Read lumasaaba Yokana 12 Bible Online

Yokana 12 - lumasaaba bible

Yokana 12

¹Ni byaba nga byaramileyo bifukhu bisesaba khukhwoola khu Mayiiya ke Khuubirakho, Yesu woola i Besaniya, esi alamusila Lazaaro khukhwaama mu khufwa.

²Bakhalabana, bamuteekhelayo she shiilo. Maliza niye uwakaanisayo she khulya isho. Lazaaro aba mutweela khu baaba khu shikabilo she biilyo.

³Lwanyuma Malyamu wabukula ikyupa iye kamafura kakawunya bulayi, ke bukusi bwe angaaki, wakahakha khu bikyele bya Yesu. Wabisiimulila litsuune lyeewe. Intsu yoosi yetsula khuwunya bulayi khwe kamafura ako.

⁴Ne mutweela khu baleekelwa ba Yesu ulaangibwa Yuda Isikalyoti, uwaba atsya khulyamo Yesu luwomelo, lwanyuma waaloma ari,

⁵“Khulwashiina kila kamafura kano kakhakulisibwilemo tsidinari nga bitoondo bitaru, batsikabila bataambi?”

⁶Yuda s'aloma aryo bari khulwekhuuba abe enaanayo isi bataambi ta, ne khulwekhuuba aba umwiifwi. Niye uwasutatsaka iwootswa, ate nga ebaatsaka tsinusu tsitsakwatsakamo.

⁷Yesu waaloma ari, “Ni mumulekhe. Lekha ebiikhile kamafura ako, khulwe shifukhu she khusiikhibwa khwase.

⁸Babaandu bataambi muli ni nabo busheele, ne simuli ni nase tsindaalo tsoosi ta.”

⁹Nga ibyo bili biryo, lituuli lye Bayudaaya lyamanya liri Yesu ali i Besaniya. Betsayo, ne akhuba ndi khulwa Yesu yenyene ta, ne ni khubona khu Lazaaro isi Yesu alamusa khukhwaama mu bafu.

¹⁰Baryo Basaayi bakhulu bakhala kamakyesi ke khukhwiira Lazaaro naye.

¹¹Khulwekhuuba Bayudaaya bakali baaba batsya isi Yesu nga bamufukiilila, naluundi khulwa Lazaaro.

¹²Ne shifukhu shisheelakho, kutuuli kwe babaandu babaaba beetsile khu mayiiya, ni bawulila bari Yesu ali khu ntsila etsa i Yerusalemu,

¹³bakhongola tsisakya tsye kamashendu baatsya khumwakaanila nga balomela angaaki bari, “Hosana, ali ni tsikhabi uyo uwiitsa mu lisiina ly'Omukasya. Wele awe Umuyiinga wa Isiraeli tsikhabi.”

¹⁴Yesu wanyoola isikilya imoosi, waakikhalakho, nga ni sharonebwa mu byaronebwa bikhosefu shiri,

¹⁵“Mukharya ta, inywe babaandu be mu Sayuuni; Bona Umuyiinga wenywe alikho etsa nga wikhaale khu sikilya imoosi.”

¹⁶Mu khunyoowa baleekelwa beewe baalekha khumanya shino ta; ne lwanyuma nga Yesu waamalile khuweebwa shiriifwa, ulwo bashebulila bari bibiindu bino byaronebwa nga biwaamba khu niye. Naluundi nga bino byoosi byakholebwa khu niye.

¹⁷Ni lituuli lye babaandu babaabawo ni naye nga enyusa Lazaaro mu ŋani luundi wamulamusa khukhwaama mu bafu, baboola ibyo byoosi byeesi baabona naluundi byeesi baawulila.

¹⁸Babaandu bakali khulwekhuuba baaba bawuliile bari Yesu wakholile she kamakaanga shino, baryo baatsya khumwakaanila.

¹⁹Bafarisaayo baloma bonyene na bonyene bari, “Ni mubone, mbaawo sheesi khulikho khunyala khukhola ta! Lola shiibala shoosi shilikhumulondelela.”

²⁰Mu baandu babeetsa khu mayiiya khukhwisaaya, mwabamo balala Bayonaani.

²¹Nibo beetsa isi Filipo, uwaba uwama i Besusaida, mu Galilaaya, bamuloomba bari, “Musakhulu, khukana khubona Yesu.”

²²Filipo naye waatsya waboolelakho Andereya. Baryo boombi lwanyuma baatsya baboolela Yesu.

²³Lwanyuma Yesu welamo ari, “Isaawa yoolele isi Umwaana w'Omuundu ashiile khufumisibwilamo.

²⁴Ilala, ilala, imbaboolela ndi, imiitso ye iŋaano ni khakwa mwiloba yaafwa ta, irama nga ili imiitso indweela yonyene. Ne n'imela, isaala bumiitso bukali.

²⁵Umuundu yeesi ukana buulamu bweewe, alibufwilwa. Ne umuundu ubiyila buulamu bweewe mu shiibala shino, alibwibiikhila anyoole buulamu bubukhawawo ta.

