, ni bye khuulya biikali ta.

¹⁸Umukasya kane abawe shitsubo mube ni babaana bakyeekhe, ni biilimwa bikyeekhe. Bibyaayo byeenywe singane bisaale bibalaahe ta.

¹⁹Kane Umukasya akile mukhaasikhe mu buli sheesi mukhola shoosi.

²⁰Kane Umukasya abasiindikhile bitsubo, khuuwuraana, ni khuuweetsekhelela kamaani mu buli byeesi mukhola, khukhwoolisa ni mwoonakisibwa muwewo, khulwe bibyoonako bye khuumwantsukha niye.

²¹Umukasya kane abasiindikhile tsindwaale tsiimbi naabi nga tsiloondekhana busa, tsiboomelekho khukhwoolisa ni muhela muwewo khukhwaama khu liloba lyeesi niye atsya khubawa inywe.

²²Umukasya kane abasiindikhile buulwaale bwe mu makuumba, kamayima, kamabiimba, buukhafu buukali mwibili, siimiyu, ikhuungu ilimo buukhafu buukali naabi, ni siisye syoonakise bilimwa byeenywe mu mikuunda. Bihangafu bino bikhaabebotokhelele khukhwoolisa ni mufwa muwewo.

²³Mwibaanga mu ngaaki mukhoome busa nga shiibya, nga mbaawo ifula iyamamo ta; ni liiloba aasi nalyo lyoome libe busa nga shiibya.

²⁴Mu shifwo she fula, Umukasya akhaabasiindikhile mu shibala sheenywe lifukhuulu, nga lyaama mu ngaaki, khukhwoolisa ni mulifwa muwewo.

²⁵Umukasya kane akile baasiku beenywe babawule inywe mu busoolo. Mwaakhatsya mu busoolo nga muli lipupu litweela, ne baasiku beenywe balibatimisa musalanile tsimaande tsyoosi, nio uri kamanaambo kakaandi ke khu shibala kabona shishibakholikhile khusi inywe, kabe ni khuurya khuukali naabi.

²⁶Nga mwafwiile, binywiinywi bye mwirome ni tsisolo tsye mwirome bikhaalye kimilaambo kyeenywe, ilekhe khubawo n'umuundu na mutweela uubitimisa ta.

²⁷Umukasya akhaabasiindikhile inywe tsindwaale nitsyo ndweela nga tsyeesi aasiindikhila ba Misiri. Akhaabasiindikhile kamakoontsyo, buulwaale bwe lihaafu, ni khukwiyakala kimibili kyoosi. S'ikhaabewo umuundu yeesi unyala waabawonesa tsindwaale itsyo ta.

²⁸Umukasya akhaabasiindikhile buulwaale bwe khuukwa kamalalu, bwe khukhwikela baabofu, naluundi mube bamoyaani busa.

²⁹Abe ikhaba kumuusi mwihangilwe, mukhaabuubuuke busa nga baabofu mu shiilima. Kane mukhayikhane mu buli shiindu sheesi mukhola. Babaandu babaandi busa kane babamiinikhilisatsake naluundi banuule byeesi muli ni nabyo, ilekhe khubawo umuundu yeesi uunyala waabayeeta ta.

³⁰Umusaani aliyila umukhasi, ne umusaani ukuundi aliitsa amukhole khuuba umukhasi uweewe. Umusaani alyoombakha intsu, ne s'alikimenyamo ta. Mulibyaala kimikuunda kye kimizabibu, ne simulimenyawo luukali khukhwoolisa ni mukilyakho ta.

³¹Balikhoonya tsiwunwa tsyeenywe nga mwaaboone, ne simulitsilyakho ta. Baliyila tsisikilya tsyeenywe ni kamaani busa, balekhe khubakobosela ta. Baasiku beenywe baliyila kamasheese keenywe, nga mbaawo ubayeeta inywe khuukakobosa ta.

³²Umukasya aliwaanayo babaana beenywe isi kamanaambo kakaandi nga baakulwa, nga mwabeene mubona. Mbaawo sheesi mukhaanyalise khuukhola khuubakobosa taawe.

³³Babaandu khukhwaama mu linaambo lyeesi mukhaamanyatsakakho ta, baliitsa balye bilimwa byeesi inywe muluyiilekho. Bakhaabamiinilisatsake inywe naluundi bababirise buubi biifukhu byoosi.

³⁴Bibiindu biibi byeesi bakhaabakhole khus'iinywe, bikhaakile bibalaluse inywe kimirwe.

