Read lumasaaba Kamakaambila 34 Bible Online

Kamakaambila 34 - lumasaaba bible

Kamakaambila 34

¹Lwanyuma Musa waama mu shisiintsa shishilaangibwa shiri Mowabu, waaniina khu lukiingi Nebo, khu lukulu khukhulaangibwa khuri Pisiga. Luno nga lwaloleelela Yeriko. Nga ali ibweene iyo, Umukasya waamwokesa shibala, khukhwaama i Gileyadi khuutsya khukhwoola i Dani.

²Wokesa Musa liloba abe lyeesi atsya khuwa bikuuka bino: sha Nafutali, Efurayimu, Manase, ni Yuda, nga lino ibukwanyaanga litsya lyoolela ilala khu nyaantsa Meditereniani.

³Umukasya weloosela waamwokesa liloba liliili imwaalo, khukhwaamila mu litila aambi ni shiriimba Yeriko, shishimanyikhaane nga Shiriimba she Kimisaala Kimisheendu, khukhwiikha khukhwoolisa ilala khu shiriimba she Zowari.

⁴Kila Umukasya amulomela ari, “Musa, ise ni neetsubila bakuuka boowo, Iburayimu, Isaaka, ni Yakobo, indi ikhaawe lisaaye lyaabwe liloba, naba indi khuukanikha khu liloba ilyo. Naakhufukiilisile iwe khuulibonakho busa, ne iwe singane ukhalise ulitsyemo ta.”

⁵Ni nashiryo, Musa umwakaanisi w'Omukasya, waafwiila awo mu Mowabu, khuuloondekhana ni sheesi Umukasya abe aaloma.

⁶Umukasya waasiikha Musa mu litila aambi ni shiriimba she Besi Pewori. Ne ni khukhwoolisa shaleelo shino, mbaawo umuundu uwamanyakho shiifwo shisheene ta.

⁷Musa aafwa nga abe oolisa kye buukhulu shitoondo shitweela ni kamakhumi kabili (120). Abe tsimoni tsyeewe tsibona buulayi, naluundi abe ashiili ni kamaani.

⁸Ba Isiraeli baamenya khu musaalela kwa Mowabu, nga bashiililila Musa, khuumala biifukhu kamakhumi kataru. Yino yaba isaambo yeewe iye khuulila babaandu baakhulu nga baafwiile.

⁹Nga Musa ashiili khuufwa ta, waara kamakhono keewe khu Yoswa, waamurobora khuuba niye khuuba umwiilila mu bikele. Umukasya abe waawa Yoswa kamakhula, nashiryo ba Isiraeli baloondelelatsaka byeesi abe aloma, naluundi baloondelelaatsaka kamakaambila keesi Umukasya abe aawa Musa.

¹⁰Mu Isiraeli simwabaatsakamo umuŋoosi ukuundi nga abe Musa ta. Umukasya abe akanikha ni naye nga umuundu n'akanikha n'uwashe.

¹¹Naluundi Umukasya amataayi aamurumana niye khuutsya khuukhola bye kamakaanga mu moni tsy'omuyiinga wa Misiri, ni be linaambo lya Misiri boosi.

¹²Mbaawo ukuundi yeesi uwabaatsakakho ni bunyala bwe khuukhola bibiindu bye kamaani biryo, nga byeesi Musa aakhola buli mutweela waabona ta.