²⁶Umuundu yeesi uli umwakaanisi wase, ashiile khukhunondelela ise. Ni nase isi ndi, umwakaanisi wase naye niyo isi aliba. Uyo yeesi uli umwakaanisi wase, Paapa alimuwa shiriifwa.”

²⁷Yesu weloosela ari, “Ari kumwoyo kwase kweyembelele. Ne ari inome shiina? Inome ndi Paapa n'umbonese mu saawa yino? Ne taawe, shino nisho shishandeera khukhwoola khu saawa yino.

²⁸Paapa, n'ufumise lisiina lyoowo.” Lwanyuma likono lyama mwikulu nga liloma liri, “Nalifumisile khaale, naluundi indilifumisa.”

²⁹Ne babaandu babaabawo nga beemilewo ni bawulila likono, baloma bari, “Ibeele khukuula khwe ifula.” Ne babaandi baloma bari, “Malayika ama khukanikha ni naye.”

³⁰Yesu wilamo ari, “Likono ilyo likanikhile khulweenywe, ne akhuba khulwase ta.

³¹Ari imbuka niyo yino, iye khukhalila shiibala shino kumusaango. Umuwuli uwe shiibala shino anatimisibwa arusibwe ibulafu.

³²Ne nase n'indiniinisibwa angaaki khurura khu shiibala, indihaaya babaandu boosi imbare isi samweene.”

³³Shino aashiloma nga okesanisa khuufwa khwa saambo shiina khweesi alifwamo.

³⁴Lituuli lyeelamo liri, “Ifwe khwawulila mu makaambila keefwe khuri Kristo alibawo bifukhu byoosi. Ne iwe shiina shikhulomesa shiri Umwaana w'Omuundu ashiile khuniinisibwa angaaki? Umwaana w'Omuundu yuno, niye naanu?”

³⁵Yesu wabeelamo ari, “Buwaanga mushiili ni nabwo, ne mu mbuka injeekhe. Ni mukyende nga mushiili ni buwaanga, nga shishiilima shishiili khubawaamba ta. Umuundu ukyendela mu shilima s'amanya esi atsya ta.

³⁶Nga mushiili ni buwaanga ni mufukiilile buwaanga, nio manya mube babaana be buwaanga.” Yesu n'amala khukanikha bino, waarurawo waatsya wabebisakho.

³⁷Akhaba nga Yesu akhola bye kamakaanga bikali biryo mu moni tsye Bayudaaya, sibamufukiililamo ta.

³⁸Shino shaba nga sholelesa bibyaronebwa mu muŋoosi Yisaaya shiri, “Umukasya, naanu uwafukiilila buurume bweefwe? Naluundi, kumukhono kwa Wele kwe kamaani kwabimbulilwa khu naanu?”

³⁹Ni khulwe ilomo yino, sibaanyala khufukiilila ta, khulwekhuuba Yisaaya waloma ahandi ari,

⁴⁰“Wele wababofwaasa tsimoni tsaabwe. Naluundi waakhola kimyoyo kyaabwe khuuba kimihandalafu, nio balekhe khubona ni tsimoni tsaabwe ta, namwe nio balekhe khumanya ni kimyoyo kyaabwe ta, khulwekhuuba beetsa khushuukha, ise nabawonesa.”

⁴¹Yisaaya aloma aryo lwekhuuba abona shiriifwa sha Yesu; aryo wamukanikhakho.

⁴²Ni batweela khu baraangilisi bamufukiililamo, ne khulwe khuurya Bafarisaayo, balekha khubuula ta, bari lukana beetsa khubekalawo khutsya mu ntsu iye khukhwisaayilamo.

⁴³Khulwekhuuba bakana shiriifwa shabwe khukhwaama mu baandu, khufuurisa khukhwaama isi Wele.

⁴⁴Lwanyuma Yesu waalomela angaaki ari, “Umuundu n'afukiilila mus'iise, s'afukiilila ise senyene ta, ne aba afukiilila ni nooyo uwanduma.

⁴⁵Uyo uwunondelela ise, abona uyo uwanduma.

⁴⁶Ise nayiitsa mu shiibala nga buwaanga, nio buli muundu uwufukiilila ise alekhe khurama mu shilima ta.

⁴⁷Ne isi umuundu yeesi uwulila bilomo byase, ne walekha khubitsiilakho ta, ise s'imukhalila kumusaango ta. Lwekhuuba ise shineetsa khukhalila shiibala kumusaango ta, ne njeeba khushiwonesa.

⁴⁸Umuundu yeesi uwuuntsikaana ise, walekha khufukiilila bilomo byase ta, ali n'umukhalila kumusaango. Shilomo shase shisheene sheesi naloma nisho shishiilimukhalila kumusaango khu shifukhu shishakamayo.

⁴⁹Ise s'inganikha khulwe bunyala bwase ta, ne Paapa umweene uwandumana niye uwundakila byeesi naakha khuloma; n'isaambo iye khubilomamo.

⁵⁰Ni nase namanya ndi kamakaambila keewe niko bulamu bubukhawawo ta. Byeesi Paapa andumana khukanikha, nibyo bibyeene byeesi inganikha.”