Read lumasaaba Kamakaambila 7 Bible Online

Kamakaambila 7 - lumasaaba bible

Kamakaambila 7

¹Musa weloosela waalomela ba Isiraeli ari, “Umukasya Wele weenywe niye utsya khubaraangirira abayile khu liloba lyeesi mutsya khuwaamba mumenyemo. Kamanaambo kano kali musaafu, nga keetsile atweela, kabaminya inywe mu bukali, ni kamaani mu busoolo. Mulimo ba Hiti, ba Girigasi, ba Amori, ba Kanani, ba Perizi, ba Hivi, ni ba Yebusi. Nga ni mwisyeenda aambi ni liloba ilyo, Umukasya kane abatimise nibo baruremo batsye.

²Umukasya Wele weenywe, alikho ara babaandu abo mu makhono keenywe, ari inywe mubafuure nibo mu busoolo. Muli ni khuuboonakisa mubamalewo, akhali khuubokesanisakho shiisa ta. Naluundi mukhakholakho ni nabo indakaano ta.

³Mukhafukiilisa babaana beenywe bakhaana bakhwaalikha khu basoleeli baabwe, namwe basoleeli baabwe baayila babaana beenywe bakhaana ta.

⁴Khulwekhuuba beetsa khuborosa babaana beenywe, waakila besaaya ba wele babaandi, mu shifwo she khukhuuntsisaaya ise. Isho shikila ise naabawaambila inywe lirima, luundi naaboonakisa inywe mu khaangu naabi, naabamalawo.

⁵Nashiryo nga mwaawulile kamanaambo ako mu busoolo, muli ni khuufuniaaka bibyeeso byeesi besaayilakho ba wele baabwe, ni kamabaale keesi besaaya, ni kimisiindi kyeesi besaayilakho Ashera, wele umukhasi. Bino byoosi muli ni khuubituuma mu mulilo, mubyooshe.

⁶Khulwekhuuba inywe muli babaandu baarobore, b'Omukasya, Wele weefwe. Umukasya Wele weefwe, waabarobora nywe khukhwaama mu baandu babaali mu shibala shoosi, khuuba babeewe umweene.

⁷“Umukasya aabarobora inywe khulwe khuukana khweewe. Sishili bari abe inywe babafuura buukali khu shibala ta, ilala abe inywe nibo babaafuura khuuba bakeekhe khu shibala khwoosi.

⁸Ne Umukasya aakhola shino khulwekhuuba abakana inywe, naluundi abe waamala khaale khukhwitsubila bakuuka beenywe ari akhaashikhole. Shino nisho shishakila, Umukasya waaraambisa kamaani ke angaaki khuubawonesa inywe khukhwaama mu bukulwa mu Misiri, abe isi mumenya aasi e khuumiinikhilisibwa khwa Faraawo, umuyiinga uwa Misiri.

⁹Nashiryo muli ni khuushebulila muri, Umukasya Wele weenywe, niye yenyene Wele. Ali umwiyikinwa mu khuuloondelela bye mu ndakaano yeewe naluundi ali ni khuukana khuukali, isi abo babaamukana niye, naluundi nga baloondelela kamakaambila keewe, khuumala kimiboolo ni kimiboolo.

¹⁰Ne abo babaakhamukana ta, Umukasya abawa shitaambiso she khuubahesa baawawo. Umukasya s'ekhwekhweesa mu khwoonakisa uyo umubiiyila ta, khulwekhuuba amwoonakisa nga umweene abona.

¹¹Ni nashiryo, muli ni khukhwitsiliilisa, mubone muri muloondelela kamakaambila keewe, ni biilakilo byeewe, ni indeekela yeewe, byeesi ise ndikho imbawa inywe shifukhu she shaleelo.”

¹²Musa weloosela waaloma ari, “Ni muloondelela bilakilo bino naluundi mwaakhola nga ni biloma, Umukasya Wele weenywe kane arame umwiyikinwa iwe indakaano, naluundi abe uwe khuukana khuukali isi inywe, nga n'akhola isi bakuuka beenywe.

