Read lumasaaba Kamakaambila 9 Bible Online

Kamakaambila 9 - lumasaaba bible

Kamakaambila 9

¹Musa weloosela waaloma ari, “Ba Isiraeli, ni murekeerese! Bona mukana khukhalisa luluutsi Yorudaani, mwambukhe mutsye muwaambe liloba lye kamanaambo kakaalimo babaandu babaali mu buukali khuubaminyisa inywe, naluundi be kamaani khuubaminyisa inywe. Biriimba byaabwe bili biboofu, naluundi bili ni kamatikiiyi kamaleeyi khuukhwoola mwikulu.

²Batweela khu manaambo kano, bali be lisaaye lya Anaki, nga ni mumanyile naluundi nga ni mwabawulilakho, kili kimisaani kimileeyi naluundi kimiboofu. Mbaawo unyala waafuura kimisaani ikyo mu busoolo ta.

³Nga Umukasya n'amalile aryo khuubasuubisa inywe, niye kane abenyoowe inywe ibweeni, atsye busa nga kumulilo kwe buuyi ni kwoosha buli shishikuli ibweeni wakwo. Kane afuure babaandu abo mu busoolo, naluundi abahese bawewo, nga inywe mushiili khwoola ta. Kane abatimise boosi, barurewo khaangu busa, batsye.

⁴“Nga Umukasya waamalile khuutitula babaandu bano khuutsya nga inywe mushiili khukhwoola ta, mukhakelawo ndi mwebuyila mwabeene, nga muloma muri Umukasya waabareerire inywe khuuwaamba liloba lino khuulimenyemo, khulwe bukhosefu bweenywe ta. Umukasya alikho atimisa kamanaambo ako akhuba khulwe bukhosefu bweenywe ta, ne khulwe bubwoonaaki bwe kamanaambo ako.

⁵Seshili bari khulwe buukhosefu bweenywe, namwe khulwekhuuba bari mwibirisa buulayi, kila Umukasya alikho abawa inywe liloba ilyo, ta. Akhali ndi Umukasya alikho atimisa kamanaambo kano nga inywe mushiili khukhwoola ta, khulwekhuuba kali kamoonaaki, naluundi ali khukhwoolelesa sheesi aasuubisa bakuuka beenywe, Iburayimu, Isaaka, ni Yakobo, ari akhaakhole shino.

⁶“Nashiryo, shimanye muri, Umukasya Wele weenywe alikho abawa liiloba liilayi lino khuuba lilyeenywe, s'iili bari khulwekhuuba muli bakhosefu ta. Inywe muli babaandu baamiinyi.”

⁷Musa weloosela waaloma ari, “Ni mushebulile nga ni mwaba mu mubiimbi, mwaakila Umukasya Wele waabakhalalila inywe naabi. Khukhwaama khu shifukhu sheesi mwaamilamo mu Misiri, ni khukhwoolesa nga ni muli ano, inywe muli babaandu babaaminyaalila Umukasya.

⁸Ikhaba isi mwabeela mwisina mwe lukiingi Horebu, inywe mwakila Umukasya waabakhalila inywe naabi, woolisa ni khukwikoomba khuubahesa, muwewo.

⁹Ise ni naniina khu lukiingi khuutsya khufuna kamabaale, khuufuna kamabaale abe kakaalikho Indakaano isi Umukasya aakhola ni nanywe, namenya khu lukiingi khuumala biifukhu kamakhumi kane. Mu biifukhu ibyo byoosi, ise sinalyakho khakhaandu namwe naanywakho kameetsi ta.

¹⁰Umukasya Wele weenywe waamaambisa ise kamabaale kabili abe khweesi aronirekho bilomo byeesi abe aamala khuubaboolela inywe, khu shifukhu khweesi mwabuusanila, nga n'akanikha ni nanywe khukhwaama khu lukiingi nga ali mu mulilo.

¹¹Lwanyuma lwe biifukhu ni biilo kamakhumi kane, Umukasya waamaambisa ise kamabaale kabili, kamabaale kakaabakho indakaano.

¹²Kila Umukasya anomela ise ari, ‘Musa, yinyukha wiikhe aasi we lukiingi khaangu, khulwekhuuba babaandu beesi iwe wareera khukhwaama i Misiri, baakholile shishiindu shiibi naabi. Khaangukho, baarurire khu byeesi ise nabalakila nibo khuukhola, bekholeleyo shibuumbe she shiibya.’”

