Read lumasaaba Yokana 17 Bible Online

Yokana 17 - lumasaaba bible

Yokana 17

¹Lwanyuma nga waamalile khuloma ibyo byoosi, Yesu wenyusa tsimoni walola mwikulu waaloma ari, “Paapa, inyaanga yoolile. N'uwe Umwaana woowo shiriifwa, nio Umwaana naye akhuwe iwe shiriifwa.

²Khulwekhuuba iwe wamuwa bunyala khu baandu boosi, uri nio awe babaandu boosi beesi wamuwa, bulamu bubukhawawo ta.

³Bulamu bubukhawawo nikhwo khukhumanya iwe, Wele mutweela yenyene uwa ŋali, ni khumanya Yesu Kristo, isi iwe warumana.

⁴Ise nokesele shiriifwa shoowo khu shiibala, khulwekhuuba namalilisile kumulimo kweesi iwe waamba khukhola mu shiibala.

⁵Ari, Paapa, n'umbe shiriifwa mu moni tsoowo; shiriifwa isho sheesi naba ni nasho atweela ni nawe, nga shiibala shishiili khubawo ta.

⁶“Nokesanisile lisiina lyoowo isi babaandu beesi wabukula mu shiibala waamba ise. Baaba baboowo, ne waababukula wabamaambisa ise. Nabo batsiliile khu shilomo shoowo.

⁷Ari baamanyile bari buli shiindu shoosi sheesi waamba shaama isi iwe.

⁸Khulwekhuuba nase nabawa buurume bweesi iwe waamba ise, ni nabo babwakaanila. Ari baamanyiile ilala bari ise naama isi iwe, naluundi bafukiilila bari iwe niye uwandumana.

⁹“Ari imbaloombela nibo. S'indikho inoombela shiibala ta, ne indikho inoombela abo beesi waamba, khulwekhuuba bali baboowo.

¹⁰Byeesi ndi ni nabyo byoosi bili bibyoowo, naluundi iwe byeesi uli ni nabyo byoosi bili bibyase. Ni shiriifwa shase shokesanisibwa khuubirira mu byeene ibyo.

¹¹“Paapa Umukhosefu, ari ise sishiili mu shiibala ta. Indikho niitsa isi iwe uli. Ne nibo bashiili mu shiibala. N'ubaliinde bwela mu lisiina lyoowo. Lisina ilyo lyeesi iwe waamba ise, nio nabo babe mu butweela nga ifwe ni khuli mu butweela.

¹²Ni naba nga ndi ni nabo, nabaliinda khuubirira mu maani ke lisiina lyoowo, lisiina ilyo lyeesi wamweene waamba ise. Nabatseeta, ni khubona ndi mbaawo n'amutweela uwahela ta, khurusakho uyo abe isi shamanyikha shiri ali ni khukoraana, nio bibyaronebwa bikhosefu byoolelesebwe.

¹³Ari indikho niitsa is'uli. Ne bibiindu bino imbilomela khu shiibala nio akile kumwikhoyo kwase kumwitsufu kunyoolikhane mu myoyo kyaabwe.

¹⁴Nase nabawa ilomo yoowo. Ni khulwashino, shiibala shaababiiyila. Khulwekhuuba sibali be mu shiibala ta, nga ise n'ikhali uwe mu shiibala ta.

¹⁵Shindikho inoomba ndi ubaruse mu shiibala ta, ne njeeba ubatseete khukhwaama isi umusiku.

¹⁶Nga ise nikhali uwe mu shiibala ta, ni nabo sibali be mu shiibala ta.

¹⁷Lekha bwa ŋali bwoowo bubekyelise bakhosefu, khulwekhuuba shilomo shoowo nisho bwa ŋali.

¹⁸Nga iwe ni wandumana ise mu shiibala, ni nase musaambo iyo, nabarumanile mu shiibala.

¹⁹Naluundi khulwekhubeela nibo, ise niwaanayo mu bukhosefu isi iwe, ari nio manya babeene bewaaneyo mu bwa ŋali.

²⁰“Shinoombela bano bonyene ta, ne inoombela ni naabo babakane bafukiilile ise khulwe shilomo sha bano.

²¹Paapa, inoomba ndi boosi babe mu butweela, nga iwe n'uli mus'iise ni nase mus'iiwe. Khali nabo babeele mus'iifwe, nio shiibala shifukiilise shiri iwe wandumana ise.

²²“Shiriifwa sheesi iwe waamba ise, nase nashibaweele, nio nabo babe mu butweela, nga iwe ni nase ni khuli butweela.

²³Ise imbe mu nibo ni nawe mus'iise, nio babeele ilala mu butweela, nio shiibala shimanye shiri iwe wandumana ise, naluundi shimanye shiri ubakana nga n'ungana ise.

²⁴“Paapa, bano wabaamba ise, nase ingana babe ni nase isi ise ndi, nio babone shiriifwa shase, shiriifwa sheesi waamba ise. Khulwekhuuba iwe wangana nga shiibala shishiili khubuumbibwa ta.

²⁵Paapa, Umukwalaafu, shiibala sishakhukhumanya iwe ta. Ne ise naakhumanya, ni babaandu bamanya bari iwe uwandumana.

²⁶Nase naabamanyisile lisiina lyoowo, naluundi kane niloosele khuubamanyisa, nio khuukana khweesi iwe unganamo ise khube mu nibo. Naluundi nio akile ise nase imbe mu nibo.”