¹³Nga mwaatsiile khu liloba lyeesi Umukasya aasuubisa khuuwa bakuuka beenywe, kane abakane inywe, abawe tsikhabi, naluundi akile inywe mubalaahe, mumalatane oositsana. Kane abawe inywe tsikhabi munyalise khuusaala babaana baakali, naluundi mube ni biilyo biikali mu mikuunda kyeenywe, ikhaba tsikhaafu tsyeenywe ni kamasheese keenywe, nabyo kane biloosele mu bukali.

¹⁴Inywe mukhaaweebwe tsikhabi khuuminyisa babaandu be kamanaambo koosi. Buli musaani na buli mukhasi akhaabe ni lisaaye, ikhaba bibyaayo byeenywe byoosi nabyo biryo.

¹⁵Umukasya kane abatseete abone ari simufunakho tsindwaale tsyoosi, nga tsyeesi mwabona mu Misiri ta. Ne akhali abo babaamubiyila nibo beesi kane areerere tsindwaale itsyo.”

¹⁶Musa waalooselakho ari, “Muli ni khuuhesa babaandu boosi, beesi Umukasya Wele weenywe atsya khubawaambisa mu makhono keenywe. Mukhabawaambila shiisa ta. Naluundi mukhesaaya ba wele baabwe ta, khulwekhuuba ukwo kane kube busa nga kumureko isi inywe.

¹⁷Munyala mwaaba mwireeba mu myoyo kyeenywe muri, ‘Babaandu be kamanaambo kano bali baakali naabi khuukhuminyisa ifwe, kane khunyale khuryeena khuubatimisa barure mu liloba ilyo?’

¹⁸Ne mukharya ta. Muli ni khuukhebulila sheesi Umukasya Wele weenywe amataayi aakhola khu Faraawo, umuyiinga uwa Misiri.

¹⁹Mwabona tsindwaale tsye kamaani, bibiyaangisa, bye kamakaanga, kamaani k'Omukasya, byeesi Wele aaraambisa nio waakila waabarusa inywe mu Misiri. Nashiryo, babaandu beesi mulikho murya abo, Umukasya atsya khubabirisa musaambo niyo indweela.

²⁰Ni khuuminyisila ilala, Umukasya atsya khukila babaandu abo babe ni khuukhaakhana, khukhwoolisa ni nabo babaarama nga beebisile mus'iinywe, nabo beeribwe.

²¹Mukhabarya nibo ta, khulwekhuuba Umukasya Wele uwe kamaani ni shiriifwa, ali ni nanywe.

²²“Umukasya Wele, kane atsye nga amalawo babaandu bano imbola mbola. Singane mubamalewo kumuluundi mutweela ta, khulwekhuuba babaandu ni bakheendeela naabi, kane tsisolo tsibe tsingali tsibebwakale.

²³Ne Umukasya Wele, kane akile babe ni khuukhaakhana khuukali, mubawaambe naluundi mwoolisile ilala khuubamalawo boosi.

²⁴Kane abanyalise inywe khuuwaamba bayiinga baabwe, mubahese balekhe khubakho ni lisaaye khu shibala ta. Kane mubahese boosi, nga mbaawo ubafuura inywe ta.

²⁵Bibuumbe bye ba wele baabwe muli ni khuubyoosha, nga mbaawo na mutweela khusiinywe uwikoomba ari khali ayilile ifeetsa ni zaabu ibilikho ta. Khulwekhuuba khuukhola muryo, iba imbikho isi Wele, Umukasya weenywe.

²⁶Mukhayilatsaka shishiindu she imbikho muntsu mweenywe ta, khulwekhuuba shibareerera kumusaango atweela ni be muntsu yeenywe boosi. Muli ni khuushitataya, khulwekhuuba shili shishiindu sh'embikho.”