Read lumasaaba Yokana 1 Bible Online

Yokana 1 - lumasaaba bible

Yokana 1

¹Makiboole aabawo Ilomo, n'Ilomo iyo yaba ni Wele, n'Ilomo iyo yaba Wele.

²Khukhwaamila ilala makiboole Ilomo iyo yaba ni Wele.

³Wele aabuumba bibiindu byoosi khuubirira mu Lomo iyo. Mbaawo shishiindu na shitweela shoosi shishabuumbibwa ta akhali khuubirira mu niye.

⁴Buulamu bwaba bwaama mu niye, ni buulamu buno bwaba buwaanga bwe babaandu.

⁵Buwaanga bumulikha ali shishiilima, ni shishiilima shalekha khunyalisa khubusimisa ta.

⁶Aabawo umuundu uweetsa nga arumanibwa khukhwaama isi Wele, nga lisiina lyeewe bari Yokana.

⁷Niye eetsa nga umujulisi, khuwaanayo bujulisi khu buwaanga buno, ari nio akile babaandu boositsana bafukiilile mu Wele nga babirira mu niye.

⁸Niye s'aba buwaanga ta, ne khurusakho ndi eetsa khuwaanayo bujulisi khu buwaanga ubwo.

⁹Ilomo yino niyo iyaba buwaanga bwa ŋali, buwaanga bubweetsa mu shiibala khukhwaburukhila buli mutweela.

¹⁰Ilomo yaba mu shiibala, ni shiibala shabuumbibwa khuubirira mu'lomo nyene. Ne shiibala shalekha khumanya Ilomo yino ta.

¹¹Ilomo yeetsa mu baandu baayo babeene, ne babaandu beewe balekha khumwakaanila ta.

¹²Ne abo babamwakaanila, abo baaba ni khufukiilila mu lisiina lyeewe, abawa bunyala bwe khukhwikyela babaana ba Wele,

¹³nga s'ali bari basaalikha nga babaandu ni basaalikha ta, namwe khulwe khuukana khw'omuundu ta, ne khurusakho ndi khu lwe khuukana khwa Wele.

¹⁴Ilomo yino yekyela umuundu, wekhala akari musiifwe, nga wetsuule bubweela ni bwa ŋali. Ni nafwe khwabona shiriifwa sheewe, shiriifwa nga shili sh'Omwaana natweela yenyene khukhwaama isi Paapawe.

¹⁵Yokana okesanisa bujulisi bubumuwaambakho, nga akuukuulila angaaki ari, “Yuno niye isi ise nalomakho nga ni naloma indi, ‘Uyo ulikhukhwiitsa lwanyuma lwase, aminyisa ise shiriifwa. Lwekhuuba niye anyoowa khubawo nga ise ishiili khubawo ta.’ ”

¹⁶Ni khukhwaama mu bwitsufu bwe bubweela bweewe, ifwe fweesi khwafuna tsikhabi tsya khutweela khutweela.

¹⁷Lwekhuuba Wele arawo kamakaambila nga abirira mu Musa, ne bubweela ni bwa ŋali byeetsa nga bibirira mu Yesu Kristo.

¹⁸Mbaawo umuundu na mutweela uwabonakho Wele ta, akhali Umwaana uwasaalikha mutweela yenyene. Umweene uyo niye uba aambi ni Paapa, uyo niye ukila babaandu bamanya Paapa.

¹⁹Khuno nikhwo khurumbula khwa Yokana, nga Bayudaaya be mu Yerusalemu ni baarumana basaayi ni ba Levi khuureeba Yokana bari, “Iwe naanu?”

²⁰Naye waalekha khwibisa ta, ne waabuula lubuula ari, “Ise s'indi niye Kristo ta.”

²¹Baamureeba luundi bari, “Ne iwe uli naanu? Iwe niye Eliya?” Yokana welamo ari, “Taawe.” Baamureeba luundi bari, “Iwe niye Umuŋoosi?” Welamo luundi ari, “Taawe.”

²²Kila bamureeba bari, “Ne iwe naanu? Lwekhuuba khuli ni khuubakho ni sheesi khuutsya khuboolela abo babaakhurumanile. Wamweene ni wikanikhekho.”

²³Yokana waabaloma ari, “Ise ndi likono ly'oyo ukuukuulila mu mubiimbi, nga Umuŋoosi Yisaaya n'aloma ari ‘Ni mukwalaase intsila yeesi Umukasya kane akyeendelekho.’ ”

²⁴Abo beesi barumana khureeba Yokana baryo, baaba batweela khu Bafarisaayo.

²⁵Baareeba Yokana luundi bari, “Ne noola iwe s'uli Kristo ta, namwe Eliya ta, namwe Umuŋoosi tsana ta, khulwashiina kila ubatisa?”

²⁶Yokana wabeelamo ari, “Ise imbatisa nga niyeetisa kameetsi. Ne mus'iinywe mulimo uyo isi inywe mukhamanyile ta;

²⁷Uyo uuli khukhwiitsa lwanyuma lwase, uyo isiise ikhaakhila ni khukangulula lukhoba lwe bilaalo byeewe ta.”