³⁵Umukasya akhaabasiindikhile inywe kamabiimba khu mubili kwoosi, khukhwaamila khu shikhaandakilo, khukhwoolesa khu murwe khu ngaaki. Musa weloosela waaloma ari,

³⁶Umukasya akhaalekhe linaambo lyeesi inywe namwe bakuuka beenywe abe bakhaamanya ta, khuubayila inywe n'umuyiinga isi mukhaabe mwaroboore, mu bubowe. Nga mwoolileyo, kane mwisaaye bifwaani byeesi nibo bayila khuuba nga ba wele baabwe.

³⁷Nga babaandu baaboone bibiibakholikhile khus'iinywe, bakhesindukhe busa, naluundi mubatsake she khuukanikhakho, mwikele busa luukano mu manaambo keesi Umukasya alibasalanisamo.

³⁸Mulimiitsa biilyo biikali mu mikuunda kyeenywe, ne mulikesa bifwiiti biri, khulwekhuuba tsiisike tsikhaalye bilimwa byeenywe.

³⁹Mulibyaala kimizabibu kimikali naabi mu shibala sheenywe, ne semulinywa indali yakyo ta, khulwekhuuba biiwukha bikhaakilye, kikhalikhe busa ni kikwa aasi nga kishiili khuwaangala ta.

⁴⁰Mulibyaala kimi oliva kimikali naabi mu shibala sheenywe, ne simuliraambisakho kamafura kaakyo ta. Khulwekhuuba bibyaamo bilikhalikha busa nga bishiili bibyaana ni bikwa aasi.

⁴¹Mulisaala babaana, ne sibaliba babeenywe ta, khulwekhuuba babaandu babaandi bakhaabarusekho babayile mu bubowe.

⁴²Tsisike tsikhoonakise bisaala byoosi, ni biilimwa byoosi bibiili mu shibala sheenywe.

⁴³Babaandu be kamanaambo kakaandi babaamenya mu shibala sheenywe, bakhekele bayiinda naluundi be kamaani, ne inywe mukhekele bataambi naluundi babaakhali ni kamaani ta.

⁴⁴Babaandu abo baliba bayiinda khuubaminyisa inywe, nga babekopisa ni nanywe bibiindu. Nibo baliba baraangirisi beenywe.

⁴⁵Musa waabalomela ari, ni mulekha khuuloondelela kamakaambila n'indeekela y'Omukasya, Wele weenywe, byeesi ise ndikho imbawa inywe, akhaabasiindikhile inywe bitsubo ibyo byoosi. Bino kane bibabe khusiinywe khukhwoolisa ni muhela muwewo.

⁴⁶Biitsubo bino bikhaabe nga bibyookesanisa ni bukakafu isi inywe mwabeene ni lisaaye lyeenywe, biri Wele alikho abawa inywe shitaambiso.

⁴⁷Khulwekhuuba, abe ikhaba nga Umukasya Wele weefwe abawa inywe bye buyiindifu biikali, ne inywe simwokesanisa kumwikhoyo n'isangaalo mu khumusiima ta.

⁴⁸Nashiryo Umukasya akhaasiindikhe baasiku beenywe babebwaakale, babayile inywe mubaraambire nga baakulwa baabwe. Inywe intsala ni buulesa bilibalya, naluundi mutaambe bikwaaro. Mulimenya mu butaambi. Umukasya alilekha baasiku beenywe bababirise inywe buubi naabi, khukhwoolisa ni mulifwa muwewo.

⁴⁹Umukasya akhaabasiindikhile inywe linaambo khukhwaama aleeyi naabi, libebwakale inywe. Likhaabeekhe khusiinywe libashuule nga ikhosi n'ishuula ingokho. Babaandu bano bakhaabe bakanikha lulimi lweesi inywe mukhatekeela ta.

⁵⁰Lili linaambo lye babaandu baarafu naabi, babaakhali ni shiisa ta, babaakhenaanayo isi babaana bakeekhe namwe babaandu baakhulu ta.

⁵¹Babaandu bano bakhaasute bibyaayo byeenywe, ni biilimwa byeenywe, khukhwoolisa inywe mufwe intsala. Balisuta biilimwa byeenywe, kamafura, iviini, ni bibyaayo byeenywe.

⁵²Bakhaabebwaakale inywe mu biriimba byeenywe, khukhwoolisa kamatikiiyi kamaleeyi keesi inywe mwiyikina mu shibala sheenywe ni kawumbukhaka. Bakhaakhole shino mu biriimba byoosi bibiili mu shibala sheesi Umukasya Wele weefwe atsya khubawa inywe.