¹³“Umukasya weloosela waanomela ari, ‘Ise naatsiile nga nimenielesa babaandu bano, naboone nga bali bamiinyi naabi.

¹⁴Ukhakhakakho khukhuukhaangabisa ise ta, n'undekhe imbahese baweelewo ilala khu shibala. Kane ise imuumbeyo linaambo liliindi nga lili liikali naluundi lye kamaani, liliminyisa babaandu bano, khukhwaama mwiiwe.’

¹⁵Nashiryo ise nenyukha, naarura isi Umukasya neekha aasi, nga naasutile kamabaale kakaalikho indakaano mu makhono kaase koombi. Ne abe kumulilo kushilyeebukha khu lukiingi.

¹⁶Ise ni nenyusa tsimoni naalola, nabona nga mwaakholile shishoonako isi Umukasya Wele weenywe. Abe khaangu busa mwaantsukhile byeesi Umukasya aabalakila inywe khuukhola, mwaaba nga mwebuumbiileyo mwabeene imoosi iye shiibya.

¹⁷Nashiryo, ise nawaamba kamabaale kabili ako, kakaaba mu makhono kaase, naakakhupa aasi, naakaaraaka, nga mweesi mwaaboone.”

¹⁸Nashiryo ise neyalisa aasi, ibweeni w'Omukasya, khuumala biifukhu ni biilo kamakhumi kane, naabaloombela inywe, khulwe shishoonako abe sheesi inywe mukholile. Shishoonako sheesi inywe mwakhola mu moni tsy'Omukasya, shaakila niye wakhalala naabi. Ise sinalyakho khakhaandu, namwe naanywakho kameetsi ta.

¹⁹Nashiryo, ise neyembelela naabi, khulwe lirima liikali lyeesi Umukasya aaba nalyo khulweenywe, nga ali mwirekefu khuubahesa inywe. Ne ndi kumuluundi kuno nakwo, Umukasya waarekeeresa khuuloomba khwase.

²⁰Naluundi Umukasya lirima lyaamuwaamba, nga akana ahese Aroni. Ne mu mbuka iyo, naloombela Aroni naye.

²¹Nashiryo, ise nabukula shibuumbe sh'emoosi sheesi inywe abe mwakhola, naashoosha, naashitsuungaka, naashisya sheekela busa nga buufu. Naatsya naabutsukha mu luutsi lulwiikha khukhwaama mu lukiingi.

²²Ikhaba isi mwabeela i Tabera, i Masa ni Kiborasi Hatava, mwakhola bibiindu bibyakila Umukasya lirima lyaamuwaamba.

²³Nga inywe mwoolile i Kadesi Barineya, Umukasya waabalomela ari, “Ise naabaweele inywe shibala isho, ni mutsye mushiwaambe.” Ne inywe mwaaminyaalila shilakilo sh'Omukasya, Wele weefwe, khulwekhuuba abe simumwiyikina ta.

²⁴Ilala, inywe mwaatsya nga muminyaalila Umukasya, khukhwaama mu mbuka isi niye aabarusiramo inywe i Misiri.

²⁵Nga Umukasya waalomile ari atsya khubahesa inywe muwewo, ise natsya mu moni tsy'Omukasya, neyalisa aasi khuumala biifukhu ni biilo kamakhumi kane nga imbaloombela inywe.

²⁶Ise naloomba isi Umukasya nga inooma ndi, “O Mukasya Wele, ukhahesa babaandu boowo baawawo ta, khulwekhuuba bali nibo lisaaye lyoowo. Iwe wamweene waraambisa kamaani kamakali ni bibiyaangisa, waabarusa mu Misiri.

²⁷Shebulila babaakaanisi boowo, Iburayimu, Isaaka, ni Yakobo, babaaba babeyikinwa. Ukhatsiila khu bumiinyi, namwe khu bwoonaki bwe babaandu bano ta, ne ni wambaase khu bwiyikinwa bwe bakuuka baabwe.

²⁸N'ubahesela ano baawawo, kane ba Misiri balome bari, Umukasya abe aasuubisa khuuwa ba Isiraeli liloba, ne khulwekhuuba abe s'aali ni kamaani kakaamala ta, waakhaasikhana. Abe waababiyila, kila aabayila mu mubiimbi khuutsya khubahesela iyo bawewo.

²⁹Ne Umukasya, bano bali babaandu boowo baarobore, beesi iwe wamweene warusa mu Misiri, nga uraambisa kamaani kamakali ni bibiyaangisa.”