Read lumasaaba Kamakaambila 32 Bible Online

Kamakaambila 32 - lumasaaba bible

Kamakaambila 32

¹Iwe likulu n'urekeerese, nga ise ndikho inganikha; iwe shibala, wulila bilomo bibyaama mukhanwa mwase.

²Ba Isiraeli, kane ise imbe umuleekeli weenywe. Kane inganikhe bilomo byase mumbola busa nga ifula n'ilakala, nga n'ilakala khu bilimwa bibyaanakhe, namwe nga liime khu bunyaasi.

³Khulwekhuuba ise kane ingukuule lisina ly'Omukasya, Buli mutweela n'aruuye shiriifwa sha Wele weefwe.

⁴Wele ali niye ukhutseeta ifwe, akhola bibiindu biilayi naabi; byeesi niye akhola busheele bili bya ŋali. Ali Wele isi ifwe khwiyikina, naluundi s'aalikho shishoonako ta; ali umulayi naabi.

⁵Ne bona inywe mwaayoonaka mu moni tsy'Omukasya, ni khulwe bibyoonako byeenywe, inywe simushiili babaana beewe ta; inywe muli babaandu baboonaki naluundi be bubeeyi.

⁶Inywe mumuuli basilu naluundi babaakhalimo kamakesi ta, iyo niyo isaambo isi muliyilamo Umukasya? S'aali niye uwababuumba inywe, waabara mu shibala muno ta? S'aali niye uwaakila inywe mwekela linaambo ta?

⁷Yambaasa khu byakholikha khaale, shebulila kimiboolo kimitaayi; reeba bakuuka beenywe, babokese; reeba babaandu baakhulu kane bababoolele.

⁸Nga Wele, uuli angaaki e ba wele boosi, n'akabila kamanaambo liiloba lye khuumenyamo, nga n'akabananisamo babaandu, nga n'areerawo buli babaandu lulwaakha, aashikhola khuuloondekhana n'isi babaandu beewe abe batsya khumenya.

⁹Ne Umukasya umweene, niye uuli Wele uwe ba Isiraeli, nga nibo lisaaye lya Yakobo.

¹⁰Ba Isiraeli, inywe Umukasya aabanyoola nga muli mu mubiimbi, kumwoomu busa nga kulimo imbewo iwuutsa ni kamaani, waabatseeta nga abawa byeesi mwekoomba, wabeyembelela nga uwiyembelela imoni yeewe.

¹¹Umukasya waaba busa nga ikhosi n'ileekela kamaana kaayo khuupuruurukha, nga yeerekekhile khukhwiwuta aasi ikakaame nga ikawaambila mu ndaaha tsayo.

¹²Ba Isiraeli, Umukasya niye umweene uwabaraangirira inywe, nga mbaawo wele ukuundi umuyeetakho ta.

¹³Umukasya niye uwaakila inywe mwawaamba shibala she Kanaani. Niye waakila inywe mwaalya biilimwa bye mu shibala isho. Waabanyalisa inywe khuulya bubuushi bwe ntsushi khukhwaama mu mabaale, ni khuulya khu mafura khukhwaama khu mi olivu abe kikyatsowa khu mabaale.

¹⁴Umukasya waabaliinda inywe nga abawa kamabeele kamabowu, ni ke tsimbusi. Waabawa inywe tsinyama tsinulu khuulya, waabaliisa iŋaano inose naabi ni iviini ifuura buulayi.

¹⁵Ne inywe babaandu b'Omukasya mweekela baanefu, muryo mwaamuminyaalila. Mwaanera, mwaafuna buyiindifu, mwaantsukha Wele uwababuumba inywe, uyo uwaba umuwonesi weenywe.

¹⁶Khulwe khukhwisaaya bifwaani ni ba wele babaandi, inywe mwaakila lirima ni libuba byawaamba Wele.

¹⁷Mwawaanayo tsisaayilo isi bisaambwa bibikhali wele ta mu shifwo she khuuwaanayo isi Wele. Bano baaba abe ba wele beesi inywe nio mwaama khufuumbula, bano abe beesi bakuuka beenywe bakhesaayatsakho ta.

