Read lumasaaba Yokana 11 Bible Online

Yokana 11 - lumasaaba bible

Yokana 11

¹Aabawo umusaani mutweela isi balaanga bari Lazaaro, abe umenya i Besaniya, uwaba abe waminyikhile. Besaniya shaba nisho shishaalo abe sheesi Malyamu amenya, atweela ni yaayawe, Maliza.

²Malyamu yuno niye uwahakha bikyele by'Omukasya kamafura kakawunya bulayi, wabisiimulila litsuune lyeewe. Lazaaro uwaba umutsiina, abe ali wandaaye weewe.

³Nashiryo bakooko ba Lazaaro abo barumanisa isi Yesu, nga bamuloma bari, “Mukasya, umusaale woowo waminyikhile.”

⁴Ne Yesu n'awulila shino waaloma ari, “Butsiina buno sibunaamilamo khuufwa khwa Lazaaro ta, akhali bunaamilamo khuuwa shiriifwa isi Wele. Nio akile khulwe butsiina buno, Umwaana wa Wele afune khuubuyilisibwa.”

⁵Yesu abe waasiima Maliza ni yaayawe, ni Lazaaro.

⁶Ne shitweela busa nga n'awulila ari Lazaaro waminyikhile, weloosela khumenya isi aba khumala bifukhu bibiindi bibili.

⁷Lwanyuma lwe bifukhu ibyo, Yesu waloma baleekelwa beewe ari ni mwiitse khutsye i Yuda luundi.

⁸Baleekelwa beewe bamuloma bari, “Umuleekeli, s'abirirewo imbuka ingali khukhwaama nga Bayudaaya abo ni bakana bakhukhupe kamabaale ta; ne ari ukana wileyo luundi?”

⁹Yesu waabaloma ari, “Kumuusi sikulimo tsisaawa liikhumi na tsibili? Nashiryo umuundu ukyenda kumuusi s'etuya taawe. Khulwekhuuba abonela buwaanga bwe shiibala shino.

¹⁰Ne umuundu n'akyeenda mu shilo etuya, khulwekhuuba iba mbaawo buwaanga ta.”

¹¹Yesu n'amala khuloma shino walooselakho ari, “Umusaale weefwe Lazaaro wakonele; ne indikho intsya khumwinyusa.”

¹²Baleekelwa bamuloma bari, “Ne noola wakonele liilo, kane awone.”

¹³Yesu aba amanyisa ari Lazaaro wafwiile, ne nibo bambaasa bari aloma khu liilo lya busheele.

¹⁴Lwanyuma Yesu waababoolela lubuula ari, “Lazaaro wafwiile.

¹⁵Ne khulweenywe nekhoyele, khulwekhuuba ise sinabayo ta, nio manya mwafukiililamo. Ne ari lekha khutsye is'ali.”

¹⁶Ne Tomasi, ulaangibwa ari Mukhwana, waloma baleekelwa baashe ari, “Lekha nafwe khutsye, khufwile atweela ni naye.”

¹⁷Yesu n'olayo, waanyoola nga Lazaaro waamalile mu ŋani bifukhu bine.

¹⁸Besaniya yaba aambi ni Yerusalemu, lukyeendo lulukhoola ni tsikilomita tsitaru ta.

¹⁹Bayudaaya bakali baaba beetsile isi Maliza ni Malyamu, khubasaasila ni khukonelesa luufu lwa wandayaabwe.

²⁰Ne Maliza n'awulila Yesu alikho etsa, wenyukha waatsya khumwakaanila. Malyamu niye warama mu ntsu.

²¹Maliza waloma Yesu ari, “Umukasya, uba nga uwabeele ano, khali wandaayase s'afwiile ta.

²²Ne namanyile ndi akhaba aluno ari, shoosi shoosi sheesi kane uloombe, Wele kane ashikhuwe.”

²³Yesu wamuloma ari, “Wandaaye woowo alilamukha abe umulamu luundi.”

²⁴Maliza wamwiilamo ari, “Namanyile nga alilamukha luundi mu khulamukha khwe baafu, khu shifukhu shimaliilisi.”

²⁵Yesu wamuloma ari, “Ise niye khulamukha, naluundi ise niye buulamu. Umuundu uwufukiilila mus'iise, akhaba nga wafwiile, aliba umulamu.

²⁶Naluundi, buli uyo yeesi uwufukiilila mus'iise nga ashiili umulamu, s'alifwa ta.” Kila Yesu areeba Maliza ari, “Ufukiilila shino?”

²⁷Maliza welamo ari, “Ee, Umukasya, ifukiilila ndi iwe niye Kristo, Umwaana wa Wele, abe isi shiibala shaliindilila.”

²⁸Maliza n'amala khuloma bino, waatsya walaanga yaayawe Malyamu mushimoonyo, nga aloma ari, “Umuleekeli wetsile ali antsye alikho akhulaanga.”

²⁹Malyamu n'awulila shino, wenyukha wangu waatsya isi Yesu ali.

³⁰Ne Yesu abe ashiili khwinjila mu shishiitsa sheesi abe bamenyamo ta; abe ashiili mu shifwo sheesi Maliza amwakananamo.

³¹Ne Bayudaaya babaaba ni Malyamu mu ntsu, nga beetsile khumwolakho khu masika, ni babona nga enyukha atsya antsye, bamuloondakho, nga bambaasa bari alikho atsya khulilila khu ŋani.