²⁸Bino byoosi byakholekhela i Besaniya, shishiili nga wambukhile luluutsi Yorudaani, mu shifwo mweesi Yokana aaba nga abatisila babaandu.

²⁹Shifukhu shisheelakho, Yokana n'abona Yesu nga alikho eetsa is'ali waaloma ari, “Bona Khasheese kha Wele, uwinyusawo shishonako she shiibala!

³⁰Yuno niye yeesi ise nakanikhakho, nga ni naloma ndi, ‘Aliwo umuundu uli khukhwiitsa inyuma wase, ne niye afuurakho ise shiriifwa. Lwekhuuba niye aabawo nga ise ishiili khusaalikha ta.’

³¹Akhaba nga ise ni neetsa nga imbatisa ni kameetsi, ndi nio akile ise imurumbule isi babaandu be mu Isiraeli, ise samweene abe sinamumanya ta.”

³²Yokana wekanikhakho nga awandalasa ari, “Nabona Umwoyo ekha nga liwuusi, nga ama mwikulu, wamuwolelakho.

³³Ni nase samweene sinamumanya ta, ne uyo uwanduma khuubatisa nga inaambisa kameetsi waanoma ari, ‘Kane ubone Umwoyo nga eekha ekhale khu muundu uyo. Umweene uyo niye ubatisa nga araambisa Umwoyo Umukhosefu.’

³⁴Ise samweene nashibona, naluundi imandalasa ndi ali Umwaana wa Wele.”

³⁵Khu shifukhu shishelakho, Yokana ndi luundi aba wemikhile ni babili khu baleekelwa beewe.

³⁶Ne n'abona Yesu nga abira wamulolelela, kila aloma ari, “Bona Khasheese kha Wele.”

³⁷Baleekelwa beewe babili bano ni bawulila shino, baloonda khu Yesu.

³⁸Ne Yesu n'eshebukha waabona nga babili bano bamuloondakho, waabareeba ari, “Muweentsa shiina?” Baamukobolamo bari, “Rabbi, umenya waheena?” “Rabbi” shishimanyisa shiri Umuleekeli.

³⁹Yesu waabaloma ari, “Ni mwiitse mwabeene kane muboneyo.” Tsyaba abe tsili tsinyaanga nga liikhumi tsye angoloobe. Baryo batsya ni naye babona esi abe amenya, barama n'ibweene iyo.

⁴⁰Mutweela khuubo babawulila nga Yokana aloma bino, aba Andereya, wandaaye wa Simoni Petero.

⁴¹Ni bwasha, Andereya waanyoowa khuweentsa yaaya weewe Simoni, waamuboolela ari, “Khwaanyoolile Kristo.”

⁴²Andereya waayila Petero isi Yesu. Yesu n'abona Petero, waamulolelela, waaloma ari, “Iwe niye Simoni umwaana uwa Yokana? Kane ulaangibwe uri Kefa.” (Lisiina lino lili shitweela busa ni Petero, shishimanyisa shiri lulwaanda).

⁴³Khu shifukhu shisheelakho, Yesu waakhalawo khuutsya i Galilaaya. Waanyoola Filipo abe uwaama mu shiriimba she Besusaida, mweesi abe Andereya ni Petero bamenya. Yesu waamuloma ari, “N'unoondekho.”

⁴⁴

⁴⁵Filipo n'anyoola Nasanaeli wamuloma ari, “Khwanyoolile uwatsana yeesi Musa aronakho mu makaambila, n'isi baŋoosi nabo baaronakho. Niye Yesu uwama i Nazareesi, ali umwaana uwa Yusufu.”

⁴⁶Nasanaeli wareeba Filipo ari, “Shilayi shiina shishinyala shaama i Nazareesi iyo nayo?” Filipo wamwiilamo ari, “Yiitsa wibonelekho.”

⁴⁷Yesu n'abona Nasanaeli nga amwiitsayo, wamulomakho ari, “Ilala bona umu Isiraeli umweene, ukhalimo khukhwikanakana khwoosi ta.”

⁴⁸Nasanaeli wareeba Yesu ari, “Wamanyila waheena?” Yesu welamo ari, “Ise ikhuboone nga wekhaale aasi e kusaala ku figi, nga Filipo ashiili khukhulaanga ta.”

⁴⁹Nasanaeli wamwiilamo ari, “Umuleekeli, iwe uli Umwaana wa Wele! Uli Umuyiinga uwa Isiraeli!”

⁵⁰Yesu wamuloma ari, “Ufukiilila khulw'esho shonyene, nga ni nomile ndi ikhuboone nga wekhaale aasi e kusaala ku figi? Kane ubone bibiindu bye kamaani khuminyisa bino.”

⁵¹Yesu weloosela ari, “Muŋali, ilala ikhuboolela ndi, ukhaabone likulu nga lyabaayukhile, nga angaaki w'Omwaana w'Omuundu, bamalayika ba Wele nga beekha ni baniina.”