⁵³Mu khubebwakala khuno ni kumutaambo kweesi inywe mukhaabemo, mukhoole ni khuulya lisaaye lyeenywe, babaana beenywe babeene, beesi Umukasya Wele weefwe akhaabe waabaweele inywe.

⁵⁴Khulwe baasiku khukhwibwakala biriimba, ikhaba umusaani abe uwibirisa buulayi naluundi isi batsowisa buulayi, kane imbuka yoole alye babaana beewe babeene. Akhaakhole shino khulwekhuuba mbaawo she khuulya ta; nga biilyo byaweelewo. S'akhaawekho ikhaba wandaaye umuloonda umweene, namwe umukhasi weewe umukanwa, namwe khu baana beewe babaaramire, inyama iye babaana beesi alikho alya ta.

⁵⁵

⁵⁶Ikhaba umukhasi abe uwibirisa buulayi naluundi isi baatsowesa buulayi, abe umuyiinda ukhasaambakho busa aasi shikele ta, s'aliwakho umuseetsa weewe umukanwa, namwe babaana beewe,

⁵⁷inyama iy'omwaana yeesi asaalile namwe ingobi ta. Khulwekhuuba nga mbaawo biilyo ta, alibilya mu shimoonyo busa. Shino shiliba khulwe khuubebwakala ni kumutaambo kweesi baasiku beenywe baliboolisakho.

⁵⁸Ni mulekha khuuloondelela ni khukhwitsiliilisa bilomo bibiili mu makaambila kano, kakaaronebwa mu shitabo shino, naluundi ni mulekha khukhwiisa lukoosi mu lisina lye angaaki ly'Omukasya, Wele weefwe,

⁵⁹kane Umukasya aboolise khusiinywe ni lisaaye lyeenywe, kumutaambo kwe isaambo ikiindi busa, kumutaambo kumukali naabi, kukuukhaakama ta, ni tsindwaale tsiimbi naabi, tsitsikhaakama ta.

⁶⁰Naluundi kane Umukasya abasiindikhile tsindwaale tsyeesi inywe mwabona mwarya naabi, tsitsiwaamba ba Misiri. Tsindwaale tsino kane tsibewandikhekho tsiboomelekho.

⁶¹Kane Umukasya abasiindikhile ikhaba tsindwaale ni kimitaambo kyoosi, bibikharonebwa mu shitabo shino ta, khukhwoolisa ni kane muhele muwewo.

⁶²Ikhaba nga mwaba baakali naabi, nga tsinieniesi tsye mu ngaaki, ne mukhaaramewo bafwiiti bari; khulwekhuuba simwaloondelela byeesi Umukasya Wele weefwe ababoolela ta.

⁶³Nga ni shasangaasa Umukasya mu khubakholela inywe bibiindu biilayi, naluundi waakila inywe mwasaala babaana mwabalaaha, ni musaambo niyo ndweela kane shimusangaase niye mu khuboonakisa inywe muhele muwewo. Bakhaabakhuule inywe babaruse mu shibala sheesi Umukasya atsya khubawa inywe.

⁶⁴Nio lwanyuma Umukasya asiindikhe baasiku beenywe babasalanise inywe mu manaambo kakaandi, khukhwaama khu ndulo khwe shibala khukhwoola khu ndulo. Nga mwoolile ibweene iyo, mukhesaaye ba wele beesi babaandu babuumbila busa kamakhono, beesi inywe namwe bakuuka beenywe bashiili khukhwisaayatsakakho ta.

⁶⁵Mu manaambo ako simukhaabekho ni lukoosi ta, nga simulikho ni tsiingo ta, naluundi nga muli ni khuurya, muruseyo kimyoyo, muwemo kamaani.

⁶⁶Mukhaamenye nga mweyembeleele muri kane babaandu abo babeere inywe; nga buli khaseela mweyembelele simumanya oba kane bushe bubanyoole ta.

⁶⁷Kumutishinyi mulome muri, “Abe uri akhaba angoloobe,” uri angoloobe mulome muri, “Abe uri ikhaba kumutishinyi.” Shino shikhaabe khulwe khuurya khuukali ni byeesi mukhaabone bibikhaabariise.

⁶⁸Umukasya akhaabeseyo inywe mu meeri tsye ba Misiri, tsiitsya nga tsiwuutsibwa n'imbewo, khu lukyeendo lweesi Wele abe aasuubisa ari s'akhaabeeseyo luundi ta. Nga mwoolile ibweene iyo, mukhekulise mwabeene isi basiku beenywe nga baakulwa, ne s'ikhabewo uunyala khuubakula ta.