Read lumasaaba Yokana 13 Bible Online

Yokana 13 - lumasaaba bible

Yokana 13

¹Kamayiiya ke Khuubirakho kaaba nga kashiili khwoola ta, Yesu abe waamanyile ari isaawa yeewe iye khurura mu shiibala muno atsye isi Paapa weewe, yoolile. Lwanyuma khulwe khuukana babaandu beewe babaaba mu shiibala, aryo khu mbuka yino Yesu wabokesela ilala khuukana khweewe khukhwitsufu.

²Sitaani aba nga waamalile khaale khukhwinjila mu mwoyo kwa Yuda Isikalyoti, umwaana uwa Simoni, ari alye mu Yesu luwomelo.

³Baryo ni baaba nga balikho balya she shiilo, ni Yesu nga waamanyile ari Paapa weewe wamuweele byoosi mu mikhono kyeewe, ate nga wayama isi Wele, luundi nga akobolayo isi Wele;

⁴wenyukha khu shikabilo she biilyo, wiyabulamo tsingubo tseewe tsye khu ngaaki, wabukula i tawulo wibowa mu shikuute.

⁵Lwanyuma watsukha kameetsi mu besani, warakikha khusiinga baleekelwa beewe bikyele, ni khubisiimulila i tawulo isi ebowa mu shikuute.

⁶Ne n'ola khu Simoni Petero, Petero waamureeba ari, “Umukasya, iwe usiinge ise bikyele?”

⁷Yesu wilamo ari, “Sheesi ise ndi khukhola, iwe s'unyala khushimanya ari ta. Ne kane ushimanye lwanyuma.”

⁸Petero wamuloma ari, “Taawe, iwe singene usiinge bikyele byase nakhafwiiti khari ta!” Yesu wamwiilamo ari, “Nikhakhusiinga iwe bikyele, uba s'uli ni kumukabo ni nase ta.”

⁹Simoni Petero wiilamo ari, “Nashiryo, Umukasya, akhuba bikyele byase byonyene ta, ne ni kamakhono kaase, ni kumurwe nakwo.”

¹⁰Yesu wamuloma ari, “Umuundu uba waamalile khukhwisiinga, sishimukanisa khukhwisiinga luundi ta. Akhali khusiinga bikyele byonyene. Umweene yeesi aba ali umumiliwu. Ni nanywe muli bamiliwu, ne simuli mweesi ta.”

¹¹Khulwekhuuba Yesu aamanya uyo wutsya khumulyamo luwomelo. Ni khulwe ilomo iyo kila aaloma ari mweesi simuli baamiliwu ta.

¹²Aryo Yesu n'amala khubasiinga bikyele, wakwaara tsingubo tseewe, wekhala aasi luundi. Wabareeba ari, “Mwaamanyile sheesi ise naama khubakholela?

¹³Inywe munaanga ise muri Umuleekeli, naluundi muri Umukasya. Muli batuufu khuloma muryo, khulwekhuuba isho nisho sheesi ise ndi.

¹⁴Ne noola ise ubeele Umukasya wenywe, naluundi Umuleekeli wenywe, nabasiingile inywe bikyele, nanywe muryo mwaakha khusiingana bikyele, mwenyene na mwenyene.

¹⁵Khulwekhuuba nabaweele she khubonelakho, nio nanywe mukhole nga ise n'ishikholele khus'inywe.

¹⁶Ilala, ilala, umwakaanisi s'afuura umukoosi weewe bukhulu ta. Namwe umurume s'afuura uyo umurumaane bukhulu ta.

¹⁷Ni mumanye muri, singa mumanya bibiindu bino naluundi mwabitsiilakho, muba muli ni khabi.

¹⁸“S'indi khuloma khwinywe mweesitsana ta, akhali ise namanyile abo beesi narobola. Ne iliwo bibyaronebwa bikhosefu bibiili ni khukhwoolelela, bibiiloma biri, ‘Uyo ukabanana ni nase biilyo, umweene uyo niye ukalukha khuuba umusiku wase.’

