Read lumasaaba Kamakaambila 8 Bible Online

Kamakaambila 8 - lumasaaba bible

Kamakaambila 8

¹Musa weloosela waabalomela ari, “Ba Isiraeli, nga mukana muri nio mutsye muwaambe liiloba lyeesi Umukasya aaloma khuuwa bakuuka beenywe, naluundi muri mumenyemo imbuka indeeyi nga lisaaye lyeenywe libalaaha, muli ni khukhwitsiliilisa, mubone muri muloondelela kamakaambila keesi ise imbawa inywe lwe shaleelo.

²Mukheebilila nga Umukasya Wele n'abaraangirira mu mubiimbi khuumala kimiiko kamakhumi kane ta. Aaba alikho akhakilisa kimyoyo kyeenywe, abone oba nga munyala mwewombeekha, mwaaloondelela kamakaambila keewe, namwe ta.

³Nashiryo, waabalekha intsala yaabalya, waabawa maanu khuulya, bilyo byeesi abe inywe namwe bakuuka beenywe, mushiili khumanyakho ta. Khuubirira mu shino, Umukasya akana abalekele inywe ari, babaandu sibaba balamu khulwe biilyo byonyene ta, akhali mu khuba baalamu, bali ni khuuloondelela buli likaambila lyeesi Umukasya alakila.

⁴“Mu miiko kino kyoosi, bikwaaro byeenywe sibyonuukha ta, namwe bikele byeenywe sibyasiila ta.

⁵Nashiryo, kimyoyo kyeenywe kili ni khuumanya kiri, Umukasya abe alikho abaleekela inywe tsisaambo, nga umusaali n'aleekela umwaana weewe tsisaambo.

⁶Nashiryo, muli ni khuuloondelela kamakaambila keesi Umukasya Wele weenywe aabawa inywe, nga mumwisamo lukoosi, naluundi nga mumwisaaya.

⁷“Khulwekhuuba Umukasya alikho abayila khu liloba liilayi, liliilimo kameetsi kakeekha, ni tsisebele tsitsiili mu matila ni khu bikiingi,

⁸liiloba liilayi, lilyaana biilyo biilayi nga: Iŋaano, seyiri, kimizabibu, kimifiki, buubeya, ni kimizeyituni. Ikhaba bubuushi bwe ntsushi buliyo bukali.

⁹Nga muli mu liloba ilyo, intsala singane ibalyekho ta, kane mube na buli shitweela. Kane muyengule kamabaale kaamwo khukhwaamisamo biibya, ikhaba tsingoongo tsyamwo kane muyabemo byeesi mukholamo biibya.

¹⁰Nga mwaaliile naluundi nga mwekurire, muli ni khuuruuya Umukasya Wele weenywe, khulwe liiloba liilayi lyeesi abawa inywe.”

¹¹Musa waabalomela ari, “Muli ni khukhwitsiliilisa, mubone muri simwibilila Umukasya Wele weenywe ta, nga muloondelela kamakaambila keewe, ni biilakilo byeewe, n'indeekela yeewe, byeesi ise ndikho imbawa inywe lwe shaleelo.

¹²Ne busa ta, kane uri mulya mwikura, mwoombakha tsintsu tsindayi tsye khuumenyamo,

¹³uri tsikhaafu ni kamasheese keenywe biiloosela buukali, ni buyiindifu bweenywe bwiloosela,

¹⁴mwiibilile Umukasya Wele weenywe uwabarusa mu khutaambisibwa mu liloba lye mu Misiri, nga mwiruuya mwabeene.

¹⁵Muli ni khuushebulila muri Umukasya Wele, niye uwabaraangilila inywe waababirisa mu mubiimbi kumubalaayi ukwo, naluundi kukwitsuule bihangafu, nga mulimo tsindemu tsye butsiba buukali ni makhata kikiira babaandu. Yaba mbaamo kameetsi taawe, ne niye waabaraakila lulwaanda, waabafunila inywe kameetsi.

¹⁶Niye uwawa bakuuka beenywe imaanu khuulya, abe isi mushiili khumanyakho ta. Niye aakhola shino nga abakhakilisa inywe, ari nio lwanyuma lwayo, abawe inywe bibiindu biilayi.

¹⁷Nashiryo, muli ni khukhwitsiliilisa, mulekhe khuloma muri, ‘Khwafuna buyiindifu buno khuubirira mu maani keefwe fwabeene,’ ta.

¹⁸Muli ni khuushebulila muri Umukasya Wele weenywe, niye ubawa kamaani, nio waakila mwaafuna buyiindifu bweesi muli ni nabwo. Musaambo yino, kane Umukasya eloosele khuuloondelela indakaano isi aamala khuukhola ni bakuuka beenywe.

¹⁹Lwe shaleelo ise ndikho imbareewula indi, ni mwaantsukha Umukasya Wele weenywe, mwaatsya mwesaaya naluundi mwaakaanisa ba wele babaandi, mukhaahele muwewo.

²⁰Nga simwarekeresire likono ly'Omukasya Wele weenywe, nanywe kane muhele muwewo, nga n'ahesa kamanaambo keesi aasoolanisa.”