Read lumasaaba Yokana 16 Bible Online

Yokana 16 - lumasaaba bible

Yokana 16

¹Yesu weloosela waaloma ari, “Naababooleele bino nio mulekhe khuwamo kamaani mu bye khufukiilila khweenywe ta.

²Babaandu kane babekalewo inywe khukhwaama mu ntsu iye khukhwisaayilamo, naluundi imbuka ilyoola isi umuundu yeesi ubeera inywe alyambaasa ari alikho akhola byeesi Wele akana.

³Babaandu balikhola bibiindu bino khulwekhuuba sibaamanya Paapa, namwe sibayiimanya ise ta.

⁴Ne ise nababooleele bino, nio inyaanga iye bikholwa ibyo nga yoolile, mushebulile muri ise nabareewula. “Sinababoolela bibiindu bino byoosi khukhwaama makiboole ta, khulwekhuuba naba nga ndi ni nanywe.

⁵Ne ari ndi khuutsya isi uyo uwandumana. Ne khus'inywe mbaawo namutweela uwundeebile ari, ‘Ulikho wutsya waheena’ ta.

⁶Ne khulwekhuuba naababooleele bibiindu bino, kimyoyo kyeenywe kyetsuule kumutaambo.

⁷Ne mbaboolela mu ŋali ndi, khuutsya khwase khubayeeta nywe. Khulwekhuuba ise ni ndekha khuutsya ta, Umuyeeti s'aliitsa ta. Ne ise n'intsya, indyakaanisa Umuyeeti isi muli.

⁸Umuyeeti uyo n'aliitsa, alyokesanisa buŋaŋafu isi babaandu be mu shiibala khu biwaamba khu byoonako, ni khubiwaamba khu bukwalaafu, ni khukhala khwe kimisaango.

⁹Sibali batuufu khu biwaamba khu byoonako ta, khulwekhuuba sibaafukiilila ise ta.

¹⁰Sibali batuufu khu biwaamba khu bukwalaafu ta, khulwekhuuba ise ndi khuutsya isi Paapa, ni nanywe singane mumbonekho luundi ta.

¹¹Sibali batuufu khu biwaamba khu khukhala khwe kimisaango ta, khulwekhuuba umuwuli uwe shiibala shino, naye baamala khaale khumukhalila kumusaango.

¹²“Ise ishiili ni bibiindu bikali bye khuubaboolela, ne simunyala mwabiwaamba byoosi ari ta.

¹³Ne Umwoyo uwa ŋali n'aliitsa, uyo urumbula bya ŋali bibiwaamba khu Wele, alibaraangilila inywe aboolese mu bya ŋali byoosi. Khulwekhuuba niye s'alikanikha khulwe bunyala bubweewe ta, ne khurusakho ndi alikanikha ibyo byeesi aba wawuliile, naluundi alibaboolela ibyo bibiitsya khubawo.

¹⁴Umweene uyo akhantsisemo ise shiriifwa, khulwekhuuba byeesi alibaboolela inywe, alibyaamisa khu byase.

¹⁵Ibyo byoosi byeesi Paapa ali ni nabyo, bibyase. Nashiryo kila imbaboolela inywe ndi, byeesi Umwoyo alibaboolela inywe, alibyaamisa khu byase.”

¹⁶Yesu weloosela waaloma ari, “Mu mbuka ifwiiti iri, singene mumbone luundi ta; ne kane nga imbuka yabirirekho ifwiiti, kane mumbone.”

¹⁷Batweela khu baleekelwa beewe kila baloma bari, “Shiina kila alikho aloma aryo? Ari mu mbuka ifwiiti singene mumbone ta; naluundi ari mu mbuka ifwiiti kane mumbone? Ari khulwekhuuba ndi khuutsya isi Paapa?”

¹⁸Kila bereeba bari, “Amanyisa shiina ni imbuka ifwiiti? Ifwe sikhumanya sheesi alikho ta.”

¹⁹Yesu washimanya ari bakana khumureeba, kila abalomela ari, “Mulikho mwireeba shiina shisheene sheesi ise imanyisile ninomile ndi, ‘Mu mbuka ifwiiti simunaambona ta, naluundi mu mbuka ifwiiti, kane mumbone?’

²⁰Ilala, ilala, imbaboolela ndi inywe mukhalile luundi mukhaakhupe kimibala, ne shiibala nga shikhoya. Inywe muliba mu mutaambo, ne kumutaambo kwenywe kulikalukha kwikyele kumwikhoyo.

²¹Umukhasi nga wolile mu mbuka iye khusaala, aba mu mutaambo, khulwekhuuba imbuka yeewe iba yoolile. Ne n'amala khusaala, ebilila butsiina khulwe kumwikhoyo kw'omuundu usaalikhile mu shiibala.

²²Ni nanywe muli muryo; ari muli mu mutaambo, ne ise n'indibabona inywe luundi, kimyoyo kyeenywe kiliba ni kumwikhoyo, ate mbaawo ulibarusakho kumwikhoyo kwenywe ta.

²³“Ne shifukhu isho ni shilyoola, simulinoomba shishiindu shoosi ta. Ilala, ilala, imbaboolela nywe ndi, ni muliloomba shishiindu shoosi mu lisiina lyase, Paapa alishibawa.

²⁴Khukhwoolisa ari mushiili khuloomba shishiindu shoosi mu lisiina lyase ta. Ni muloombe, kane mufune, nio kumwikhoyo kwenywe kube kumwitsufu.”

²⁵Yesu waaloma luundi ari, “Ibyo naabibabooleele nga inaambisa tsisimo. Ne inyaanga ineetsa isi ikhalibaboolela nga inaambisa tsisimo ta; nga mbaboolela lubuula bibiwaamba khu Paapa.

²⁶Khu shifukhu isho muliloomba mu lisiina lyase, ne ise s'imbalomela ndi ise ikhabaloombele inywe isi Paapa ta.

²⁷Khulwekhuuba Paapa umweene abakana inywe. Abakana inywe khulwekhuuba inywe mungana ise, naluundi mwafukiilila muri ise naama isi Wele.

²⁸Naama isi Paapa neetsa mu shiibala. Ne ari indikhuulekha shiibala intsya isi Paapa.”

²⁹Baleekelwa beewe baaloma bari, “Ari ulikho uloma lubuula, ne akhuba mu simo ta.

³⁰Ari khwaamanyile khuri wamanya buli shiindu, shiili bari uliinda bakhureebe bireebo nio ta. Khulwa shino, ari khufukiilila khuri iwe waama isi Wele.”

³¹Yesu waabeelamo ari, “Ari mufukiilila?

³²Mu mbuka ikhali iye aleeyi ta, ilala mweesi bakhaabasalanise, nga buli mutweela elukhila ingo weewe, nashiryo muliindekha senyene. Ne s'indi senyene ta, khulwekhuuba Paapa ali ni nase.

³³Nababoolele ibyo, nio mube ni lukoosi, nga mwaramile mu butweela ni nase. Kane shiibala shibareerere khutaambisibwa, ne ni mube banyindaalifu. Ise naamalile khuwula shiibala.”