¹⁸Inywe mwebilila Wele, uyo uwababuumba, mwebilila umutseeti weenywe, uwabasaala inywe.

¹⁹Inywe abe muli babaana b'Omukasya, ne n'abona sheesi inywe mwakhola, niye waabekaana inywe.

²⁰Kila Umukasya aloma ari, “Inywe simuli babaandu babeyikinwa ta, ise siinyala naabeyikina ta.” Nashiryo ise singene niloosele khuubayeeta inywe ta. Akhali kane niime indoleelele busa, imbone shishinabakholikha khus'iinywe.

²¹Inywe mwesaaya bifwaani bye ba wele, mwaakila libuba lyamaamba, naluundi naakhalala naabi. Nashiryo, kane nase imbasiindikhile babaandu babaali be aasi naluundi baasilu, akile nanywe libuba ni lirima bibawaambe.

²²Baandu baase, kane ise imbokesanise lirima liliili nga kumulilo, nio likile inywe mwiikhe muumbo wa naleme, imakoombe isi babaafwa bamenya. Kane lirima lyase lyooshe kimikuunda kyeenywe, ni khukhwoolisila ilala mwisina mwe tsingiingi.

²³Kane ise imbasiindikhile inywe kimitaambo, kitsye nga kiloondekhana busa, kifwaane busa nga buyiingo ni bubawuna.

²⁴Intsala ikhaabewunemo, ni tsiifu tsiimbi naabi tsibebwakale. Ikhaba tsindemu tsye butsiba buubi naabi, ni tsisolo tsindafu naabi, bikhaabebwaakale.

²⁵Basoleeli ni bakhaana babaashili khukhwaalikha ta, ikhaba babaana babaashinuuna ni babaandu baakhulu, boosi bakhaabeerire abulafu busa ni lurima, naluundi muungo tsyeenywe kamariisyo kabawaambe.

²⁶Khali ise naakhalawo imbasalanisa mu shibala she aleeyi, nio ilekha khubawo umuundu khu shibala shoosi ubashebulila ta.

²⁷Ne narya indi baasiku beenywe, kane bebuyile bibikhalimo ta, nga bambaasa bari nibo baabawulile inywe mu busoolo, nga sibamanya bari Umukasya niye ushikholile ta.

²⁸Musa weloosela waaloma ari, Khulwekhuuba ba Isiraeli sibali ni kamakhula ta, sibambaasa buulayi ta.

²⁹Baba babaali ni kamakesi, khali batekeelile shino, namwe khali baamanyile shishiitsya khubakholikhakho.

³⁰Ne abe busa shaama shiryeena, umusiku mutweela khuutimisa basilikhale ba Isiraeli shikana shitweela (1,000), namwe baasiku babili khutimisa basilikhale ba Isiraeli bikana bibili (2,000)? Shino shanyalikha khulwekhuuba abe Umukasya, umutseeti waabwe, wabaantsukhiile baasiku.

³¹Khulwekhuuba, ni baasiku beefwe babeene baashimanya bari, ba wele baabwe babaliinda nibo, sibali ni kamaani nga Wele, umutseeti weefwe ta.

³²Khulwekhuuba nabo abe bali busa nga babaandu be mu Sodomu ni Gomora[2]. Bali busa nga kimizabibu kikyaama bibyaamo bibikhalimo kumukaso ta, nga byaluluwa naluundi bye butsiba.

³³Bali busa nga indali isi basuura mu butsiba bwe indemu, nga butsiba bw'endemu ikhilakhima.

³⁴Ne ise Umukasya, naamala khaale khuurona kumunyele kwe bibyoonako byaabwe, naakura mu libiikhilo lyase.

³⁵Khulwekhuuba imbuka isi ise ingana khukhwilihaasilamo naluundi imbawe nibo shitaambiso, ili aambi. Imbuka ilyoola, mubafuure nibo mu busoolo, nio abweene awo ingunyi ibawaambe.

