Read lumasaaba Kamakaambila 29 Bible Online

Kamakaambila 29 - lumasaaba bible

Kamakaambila 29

¹Bino nibyo bibiindu bye indakaano isi Umukasya aalakila Musa khuukhola ni ba Isiraeli, nga boolile mu shibala she ba Mowaabu. Yino yaloosela busa khu ndakaano isi abe aamala khaale khuukhola ni nabo nga bali i Horebu.

²Musa walaanga ba Isiraeli boosi kila abalomela ari, “Inywe mwabeene mwabona ni tsimoni tsyeenywe, byeesi Umukasya aamala khaale khuukhola khu ba Misiri, khu Faraawo, khu baandu beewe, ni shibala shaabwe.

³Inywe mwabeene mwabona bibiyaangisa ni bye kamakaanga byeesi Umukasya akhola.

⁴Ne indi ni khukhwoolisa imbuka yino, Umukasya ashiili khubawa inywe kamakhula ke khuumanya, namwe tsimoni tsitsibona, namwe kamaru kakaawulila ta.

⁵Bona Umukasya waabaraangiriire inywe khuubira mu mubiimbi khuumala kimiiko kamakhumi kane, ne bikwaaro byeenywe sibyaatabukhakho ta, namwe bilaalo byeenywe sibyaawelela ta.

⁶Inywe simwaalyakho kumukaati namwe mwaanywakho iviini namwe sye khuunywa shoosi shishiilimo kamamela ta. Ise nakhola shino nio inywe mumanye muri ise ndi Umukasya Wele weenywe.

⁷“Nga ifwe ni khwoola mu shifwo shino, Sihoni umuyiinga uwa Heshiboni, ni Ogo umuyiinga uwa Basani, beetsa bakhwibwakala, ne ifwe khwabawula nibo mu busoolo.

⁸Ifwe khwawaamba liiloba lyaabwe khwaalikabila nga busikha isi shikuuka sha Rewubeni, sha Gadi, ni shisiintsa she shikuuka sha Manase.

⁹Ni nashiryo nga mukana muri nio mube baayinda mu buli shitweela, ni mwitsiliilise mubone muri muloondelela bilomo bibiili mu ndakaano yino.

¹⁰“Bona lwe shaleelo inywe mweesi, baraangirisi be bikuuka, baraangirisi be kamaye ni baawuli, ni babaandu babaaramire mu Isiraeli, mweesi mweemile ano shaleelo.

¹¹Muli atweela ni bakhasi beenywe ni babaana beenywe, ni babeetswa babaamenya atweela ni nanywe, nga basaaka tsiikhu naluundi babatsiila inywe kameetsi.

¹²Mweemikhile ano lwe shaleelo, muri nio mukhole indakaano n'Umukasya Wele weefwe, indakaano isi niye alikho akhola shaleelo. Niye umweene waaloseelekho ni khukhwitsuba nga shookesanisa shiri,

¹³lwe shaleelo inywe muli babaandu beewe. Nio akile niye abe Wele weenywe, nga n'abasuubisa inywe, naluundi nga n'etsubila bakuuka beenywe Iburayimu, Isaaka, ni Yakobo.

¹⁴Umukasya s'alikhukhola indakaano yino nga alooselakho ni khukhwitsuba ni nanywe mwenyene ta,

¹⁵ne ikhaba ni naabo babaakhali ano lwe shaleelo ta, ni naabo babaali ano nga beemikhile mu moni ts'Omukasya, Wele weefwe.

¹⁶“Inywe mwabeene mwamanya nga ni khwamenya mu Misiri, naluundi nga ni khweetsa nga khubirira mu manaambo kakaakhali matweela ta.

¹⁷Mwabona bibiindu bye imbikho byeesi bakhola, nga nimwo mumuuli ba wele be bisaala ni kamabaale beesi baabuumba busa, ni naabo be ifeeza n'izaabu.

