Read lumasaaba Yokana 15 Bible Online

Yokana 15 - lumasaaba bible

Yokana 15

¹Yesu weloosela, waaloma ari, “Ise niye kumusabibu kwa ŋali, ni Paapa wase niye umulimi.

²Buli lusakya lwase lulukhaama bibyaamo ta, Paapa alukhala walurusawo. Ne buli lusakya lulwaama bibyaamo, alukhalila nio lwiloosele khukhwaama bibyaamo bikali.

³Inywe ari mwaamalile khuŋoonebwa khulwe shilomo sheesi imbaboolele.

⁴Ni mube mus'iise, ni nase kane iname mus'iinywe. Nga lusakya ni lukhanyala khukhwaama bibyaamo lwonyene nga siluli khu shisina she kumusabibu ta, ni nanywe muryo, noola nga simuli mus'iise ta, singane munyale ta.

⁵“Ise kumusabibu, inywe muli tsisakya. Umuundu yeesi uba mus'iise, nga nase n'imba mu niye, umuundu uyo amakho bibyaamo bikali, lwekhuuba akhali ise, mbaawo sheesi munyala khukhola ta.

⁶Umuundu yeesi ukhaba mus'iise, atuumibwa aleeyi, nga lusakya ni lutuumibwa, lwooma. Tsisakya tsitsoomile batsibuusa atweela, batsituuma mu mulilo, batsoosha.

⁷Ni muba mus'iise ni bilomo byase byaaba musinywe, ni muloomba shoosi sheesi mukana, nanywe mulishifuna.

⁸Ari mu shino, Paapa afumisibwe, munyale khukhwaama bibyaamo bikali, mwiyokesane khuuba baleekelwa baase baŋali.

⁹Nga Paapa n'angana ise, ni nase ndyo nabakana inywe. Ari ni mube mu khukana khwase.

¹⁰Inywe ni muwaamba kamakaambila kaase, kane mubaatsake mu khukana khwase, nga nase ni maambatsaka kamakaambila ka Paapa, naarama mu khukana khweewe.

¹¹Nababoolele bino nio akile kumwikhoyo kwase kube mus'iinywe, naluundi nio kumwikhoyo kweenywe kube kumwitsufu.

¹²“Likaambila lyase nilyo lino: ni mukananatsake mwenyene na mwenyene, nga ise ni nabakana inywe.

¹³Mbaawo khukana khukhuundi khukhufuura khuno ta: umuundu khuwaanayo bulamu bweewe, khulwe basaale beewe.

¹⁴Inywe ni mukhola byeesi ise imbalomela, muba basaale baase.

¹⁵Ise sishiibalaanga nywe ndi babakaanisi baase ta, lwekhuuba umwakaanisi s'amanya byeesi umukoosi weewe akhola ta. Inywe nabalaangile ndi basaale baase lwekhuuba nabamanyisile byoositsana byeesi nawulila khukhwaama isi Paapa.

¹⁶Sishili ndi inywe mumwandobola ise ta, ne ise niye uwabarobola inywe. Luundi nabangala ndi mutsye mwame bibyaamo, ni bibyaamo byeenywe bibe bye khubawo biilo ni biilo, ni Paapa abawe shoosi shoosi, sheesi mumuloomba, mu lisiina lyase.

¹⁷Lino nilyo likaambila lyase is'inywe: ni mukanane mwenyene na mwenyene.

¹⁸“Ne shiibala ni shibabiiyila inywe, ni mumanye muri shanyoowa khukhumbiyila ise.

¹⁹Inywe muba babaali be shiibala khali shiibala shibakanile, nga babaasho; ne shiibala shibabiiyila inywe khulwekhuuba simuli babaasho ta. Ise nabarobola nywe khurura mu shiibala.

²⁰Ni mushebulile bino byeesi nabaloma ndi: umwakaanisi s'afuura umukoosi weewe ta. Ne noola baangubyeenga ise, ni nanywe kane babakubyeenge. Baba nga babawaamba khuleekela khwase, khali bawaambile ni khuleekela khwenywe.

²¹Ne balibakhola inywe bino byoosi khulwe lisiina lyase, lwekhuuba sibamanya Uyo uwandumana ise ta.

²²Ise indekha khukhwiitsa nakanikha ni nabo, khali sibabeele ni shiibi shoosi ta. Ari sibali ni she khukhwihaambilisakho khulwe shishonako shabwe ta.

²³Uyo uwumbiyila ise, abiyila ni Paapa naye.

²⁴Ise ndekha khukholela akari abwe buraambi bweesi umuundu yeesi akhakholatsakakho ta, khali sibabeele ni kumusaango kwe bubwoonaki ta. Ne ari baboone buraambi bwe bye kamakaanga, bambiyila ise ni Paapa.

²⁵Ne shino shili she khukhwoolelesa shisharonebwa mu makaambila kaabwe shiri: bambiyila busa akhali ilomo yoosi ta.

²⁶“Ne Umuyeeti weenywe ni kane eetse, esi indibakaanisa inywe khukhwaama isi Paapa, Umwoyo uwa ŋali khukhwaama isi Paapa, niye alibamanyisa bibimaamba khus'ise.

²⁷Ni nanywe muryo muli bajulisi baase khulwekhuuba mwabeele ni nase khukhwaama makiboole.”