¹⁹Imbaboolela shino ari nga shishiili khubawo ta, ne ni shilibawo, akile mufukiilile muri ise niye umweene.

²⁰Ilala imbaboolela ndi, uyo uwakaanila umuundu isi ise ndumana, aba wantsakaaniile ise. Ni nooyo uwuntsakaanila ise, aba wakaaniile uyo uwandumana ise.”

²¹Yesu n'amala khuloma aryo, wiyembelela mu mwoyo kweewe, kila aloma lubuula ari, “Ilala mbaboolela ndi, mutweela khwinywe atsya khundyamo luwomelo.”

²²Mu khwiyanga khukali, baleekelwa balolana. Khulwekhuuba sibamanya bulayi naanu esi Yesu alomakho ta.

²³Ne mutweela khu baleekelwa beewe, uyo isi Yesu aakana naabi, aba wikhaale nga uwililiile khu Yesu.

²⁴Simoni Petero waamumesela, waamuloma ari, “N'umureebe akhuboolele ifwe naanu esi alomakho.”

²⁵Naye wesyeenda aambi ni Yesu, waamureeba ari, “Umukasya, naanu umweene?”

²⁶Yesu wiilamo ari, “Uyo esi kane imbe kumukaati kuno nga naamalile khuukusiikha mu shibuumba.” Nga Yesu waamalile khusiikha kumukaati mu shibuumba, wakubukula, wakuwa Yuda Isikalyoti, umwaana uwa Simoni.

²⁷Ne Yuda n'amala khuulya kumukaati, Sitaani wamwingilamo. Yesu wamuloma ari, “Sheesi ukana khukhola, n'ushikhole khaangu.”

²⁸Ne mbaawo na mutweela khuubo babaaba bekhaale nga balya, uwamanya shilomo isho sheesi Yesu alomela Yuda ta.

²⁹Ne lwekhuuba Yuda aba nga niye uwaamba iwootswa iye tsinusu, bambaasa bari manya Yesu alikho amuloma ari atsye akule byeesi bakana bye khu mayiiya. Namwe bari manya atsye awekho bataambi khakhaandu.

³⁰Aryo Yuda n'amala khuulya kumukaati waarura ibulafu. Abe antsye bwaba mushilo.

³¹Nga Yuda waamalile khurura ibulafu, Yesu waaloma ari, “Ari Umwaana w'Omuundu waafumisiwile. Luundi khuubirira mu niye, Wele afumisibwe.

³²Ne Wele n'afumisibwa khuubirira mu Mwaana, Wele naye afumisa Umwaana khuubirira mu niye. Naluundi khaangu akho, alimufumisa.

³³Baana baase, mu mbuka ifwiiti iri, ndi ni nanywe, ne lwanyuma muli meentsa, ne ndi nga ni naboolela Bayudaaya, nanywe mbaboolela ari ndyo ndi, esi intsya, simunyala khukhwiitsayo ta.

³⁴Imbawa likaambila lishaakha: Ni mukanane mwenyene na mwenyene. Nga ise ni nabakana inywe, muryo nanywe mwakha mukanane.

³⁵Mu khukanana mwenyene na mwenyene, nimwo mweesi babaandu boosi balibamanya bari muli baleekelwa baase.”

³⁶Simoni Petero wareeba Yesu ari, “Umukasya, wutsya ena?” Yesu wamwiilamo ari, “Isi intsya, s'unyala wanondakho ari ta. Ne ulinoondakho lwanyuma.”

³⁷Petero waamureeba luundi ari, “Umukasya, lwashiina s'inyala naakhuloondakho ari? Kane ise imbaaneyo buulamu bwase khulwoowo.”

³⁸Lwanyuma Yesu waamureeba ari, “Ilala, kane uwaaneyo bulamu bwoowo khulwase? Ilala, ilala, ikhuboolela ndi, itwaaya kane ibe nga ishiili khukholyookha ta, iwe kane ube nga waantsikaanile ise kimiluundi kitaru.”