Read lumasaaba Yokana 19 Bible Online

Yokana 19 - lumasaaba bible

Yokana 19

¹Lwanyuma Pilato waayila Yesu, waalakila ari bamunyweekhe tsikhoba.

²Basilikhale baalukha lihabi kye kamawa, baalira khu murwe kwa Yesu, baamukwaarisa ni ingubo imbesemu.

³Beetsa isi Yesu baamuloma bari, “Mulembe, Umuyiinga uwe Bayudaaya!” Baryo baamukhupa tsiimbi mu moni.

⁴Pilato waarura luundi ibulafu waaloma Bayudaaya ari, “Bona, ndi khuumurusa, imureera isi muli khuubamanyisa inywe ndi ise s'imubonamo ilomo yoosi, imufunanisa kumusaango ta.”

⁵Yesu waarura ibulafu nga wakwaarire lihabi lye kamawa, ni ngubo imbesemu. Pilato waabaloma ari, “Umuundu mwene niye uyu.”

⁶Khaangukho Basaayi bakhulu ni basilikhale ni baabona Yesu, baayokesela angaaki, baaloma bari, “Mutsaangilile khu musalaba! Mutsaangilile khu musalaba!” Pilato waabaloma ari, “Inywe mwabeene ni mumuyile mumutsaangilile, khulwekhuuba ise s'imbona ilomo, ikila kumusaango kwamufuura ta.”

⁷Ne Bayudaaya baamwiilamo bari, “Ifwe khuli ni likaambila, ni khuulondekhana ni likaambila ilyo, akhiile khuufwa! Khulwekhuuba elaangaatsaka ari niye ali Umwaana wa Wele.”

⁸Ne Pilato n'awulila aryo, weloosela khuurya naabi.

⁹Shikila wenjila luundi mu lwaanyi lwe kimisaango, wareeba Yesu ari, “Iwe waama waheena?” Ne Yesu waalekha khumwiilamo ilomo yoosi ta.

¹⁰Pilato waamureeba ari, “S'unyala waakanikha ni nase ta? Iwe s'umanya uri ise ndi ni bunyala bwe khuukhulekhuula, namwe bwe khuukhutsaangilila khu musalaba ta?”

¹¹Yesu waamwiilamo ari, “Bunyala ubwo bulekha khukhuweebwa khukhwaama angaaki, khali s'ulikho ni bunyala bwoosi nakhafwiiti khus'ise ta. Nashiryo uyo uwuntsakaanisileyo isi iwe, niye uuli ni shishoonako shishifuurisa.”

¹²Ni khukhwaama khu mbuka iyo, Pilato waakhala kamakyesi ke khuulekhuula Yesu. Ne Bayudaaya beloosela khuuyokesela angaaki bari, “Iwe n'ulekhuula umusaani uyu, uba s'uli umusaale wa Kayisaali ta. Umuundu yeesi uwilaanga khuuba umuyiinga, aba akhaandisa Kayisaali.”

¹³Aryo Pilato nga awulila bino, waarusa Yesu ibulafu, wekhala khu shitsoloŋo she khuukhalilakho kimisaango, mu shifwo shishilaangibwa shiri “Kamabaale kamaalile,” namwe mu lulimi Luheburaniya bari, “Gabaza.”

¹⁴Ni shifukhu sheene isho, shaba she khukhwirekekhela Kamayiiya kakalaangibwa kari ke Khuubirakho. Tsyaba tsisaawa nga tsisesaba. Pilato waloma Bayudaaya ari, “Bona umuyiinga weenywe.”

¹⁵Ne nibo baayokesela angaaki bari, “N'umurusewo! N'umurusewo! Mutsaangilile khu musalaba! Mutsaangilile khu musalaba!” Pilato waabareeba ari, “Intsaangilile khu musalaba umuyiinga weenywe?” Nabo basaayi bakhulu belamo bari, “Ifwe sikhuli n'umuyiinga ukuundi ta, akhali Kayisaali yenyene.”

¹⁶Ikhumalilisa, khulwe khuukana khuubasangaasa, Pilato waawaanayo Yesu mu mikhono kyaabwe, ari batsye bamutsaangilile khu musalaba.