¹⁸Muli ni khuushibona muri mbaawo umusaani namwe umukhasi, namwe muungo namwe mu shikuuka, uwantsukha Umukasya Wele weefwe, waatsya wesaaya ba wele be kamanaambo kakaandi taawe. Isho ni shikholikha, iba busa nga kumuli kwe buutwa ni kubatsowela musiinywe.

¹⁹Khulwekhuuba inyala khuubawo mutweela khus'iinywe uwuliile bilomo bino byeesi Umukasya etsubiile mu ndakaano yino, ne uyo weniinisa umweene nga aloma ari, ‘Abe naakhakhola byeesi samweene ingana, mbaawo shishikane shiikholikhekho ta.’ Isho kane shikile babaandu boosi, oba bali baalayi namwe baabi, khuuweebwa shitaambiso.

²⁰Umukasya s'anyala weyakhila umuundu ukhola aryo ta. Akhali ndi Umukasya kane amwokesanise lirima liikali, ni biitsubo bibiili mu shitabo shino kane bimubekho. Naluundi kane Umukasya onakise umuundu uyo amumalewo, atweela ni lisaaye lyeewe.

²¹Khukhwaama mu bikuuka bye ba Isiraeli byoosi, Umukasya kane erungikhe khu muundu uyo yenyene, amwolesekho ingunyi. Shino kane shikholikhe khuuloondekhana ni biitsubo bibyaronebwa mu shitabo shino she Kamakaambila.

²²“Umukasya akhaasiindikhe mu shibala sheenywe ingunyi ni tsindwaale tsitsikhali indweela ta. Lisaaye lyeenywe ni babeetswa babaaliitsa lwanyuma, balibona ingunyi ni tsindwaale byeesi Umukasya amala khuboolisa khus'iinywe.

²³Balibona bari shibala sheenywe shayikela kumubiimbi kumwoomu busa, nga kwetsuule bunoro ni kumuunyu. Mbaawo sheesi banyala babyaalamo ta, namwe shishinyala shaatsowamo ta. Shibala shibe busa nga khulwe lirima liikali, Umukasya n'onakisa Sodoma ni Gomora, Adama ni Zeboyimu.

²⁴Nio shino shikile kamanaambo koosi kereebe kari, ‘Shiina kila Umukasya akholile shishiindu shishifwaana shiri khu linaambo ilyo? Shiina kila okesanisile lirima liikali nga ilyo?’

²⁵“Nio babaandu beelemo nga baloma bari, ‘Khulwekhuuba babaandu abo baafuniaaka indakaano isi Umukasya Wele uwe bakuuka baabwe aakhola ni nabo. Indakaano iyo aakikhola ni nabo mu biseera byeesi aabamusa khukhwaama i Misiri.

²⁶Lwanyuma nibo baatsya baaraambira ba wele babaandi nga babesaaya. Amakiboole abe sibaamanyakho ba wele bano ta, naluundi Umukasya s'abaalakilakho nibo khukhwisaaya ba wele abo ta.

²⁷Ni nashiryo Umukasya waamalila lirima lyeewe lyoosi khu shibala isho, nga abarakho bitsubo bibyaronebwa mu shitabo shino.

²⁸Nashiryo shaakila khulwe lirima ni khuukhalala khuukali, Umukasya waabatitula khukhwaama mu shibala shaabwe, waabatuuma mu shibala shishiindi, ni khukhwoolisa shifukhu she shaleelo.’ ”

²⁹Kila Musa aloma ari, “Iliwo bibiindu bitweela byeesi Umukasya Wele weefwe aabiikha nga bimoonyo. Ne kamakaambila kano keesi Umukasya aamala khuukhurumburira ifwe ni lisaaye lyeefwe, kali kakeefwe khuumala biilo ni biilo. Khuli ni khuuloondelela ibyo byoosi bibiili mu makaambila kano.”