Read lumasaaba Kamakaambila 31 Bible Online

Kamakaambila 31 - lumasaaba bible

Kamakaambila 31

¹Lwanyuma Musa weloosela waalomela ba Isiraeli boosi ari:

²“Bona ise ari indi ni kye buukhulu shitoondo shitweela ni kamakhumi kabili (120), naluundi sisiinyalisa khuubaraangirira inywe ta. Umukasya wanomeele ise ari, ‘Iwe singene ukhalise Yorudaani, wingile mu shibala sheesi intsya khubawa ta.’

³Umukasya Wele weefwe umweene kane akhalise, abenyoowe inywe ibweeni. Kane onakise kamanaambo ako koosi akamalewo, nio akile inywe muyile liloba lyaabwe. Umukasya waalomile ari Yoswa kane abe niye ubaraangirira inywe.

⁴Umukasya waalomile ari, kane onakise babaandu abo bawewo, nga n'onakisa Sihoni ni Ogo, babaaba bayiinga be ba Amori. Abano aaboonakisila atweela ni shibala shaabwe sheene.

⁵Umukasya kane akile inywe mubawaambe nibo. Muli ni khuuboonakisa bawewo, shibe busa nga ise ni nabalakila inywe.

⁶Ni mube be kamaani naluundi banyindaalifu. Mukharya namwe mwabeyembelela ta. Khulwekhuuba Umukasya Wele weenywe ali khuutsya ni nanywe. S'anyala waabaantsukhakho inywe na khafwiiti khari ta.”

⁷Kila Musa alaanga Yoswa khukhwiitsa. Waamuboolela mu moni tsye ba Isiraeli boosi ari, “Uli ni khuuba uwe kamaani, naluundi umunyindaalifu, khulwekhuuba iwe uli ni khuuyila babaandu bano mu shibala sheesi Umukasya aasuubisa bakuuka beefwe ari akhaabawe. Uli ni khuushikhalanisamo, ushibakabananisemo nga buusikha bwaabwe.

⁸Umukasya umweene kane abenyoowe inywe ibweeni, nga ali ni nanywe. Singane abaantsukhekho na khafwiiti khari ta. Ukharya ta, naluundi ukhawetsekhelela kamaani ta.”

⁹Musa waarona Kamakaambila kano, kila akawa lisaaye lye ba Levi ni baraangirisi be ba Isiraeli boosi. Ba Levi abe bali nibo basaayi, naluundi abe nibo babaasuta isaanduuku iye indakaano y'Omukasya.

¹⁰Lwanyuma Musa waabalakila ari, “Buli lwanyuma lwe kimiiko musaafu, nga niyo imbuka iye khukhwiyakhila kamakobi, khu Mayiiya ke kamasari,

¹¹nga ba Isiraeli boosi baatsiile mu moni tsy'Omukasya, Wele weefwe, khuumwisaayila mu shifwo sheesi umweene kane arobore, muli ni khuubasomela Kamakaambila kano nga boosi baarekeeresire.

¹²Muli ni khuubusaasa babaandu boosi, basaani, ni bakhasi, ni babaana beenywe, ikhaba ni be kamanaambo kakaandi babaamenya ni nanywe, boosi bawulile, naluundi beyike khukhwisaaya Umukasya Wele weefwe. Nio banyalise khuuloondelela bilomo bibiili mu makaambila kano.

¹³Naluundi kane shinyalise lisaaye lyeenywe liilishiili khumanya kamakaambila kano ta, khuukawulila ni khuukeyika, nio akile besaaye Umukasya Wele weefwe. Muli ni khuukhola shino imbuka yoosi, khukhwaama nga ni mumenya mu shibala shishiili ingelekha wa Yorudaani, sheesi Umukasya atsya khubawa inywe.”

¹⁴Umukasya waalomela Musa ari, “Bona imbuka ili aambi, iwe ukana khuufwa. Laanga Yoswa, wiitse ni naye mu lisari likhosefu, nio akile ise imuwe niye likatala lye buraambi.” Nashiryo Musa ni Yoswa baatsya isi Umukasya, mu lisari likhosefu.

¹⁵Lwanyuma Umukasya weekha aasi nga ali nga kusiindi kwe lifuumbi, wemikha imulyaango kwe lisari likhosefu. Lifuumbi lyemikha imulyaango we iweema.

