Read lumasaaba Yokana 14 Bible Online

Yokana 14 - lumasaaba bible

Yokana 14

¹Yesu wiloosela waaloma ari, “Mukhaba ni khukhwiyembelela mu myoyo kyeenywe ta. Ni mufukiilile mu Wele, ni nase ni mufukiililemo.

²Muntsu ya Paapa wase mulimo biifwo bikali. Ni nase ndi khuutsya khubaŋoonaŋoonela shifwo. Shino shiba shishikhali shiryo ta, khali ise s'imbaboolele inywe ta.

³Ne n'imba nga namalile khubaŋoonaŋoonela shifwo, indikobola luundi imbayile isi ise ndi, nio isi ise ndi ni nanywe mube ibweene iyo.

⁴Inywe mwamanya intsila itsya mu shifwo mweesi ise ndikho ntsya.”

⁵Tomasi waamureeba ari, “Umukasya, sikhwaamanyile ni mu shifwo mweesi ulikho wutsya ta, khunyala khuryeena khwaamanya intsila?”

⁶Yesu waamwiilamo ari, “Ise niye intsila, naluundi niye bwa ŋali, naluundi niye buulamu. Mbaawo umuundu uwiitsa isi Paapa ta, khurusakho nga abirira mus'iise.”

⁷Yesu weloosela ari, “Ne ari nga ni muumanyile ise, kane mumanye Paapa wase naye. Ni khukhwaama ari mwamumanyile, naluundi mwamuboone.”

⁸Filipo waamuloma ari, “Umukasya, iwe n'ukhwokese Paapa, ifwe isho kane shikhumale.”

⁹Yesu waamukobolamo ari, “Filipo, nabeele ni nanywe khumala imbuka yino yoosi, ne ni khukhwoola ari iwe ushiili khukhumanya ise ta? Uwumbona ise, aba waboone Paapa, khulwashiina kila uloma uri khwokesane Paapa?

¹⁰Filipo, iwe s'ufukiilila uri ise ndi mu Paapa, ni Paapa naye ali mus'iise ta? Bilomo byeesi imbaboolela inywe, simbaboolela khulwe bunyala bubwase ta; ne khulwe bunyala bwa Paapa uwikhala mus'iise, waraamba kimilimo kyeewe umweene.

¹¹Ni mufukiilile nga naalomile ndi ise ndi mu Paapa, ni Paapa naye ali mus'iise. Ne noola abe sishili khulwe isho ta, ni mufukiilile khulwe kimilimo kimyeene kyeesi ikhola.

¹²Ilala, ilala, imbaboolela ndi uyo uwufukiilila ise, naye alikhola kimilimo nikyo mitweela nga kyeesi ise ikhola, ilala alikhola ni kimilimo kikifuurakho ano bukhulu, khulwekhuuba indikho intsya isi Paapa.

¹³Buli shoosi shoosi sheesi kane muloombatsake mu lisiina lyase, indishikhola, nio shiriifwa sha Paapa shibonekhele mu Mwaana.

¹⁴Ni mulinoomba shishiindu shoosi mu lisiina lyase, indishikhola.”

¹⁵Yesu weloosela ari, “Ni muba nga mungana ise, kane mulondelelatsake kamakaambila kaase.

¹⁶Ni nase kane inoombe Paapa, ni naye alibawa Umuyeeti ukuundi, ulibatsaka ni nanywe bifukhu byoosi.

¹⁷Umweene uyo niye Umwoyo uwa ŋali, isi shiibala shikhanyala khukhwakaanila ta, khulwekhuuba shiibala seshimubona namwe sishamumanya ta. Ne inywe mwamumanya khulwekhuuba amenya mus'iinywe, akhaabe mus'iinywe.

¹⁸“Ise s'indibalekha inywe khuuba bafuubi ta; indikobola isi muli.

¹⁹Ne mu mbuka ifwiiti, shiibala sikane shimbone ta, ne inywe kane mumbone. Khulwekhuuba ise ndi umulamu, ni nanywe muliba balamu.

²⁰Khu shifukhu isho, inywe mulimanya muri ise ndi mu Paapa wase, ni nanywe muli mus'iise, ni nase ndi mus'iinywe.

²¹Uyo umanyile kamakaambila kaase, wakawaamba, aba uyo niye uwungana ise. Ni n'oyo uwungana ise, naye alikanibwa ni Paapa wase. Ni nase ndi mukana, niyokesanise is'ali.”

²²Ne Yuda ukuundi, ukhali Isikalyoti ta, wareeba Yesu ari, “Umukasya, shiina kila wutsya khukhwiyokesanisa isi ifwe, ne akhuba isi shiibala ta?”

²³Yesu waamukobolamo ari, “Umuundu yeesi uwungana ise, kane awaambe shilomo shase. Ni Paapa wase kane akane umuundu uyo, naluundi kane khwiitse is'ali, khumenye mu bulamu bweewe.

²⁴Ne umuundu ukhangana ise ta, s'awaamba bilomo byase ta. Shilomo sheesi muwulila seshili shishase ta, akhali shili sha Paapa uwandumana ise.

²⁵“Bilomo bino nabibabooleele nga ishiili ni nanywe.

²⁶Ne Umuyeeti, nga niye Umwoyo Umukhosefu, isi Paapa alyakaanisa mu lisiina lyase, alibaleekela inywe bibiindu byoosi. Naluundi alibashebusa ibyo byoosi byeesi imbabooleele.

²⁷Lukoosi nilwo lweesi imbalekheele; lukoosi lwase lulweene nilwo lweesi imbaweele. Ise s'imbawa lukoosi nga shiibala ni shibawa ta. Kimyoyo kyeenywe kikheyembelela namwe kikharya ta.

²⁸Mwambulile nga noma ndi, ‘Indikho intsya, naluundi ndi indikobola isi muli.’ Muba nga mumungana, khali mwekhoyele, khulwekhuuba indikho ntsya isi Paapa. Khulwekhuuba Paapa ali umukhulu khukhufuura ise.

²⁹Ari nababooleele nga shino shishiili khubawo ta, nio akile nga shetsile khukholikha, mufukiilile.

³⁰Ise shinyala ari nakanikha ni nanywe imbuka ingali ta, khulwekhuuba umuwuli uwe shiibala shino alikho etsa. Ne ise s'andikho bunyala bwoositsana taawe.

³¹Ne shiibala shili ni khumanya shili ise ingana Paapa, shishikila ikhola nga Paapa n'anomela. Ni mwinyukhe khurure ano khutsye.”