Read lumasaaba Kamakaambila 5 Bible Online

Kamakaambila 5 - lumasaaba bible

Kamakaambila 5

¹Musa walaanga ba Isiraeli boosi baabuusana, kila abalomela ari, “Ba Isiraeli bashaase, ni murekeerese mwiyike, naluundi muloondelele kamakaambila ni indeekela, byeesi ise ndikho imbaboolela inywe khu shifukhu she shaleelo.

²Umukasya Wele isi ifwe khwisaaya, aakhola ni nafwe indakaano nga khuli khu lukiingi Horebu.

³Indakaano iyo s'akikhola ni bakuuka beefwe bonyene ta, ne ikhaba ni nafwe khukhuuli ano lwe shaleelo.

⁴Umukasya umweene aabakanikhayo, nga ali mu mulilo khu lukiingi.

⁵Ne kumulilo kwaabariisa inywe, mwaalekha khuuniina khu lukiingi khu ngaaki ta, nashiryo ise nakanikha n'Umukasya mu lisina lyeenywe, nio ise naababoolela inywe byeesi niye aaloma. Aaloma ari:

⁶‘Ise ndi niye Umukasya Wele weenywe, uwabarusa inywe mu Misiri, abe isi mumenya mu bukulwa.

⁷Mukhesaayatsaka ba wele babaandi ta, akhali ise senyene.

⁸Mukhabuumbayo shishiindu shoosi, shishifwaana nga isho shoosi shishiili mwikulu mu ngaaki, namwe aasi khu shibala, namwe mu meetsi aasi,

⁹mwaafukhamila aasi mwaashisaaya ta. Khulwekhuuba ise Umukasya Wele weenywe, indi uwe libuba, singana mwesaaya ba wele babaandi ta. Nga mwaantsikaanile ise mwaatsiile khukhwisaaya bifwaani, kane imbe tsiingo tsyeenywe shitaambiso, ni khukhwoola khu muboolo kukuukhola khataru, ni kukuukhola khane.

¹⁰Ne abo babaangana ise, naluundi baaloondelela kamakaambila kaase, ise imbookesanisa khuukana khukhuukhakama ta, khuumala kimiboolo ni kimiboolo.

¹¹Mukharaambisatsaka lisina ly'Omukasya Wele weenywe, mu biindu bibikhalimo ta. Khulwekhuuba umuundu ukhola aryo, ise Umukasya, kane imuwe niye shitaambiso.

¹²“‘Muli ni khukhwitsiliilisa mubone muri muyila shifukhu sha Sabato, nga shifukhu shikhosefu, nga ise Umukasya ni namala khuubalakila inywe.

¹³Muli ni khuukhola buraambi bweenywe mu biifukhu bisesaba.

¹⁴Ne shifukhu she kumusaafu shili she khuuwola, shishiili ni khuuweebwayo buraawa isi Umukasya Wele weenywe. Mbaawo ukhola buraambi bwoosi khu shifukhu isho ta, oba iwe wanweene, namwe babaana boowo besiinde ni bakhaana, namwe baakulwa boowo be seetsa ni bekhasi, namwe tsikhaafu tsyoowo, namwe tsisikilya tsyoowo, namwe umukeendaani umenya ni nawe ta. Shino shikhunyalisa iwe wamweene khuuwolamo, ikhaba ni baakulwa boowo, besaani ni bekhasi.

¹⁵Shifukhu shino she khuuwola kane shibashebuse inywe shiri, mwamiinikhilisibwa mu khuraamba nga muli i Misiri, naluundi muri ise Umukasya Wele weenywe naraambisa kamaani kamakali naabi, khuubarusa inywe ibweene iyo. Shino nisho shishikila, ise Wele weenywe indakila indi muli ni khukhwitsililisa mubone muri muwolakho khu shifukhu sha Sabato.

¹⁶“‘Paapa woowo ni maayi woowo, ubeesatsakamo lukoosi, naluundi ubawulile, nga ise Umukasya ni namala khaale khuubalakila. Shino kane shibanyalise inywe ni lisaaye lyeenywe khuumenya imbuka indeeyi, khu liloba lyeesi Umukasya Wele atsya khubawa inywe.