³⁶Umukasya akhaakhalewo ari babaandu beewe sibali ni kumusaango ta, naluundi awaambile babaakaanisi beewe shiisa, nga waaboone ari kamaani kaabwe kaabaweelemo, ari mbaawo umulekhuule namwe umubowe, babaaramirewo ta.

³⁷Lwanyuma Umukasya areeba ari, Ba wele baabwe abe beesi beyikina, abe babaabatseeta, bali waheena?

³⁸Ba wele beesi inywe mwawaanayo iviini, naluundi mwabawayo tsisaayilo, bali waheena? Shiina kila ba wele abo bakhabayeeta ari, namwe babatseeta inywe?

³⁹Inywe simubona muri, ise senyene niye Wele uliwo, naluundi mbaawo ba wele babaandi ta? Ise niye ukaba buulamu, naluundi ise niye urusawo buulamu bw'omuundu. Ise nabawa shitaambiso she khuubonabona. Ne bona ari ise ingana khubawonesa inywe, mbaawo shishinyala shantsakamisa ise ta.

⁴⁰Ari ise imbetsubila inywe nga isuta kamakhono kaase mu ngaaki, indi nga ise n'imenyawo biilo ni biilo,

⁴¹kane nilihaase khu baasiku baase besi nabiyila naabi abo. Ise ikhaawakale luurima lwase, lumulikhe busa nga luheni.

⁴²Kane buyiingo bwase bwisikikhe mu mibili kye baasiku baase bumenye mu bweene; kane inaambise lurima lwase khuutanyaka baasiku baase, lurame nga lwehakhile kamafuki. Ise ikheere bawaambe boosi, imbabekekho litsuune lyaabwe lileeyi ilyo.

⁴³Musa weloosela waaloma ari, “Babaandu be kamanaambo mweesi, ni mubuyile babaandu beewe. Nga beerire babaandu beewe, niye eliyaasa, naluundi awa baasiku beewe shitaambiso. Apyeluusa shibala she babaandu beewe, waashirusakho bibyoonako.”

⁴⁴Lwanyuma Musa ni Yoswa, umusoleeli uwa Nuni, baatsya baakanikhila biilomo bye kumweenya ukwo, mu moni tsye babaandu boosi.

⁴⁵Nga Musa waamalile khukanikhila ba Isiraeli boosi bilomo bye kumweenya kuno,

⁴⁶waabalooselakho ari, “Busheele muli ni khuuwaambila kumweenya kuno mu myooyo kyeenywe, nio akile muleekele babaana beenywe. Shino shibanyalise nibo mu khwitsiliilisa nga baloondelela kamakaambila kano.

⁴⁷Khulwekhuuba kamakaambila kano sikali biilomo busa ta, ne akhali niko kakaabawa inywe buulamu. Ni nashiryo, niko kakaakhaakile inywe mumenyewo imbuka indeeyi khu liloba lyeesi mutsya khwingilamo, nga mwaakhalisile Yorudaani.”

⁴⁸Kila khu shifukhu isho, Umukasya aalomela Musa ari,

⁴⁹“Tsya khu ngiingi tsitsilaangibwa Abarimu, uniine khu lulaangibwa luri Nebo, luluuli mu shibala she ba Mowabu, khu luwaande lululoleleele Yeriko. Kane ubone shibala she Kanani, sheesi intsya khuwa ba Isiraeli, shibe shishaabwe.

⁵⁰Kane ufwiile khu lukiingi lweene ulwo, bakhusiikhe ni khubweene, ube busa nga yaaya woowo Aroni, ni afwa bamusiikha khu lukiingi Hori.

⁵¹Khulwekhuuba iwe ni Aroni, nga muli ni babaandu khu sebele iye Meriba, aambi ni Kadesi mu mubiimbi kwe i Zini, inywe simwookesanisa bubwiyikinwa ta. Nga ni mwaba ni babaandu, simwaantsisamo ise shiriifwa, abe shishintsakhila ise nga Wele ta.

⁵²Ni nashiryo, kane ubone liiloba lyeesi ise intsya khuwa ba Isiraeli, ne iwe singane ulitsyemo ta.”