¹⁶Kila Umukasya alomela Musa ari, “Bona iwe uli aambi ukana khufwa, nga bakuuka boowo ni bamala khaale khuufwa. Nio lwanyuma babaandu bano bakhaantsikaane ise, batsye besaaye ba wele be babaandu babaali mu shibala sheesi bali khutsyamo. Bakhaanyantsukhe ise, baantsukhe n'indakaano isi ise nakhola ni nabo.

¹⁷Nio akile khu shifukhu isho lirima limaambe, imbaantsukhe, naakamise khuubayeeta. Shino shibareerere khukhwoonakisibwa, naluundi kimitaambo kimikali kibebwakale. Abweene awo bashifuumbule bonyene bari, ifwe kimitaambo kino kilikho kikhwoolakho khulwekhuuba khwaayantsukha Wele; s'aali ni nafwe ta.

¹⁸Mu ŋali, khu shifukhu isho, ise ikhaakamise khuubayeeta, khulwe bibyoonako byeesi baliiba bakholile, bye khuutsya khukhwisaaya ba wele babaandi.

¹⁹“Nashiryo, ari rona kumweenya kuno, utsye ukuleekele ba Isiraeli boosi khuukweemba. Buli mutweela khu nibo, ali ni khuukuwaambila busa mu murwe. Nio akile kumweenya kuno kube nga bujulisi bwase, ni baba nga sibaloondeleele byeesi ise noma ta.

²⁰Khulwekhuuba nga ise naabayilile nibo naaboolisile khu liloba liilayi naabi lilyaama biilyo biikali, lyeesi nalomela bakuuka baabwe, ne lwanyuma lwe khuufuna buyiindifu, bakhanyantsukhe ise, baantsukhe n'indakaano isi ise namala khuukhola ni nabo, batsye besaaye ba wele babaandi.

²¹Nio lwanyuma uri bihangafu biikali ni kumutaambo biboolakho, kumweenya kuno kukhaabe bujulisi bubuubawolelesa nibo. Khulwekhuuba buli mutweela akhaabe waakhuwaambila mu murwe. Ise naamanyile khaale tsimbomelo tsyeesi balikho bakhola, ikhaba nga ise ishiili khubayila mu shibala sheesi namala khaale khuubasuubisa ta.

²²Ni nashiryo, khu shifukhu sheene isho, Musa waarona kumweenya kuno, waaleekela ba Isiraeli boosi khukhweemba.”

²³Lwanyuma Umukasya waawa Yoswa, umusoleeli uwa Nuni, likatala lye buuraambi nga amulomela ari, “Ba munyindaalifu naluundi ukharya ta. Khulwekhuuba uli ni khuuraangirira ba Isiraeli ubayile uboolise mu shibala sheesi ise nabasuubisa ndi ikhaabawe nibo. Samweene kane imbewo ni nawe.”

²⁴Nga Musa waamalile khuurona bilomo bye kamakaambila kano, khukhwaama ikhunanikha khukhwoolisa ikhumaliilisa, mu shitabo,

²⁵umweene waalakila ba Levi, nga abe nibo babaasuta isanduuku iye ndakaano y'Omukasya, nga aloma ari,

²⁶“Ni muyile shiitabo shino she kamakaambila, mushire andulo e sanduuku iye ndakaano y'Omukasya, Wele weefwe. Kane ibewo nga bujulisi bwase khus'inywe.

²⁷Khulwekhuuba ise naamanya ndi inywe muli bamiinyi naluundi be kimirwe kimiboofu. Bona ikhaba nga samweene ishiliwo umulamu, inywe muminyaalila Umukasya, ne kane muminyisekho awo bumiinyi nga ise naamalile khaale khuufwa.

²⁸Nashiryo ni mumbusaasile baraangirisi be bikuuka byeenywe boosi, ni baawuli, nio inganikhe biilomo bino nga babeene baawuliile. Naluundi likulu ni shibala kane bibe bajulisi baase khus'inywe.

²⁹Khulwekhuuba ise naamanyile ndi lwanyuma lwe khuufwa khwase, kane mwibirise buubi, mwaantsukhe bibiindu byeesi ise nabaleekela nywe. Mu biifukhu bibiili khukhwiitsa mu moni, bihangafu bikhaabakwekho, khulwekhuuba mukhaakhole bye bubwoonaki mu moni tsy'Omukasya. Byeesi inywe mukhaakhole, bikhaakile Umukasya lirima limuwaambe.”

³⁰Lwanyuma nga ba Isiraeli boosi balikho barekeeresa, Musa waababiriramo mu bilomo bye kumweenya kwoosi, khukhwoolisa ni kwawayo.