³²Malyamu n'ola mu shifwo isho waabona Yesu, waamukwa mu bikyele waamuloma ari, “Umukasya, uba nga uwabeele ano, khali wandaayase s'afwiile ta.”

³³Yesu n'abona Malyamu nga elootsa, atweela ni Bayudaaya babaaba ni naye nga nabo belootsa, shaamuwaambakho naabi naluundi shiisa shaamuwaamba.

³⁴Waabareeba ari, “Mwamusiikhile waheena?” Baamwiilamo bari, “Mukasya yiitsa ubone.”

³⁵Yesu waalila kamasika.

³⁶Bayudaaya baaloma bari, “Kale ni mubone nga abeele n'amukana!”

³⁷Ne batweelakho khu nibo baaloma bari, “Umuundu uyuno niye uwabiimbula tsimoni tsy'omubofu, abe s'anyala waawonesa Lazaaro waalekha khufwa ta?”

³⁸Nga Yesu shiisa shamuwaambile luundi, waatsya khu ŋani. Iŋani yaba mwifuluma, nga imulyaango walyo bareerekho libaale.

³⁹Yesu waaloma ari, “Ni muruseyo libaale.” Kila Maliza, umukooko w'omufu aloma ari, “Umukasya, nambaasa ari khuwunya khukali, khulwekhuuba khukhwaama nga ni khwamusiikha, abirirewo bifukhu bine.”

⁴⁰Yesu waamureeba ari, “Ise s'ikhulomeele iwe ndi n'ukane ufukiilile kane ubone shiriifwa sha Wele ta?”

⁴¹Beetsa barusakho libaale. Yesu wenyusa tsimoni mu ngaaki waloomba ari, “Paapa, ikhusiima lwekhuuba iwe wumba byeesi ikhuloomba.

⁴²Naamanya ndi busheele uumba byeesi ikhuloomba. Ne inoma shino khulwe buulayi bwe lituuli lye babaandu babeemile ano nga bandoleleele, nio akile bafukiilile bari iwe niye uwandumana ise.”

⁴³Yesu n'amala khuloma aryo, walaanga ni likono likali ari, “Lazaaro, rura antsye!”

⁴⁴Lazaaro uwaba abe wafwiile, waarura antsye, nga bamuboweleele tsingubo tseesi bamusiikhilamo. Abe kamakhono ni bikyele, ni mu moni namwo, nga bamuboweleele ingubo. Yesu wabalakila ari, “Nimumukangulule, mumulekhe busa.”

⁴⁵Bakali khu Bayudaaya babaaba beetsile khulilisa Malyamu, ni baabona sheesi Yesu akhola, bamufukiililamo.

⁴⁶Ne babaandi belayo isi Bafarisaayo, bababoolela byeesi Yesu akholile.

⁴⁷Nashiryo basaayi bakhulu ni Bafarisaayo balaanga Lukhobo Lukhulu, baloma bari, “Khunakhola khuryeena? Khulwekhuuba umuundu yuno alikho akhola bye kamakaanga bikali.

⁴⁸Ni kane khumulekhe eloosele aryo, babaandu boosi kane bamufukiililemo. Shino kane shikile bawuli Baroma beetse bonakise Lisaayilo Likhulu ni linaambo lyeefwe.”

⁴⁹Ne mutweelakho khu be mu lukhobo, abe ulaangibwa ari Kayafa, nga niye uwaba Umusaayi ufuura bukhulu kumwiiko kwene ukwo, waaloma ari, “Inywe muli nga mumukhamanyile ta!

⁵⁰Simubona muri shili shilayi umuundu mutweela khufwa mu shifwo she babaandu boosi, khuminyisa linaambo lyoosi ni lihela?”

⁵¹Niye s'aloma shino khulwe kamakyesi keewe umweene busa ta, ne khulwekhuuba aba Umusaayi ufuura bukhulu kumwiiko ukwo, kila aloma bilomo bye buŋoosi ari Yesu kane afwe khulwe linaambo lyoosi.

⁵²Ne shiili khulwe linaambo ilyo lyonyene ta, ne akhali nio akile anyalise khubuusanisa atweela babaana ba Wele babasalaniile ino ni n'eyo.

⁵³Ni khukhwaama khu shifukhu isho, Bayudaaya bakhakakho khuweentsa kumukhoosi kwe khukhwiira Yesu.

⁵⁴Nashiryo ni khukhwamila awo, Yesu walekha khukalakaalila luundi abulafu mu Bayudaaya ta. Warurayo waatsya mu shifwo shishiili aambi ni kumubiimbi, mu shiriimba shishilaangibwa shiri Efurayimu. Wamenya ibweene iyo atweela ni baleekelwa beewe.

⁵⁵Ari abe shifukhu she Bayudaaya she Kamayiiya ke Khuubirakho shili aambi. Babaandu bakali baama tsindulo baniina i Yerusalemu nga Kamayiiya ke Khuubirakho kashiili khukhwoola ta, bari bepyeluuse.

⁵⁶Abe balikho baweentsa Yesu, nga babusaniile mu Lisaayilo Likhulu bareebana bonyene bari, “Mwaambaasa muri kane etse khu mayiiya kano namwe ta?”

⁵⁷Basaayi bakhulu ni Bafarisaayo abe barusile likaambila bari abe umuundu yeesi umanyile isi Yesu ali, ali ni khubaboolela, batsye bamuwambe.