Read lumasaaba Yokana 10 Bible Online

Yokana 10 - lumasaaba bible

Yokana 10

¹Yesu waaloma ari, “Ilala, ilala, imbaboolela ndi, umuundu ukhabirira mu mulyaango nga enjila mu litaala lye kamasheese, ne waniinila ahandi busa, uyo aba umwiifwi, naluundi umunuuli.

²Ne umuundu uwingilila mu mulyaango, uyo aba niye umwaayi uwe kamasheese.

³Umweene uyo, umuliindi amwikulilawo kumulyaango, ni kamasheese kawulila likono lyeewe. Alaanga kamasina ke kamasheese keewe, wakarusa ibulafu wakayisa.

⁴N'amala khuuba nga waarusile kamasheese keewe koosi ibulafu, akaraangilila, nako kamulondelela, khulwekhuuba kaamanya likono lyeewe.

⁵Ne umuundu umukyeni busa sikamulondelela ta. Akhali kamwilukha, lwekhuuba sikamanya likono ly'omukyeni ta.”

⁶Yesu araambisa lusimo luno, ne nibo balekha khumanya byeesi aba nga ababoolela, ni bili ta.

⁷Aryo lwanyuma Yesu waloma luundi ari: “Ilala, ilala, imbaboolela ndi, ise niye kumulyaango kwe kamasheese.

⁸Abo boosi babaanyoowa ise khukhwiitsa, baaba babiifwi, naluundi baanuuli. Ni kamasheese sikaabawulila ta.

⁹Ise niye kumulyaango. Umuundu yeesi ni enjilila mus'iise, aliwonesebwa. Alinjila, luundi arure anyoole kamaayilo.

¹⁰“Umwiifwi s'etsa khu lwe shishiindu shishiindi ta, ne njeeba eetsa khukhwiiba, ni khukhwiira, ni khuuhesa bibiiliwo. Ne ise neetsa khuubawa inywe buulamu, naluundi ndi mube ni nabwo mu bwitsufu.

¹¹“Ise ndi umwaayi umulayi. Umwaayi umulayi awaanayo bulamu bweewe khulwe kamasheese keewe.

¹²Ne umuraambi uwaayisa ari afune kumukheemba, ukhali umweene uwe kamasheese ta, n'abona khatsuutse nga kheetsa, alekha kamasheese waatima waatsya, khatsuutse khaluumba kamasheese, khaakasalanisa.

¹³Umwaayi uli umuraambi uwe kumukheemba atima waatsya, khulwekhuuba ayila kumukheemba, ne kamasheese s'akenaanakho ta.

¹⁴“Ise ndi umwaayi umulayi, namanya kamasheese kaase, ni kakaase nako kaayimanya samweene.

¹⁵Nga Paapa n'amanya ise, ni nase nga ni namanya Paapa, nawaanayo bulamu bwase khulwe kamasheese.

¹⁶Ne ndi ni kamasheese kakaandi kakakhali mu litaala lino ta; ni nako naakha khukareera. Nako kaliwulila likono lyase, kabe ke mwitaala litweela, n'umwaayi abe mutweela.

¹⁷“Paapa angana ise khulwekhuuba imbaanayo bulamu bwase, nio lwanyuma imbufune luundi.

¹⁸Mbaawo umuundu uwundusakho bulamu bwase ta; ne ise imbuwaanayo samweene khu bwase. Indi ni bunyala bwe khubuwaanayo, naluundi ndi ni bunyala bwe khubufuna luundi. Shino nisho sheesi Paapa andakiile khukhola.”

¹⁹Khulwe bilomo bino, luundi ndi abawo khukhwawukhana mu Bayudaaya.

²⁰Bakali khu nibo baloma bari, “Alikho shisaambwa, naluundi wakwiile tsintsoli. Lwashiina mumurekeeresa?”

²¹Ne babaandi baloma bari, “Mbaawo umuundu uli ni kimisaambwa unyala khukanikha ari taawe. Shisaambwa shinyala khubimbula tsimoni tsye baabofu?”

²²Byaba bifukhu bye bunyifu, ni Kamayiiya ke Khuwaanayo i Yerusalemu kaaba katsya mu moni.

²³Yesu aba akyeenda mu Lisaayilo Likhulu, mwitikiiyi lya Solomoni.

²⁴Babaandu babuusana, bamwibotokhelela bamureeba bari, “Ulyoolisa ena khukhulekha ifwe nga khwikanakana? Noola iwe niye Kristo, khuboolele lubuula.”

²⁵Yesu wabeelamo ari, “Ise nababoolela, ne inywe simufukiilila ta. Buuraambi bwase bweesi inaamba mu lisiina lya Paapa, nibwo bubunganikhakho.

²⁶Ne simufukiilila ta, khulwekhuuba simuli kamasheese kakaase ta.

²⁷Kamasheese kakaase kawulila likono lyase, nase nakamanya, luundi nako kanondelela.

²⁸Ise ingawa buulamu bubukhawawo ta. Shikalihela ta, luundi mbaawo ulikawutula khukhwaama mu mukhono kwase ta.

²⁹Paapa wase niye uwakaamba ise, niye uminyisa bibiindu byoosi, nashiryo mbaawo umuundu yeesi unyala khuwutula shishiindu shoosi khukhwaama mu mukhono kwa Paapa ta.

³⁰Ise ni Paapa khuli umuundu mutweela.”

³¹Luundi ndi Bayudaaya bawaamba kamabaale bari bamukhupe.

³²Ne Yesu wabeelamo ari, “Nabookesana kimilimo kimilayi khukhwaama isi Paapa, khu milimo kino kyoosi, milimo shiina khu nikyo kikila mwakhupa kamabaale?”

³³Bayudaaya bamwiilamo bari, “Sikhuli khuutsya khukhupa kamabaale khulwe kimilimo kimilayi ta, ne khulwe khufwotsola Wele. Iwe umuundu busa, ate wilaanga khuuba Wele.”

³⁴Yesu wabeelamo ari, “Sisharonebwa mu makaambila keenywe shiri, ‘Ise inoma ndi muli ba wele’ ta?

³⁵Babeene abo babalaangibwa bari ba wele, nga nibo beesi Ilomo ya Wele yeetsila, ni bibyaronebwa bikhosefu sibinyala khuufuniaakibwa ta.

³⁶Kale inywe munyala muryeena khukhuunomakho ise, isi Paapa abiitakho tsikhabi, waarumana mu shiibala, muri ifwotsola Wele, bari khulwekhuuba ise naalomile ndi, ‘Ise indi umukhosefu khukhwaama isi Wele?’

³⁷Ne ni imba nga sinaamba kimilimo kya Paapa, mukhaafukiilila ta.

³⁸Ne ikhaba nga injiraamba, mwakhalekha khufukiilila, ne ni mufukiilile buraambi, nio mumanye muri Paapa ali mus'iise, ni nase ndi mu Paapa.”

³⁹Luundi ndi bakhakakho khumuwaamba, ne Yesu wabebisakho waatsya.

⁴⁰Aryo Yesu waatsya injelekha we luluutsi Yorudaani, mu shifwo esi Yokana makiboole anyoowa khubatisila, waba ibweene iyo.

⁴¹Babaandu bakali beetsa is'ali baloma bari, “Akhaba nga Yokana s'akhola khabonelo khe kamakaanga khoosi ta, ne byoosi byeesi aloma khu muundu yuno, byaba bya ŋali.”

⁴²Ibweene iyo, babaandu bakali bafukiilila mu Yesu.