¹⁷“‘Mukheera umuundu yeesi ta.

¹⁸“‘Mukhayeyana ta.

¹⁹“‘Mukheeba ta.

²⁰“‘Mukhawatsakayo bujulisi bwe bubeeyi, khu basheenywe ta.

²¹“‘Mukhekoomba khukhwitubaasa n'umukhasi wabeene ta, mukhekoomba khuubukula intsu y'owasheenywe, namwe liloba lyeewe, namwe umuraambi weewe, umusaani namwe umukhasi, namwe bibyaayo byeewe, namwe tsisikilya tsyeewe, namwe shishiindu sheewe shoosi ta.’”

²²Umukasya aakanikha bibiindu bino ni likono liikali, khukhwaamila mu mulilo ni kamafumbi kamamali, nga ali khu lukiingi, isi abo boosi babaaba baabusaane mwisina mwe lukiingi. Bino bili ni bibyeene byeesi Umukasya aakanikha, lwanyuma waabirona khu mabaale kabili, waakamaambisa ise.

²³Musa weloosela waaloma ari, “Inywe ni mwawulila likono nga lyaamila mu mafuumbi kamamali, nga kumulilo kuli khu lukiingi, baraangirisi be bikuuka ni baraangirisi babaandi, baantsitsayo isi ise,

²⁴kila baloma bari, ‘Umukasya Wele weefwe, waakhwookesanisile ifwe kamaani keewe ni shiriifwa sheewe. Khwaawuliile likono lyeewe khukhwaamila mu mulilo mukari. Khweyikile khuri, khana abe Wele akhakanikha isi umuundu, umuundu uyo anyala weloosela khuuba umulamu.

²⁵Ne ari shiina kila khwisungula khweererera khuufwa? Khulwekhuuba Umukasya n'eloosela khuukanikha ni nafwe, ifwe ni khwiloosela khurekeeresa likono ly'Omukasya Wele weefwe, kane khufwe.

²⁶Khulwekhuuba mbaawo umuundu yeesi, uwawulilakho nga likono lya Wele yenyene uuli umulamu, nga lilikho lyaamila mu mulilo, ne umuundu uyo weloosela khuuba umulamu, nga ifwe ni khuli shaleelo ta.

²⁷Musa, iwe n'utsye aambi ni Wele akanikhe ni nawe, nio nawe wiitse ukhuboolele ifwe byeesi Umukasya alomele. Kane ifwe khuloondelele byeesi Umukasya kane abe waakhulomele ifwe khuukhola.’

²⁸“Umukasya waawulila ibyo byoosi byeesi inywe mwaloma. Kila anomela ise ari, ‘Ise naawuliile byeesi babaandu abo bakanikhile, byeesi bakhuboolele iwe. Buli shitweela bashilomele buulayi.

²⁹Khali busheele babeelatsakile ni bibyambaaso biilayi nga ibyo, bye khukhuuntsisaaya ise ni khuuloondelela byeesi kamakaambila kaase kaloma. Shino shandibanyalisile nibo ni babaana baabwe khuumenya mu bulamu buulayi busheele.’

³⁰Ari tsya ubalomele uri, ‘Ni mwiileyo mu masari keenywe.

³¹Ne iwe kobola wiimikhe ano, ikhuwe kamakaambila koosi ni biilakilo byoosi, ni indeekela yoosi, byeesi utsya khubaleekela nibo. Nio nga boolile khu liloba lyeesi intsya khubawa, babiloondelele.’”

³²Kila Musa akanikha luundi isi ba Isiraeli nga aloma ari, “Muli ni khukhwitsiliilisa mubone muri muloondelela kamakaambila keesi Wele abalakiile khuuloondelela. Mbaawo khuufuniaakakho ikhaba litweela ta.

³³Muli ni khuuloondelela kamakaambila keesi Wele abalakiile, nio munyalise khuumenyatsaka mu bulamu buulayi busheele. Naluundi nio munyalise khuumenya imbuka ingali khu liloba lyeesi Umukasya atsya khubawa inywe.”