¹⁷Ni abweene awo, basilikhale baayila Yesu, nga baamwibotokhelele, baamuliindile lukali. Yesu waarura antsye nga waasutile kumusalaba kweewe umweene, khuutsya mu shifwo shishilaangibwa shiri “Shiifwo she shihaanga,” namwe mu lulimi Luheburaniya bari “Gologosa.”

¹⁸Abweene awo, baamutsaangilila, atweela ni babaandi babili nga bali ni naye. Mutweela khu lubeka lunyeletsi, ukuundi khu lubeka lulayi, nga Yesu ali akari.

¹⁹Ne Pilato aaba waaronile buurone khuubura khu musalaba nga buloma buri, “Yesu uwe Nazareesi, Umuyiinga uwe Bayudaaya.”

²⁰Bakali khu Bayudaaya baasoma buurone buno, khulwekhuuba shifwo mweesi Yesu aatsaangililwamo khu musalaba shaba aambi ni shiriimba. Luundi buurone buno bwaronebwa mu lulimi Luheburaniya, ni mu Lulatini, ni mu Luyonaani.

²¹Lwanyuma Basaayi bakhulu be Bayudaaya baloma Pilato bari, “Ukharona uri ‘Umuyiinga uwe Bayudaaya’ ta, ne rona uli ‘Umusaani yuno elaanga ari umuyiinga uwe Bayudaaya.’ ”

²²Ne Pilato welamo ari, “Ise sheesi imalile khuurona, naaronile.”

²³Basilikhale ni baamala khuutsaangilila Yesu khu musalaba, baabukula tsingubo tseewe, baatsikabananisamo kimikabo kine, buli musilikhale kumukabo mutweela, baaramisa ingubo iye mukari. Ingubo yino yaba imbuufu busa, nga baakilukha busa yoosi.

²⁴Kila basilikhale baloma bonyene bari, “Ingubo yino, khukhakinuulamo ta, ne khakhukipilekho khakokha, khubone naanu ukana akiyile.” Shino sholelesa bibyaronebwa bikhosefu bibiiloma biri, “Bakabanana tsingubo tsase, bakhupa khakokha khulwe shikwaaro shase.” Shino nisho sheesi basilikhale bakhola.

²⁵Bino biba biryo, aambi ni kumusalaba kwa Yesu, babaabawo baaba, maayi weewe, ni yaaya uwa maayi weewe, ni Malyamu umukhasi uwa Kuleopa, ni Malyamu Magadalena.

²⁶Yesu n'abona maayi weewe, atweela n'umuleekelwa abe isi niye akana naabi nga beemikhile awo, kila alomela maayi weewe ari, “Maayi, bona umwaana woowo.”

²⁷Lwanyuma waalomela umuleekelwa tsana ari, “Bona maayi woowo.” Khukhwamila abweene awo, umuleekelwa uyo wamuyila ingo iweewe.

²⁸Lwanyuma lweebyo, Yesu nga waamanyile ari bibiindu byoosi byaweele, ni khukhwoolelesa bibyaronebwa bikhosefu, waaloma ari, “Bulesa bwandya.”

²⁹Aabawo inyuungu nga yetsuule iviini ilulutsile. Baabukula shishangwe, bashisanya mu viini tsana, bashira khu lukholo luleeyi, bashiniinisa bashira khu minwa kya Yesu.

³⁰Ni baamala khuuwa Yesu iviini iyo, waaloma ari, “Shaaweele.” Abweene awo, Yesu wenamisa kumurwe kweewe, waawaanayo kumwoyo kweewe.

³¹Shifukhu isho shaba shifukhu she khukhwirekekhela Kamayiiya ke Khuubirakho. Bayudaaya baatsya baloomba Pilato bari bafuniake bikyele bye babaandu beesi batsaangilila khu misalaba. Bari barusewo ni kimilaambo, kilekhe khuba khu misalaba khu shifukhu sha Sabato ta.

³²Baryo basilikhale beetsa baafuniaaka bikyele bye basaani boombi baabatsaangililwa khu misalaba.

³³Ne ni boola khu Yesu, banyoola nga waamalile khaale khuufwa, balekha khufuniaaka bikyele byeewe ta.

³⁴Ne mutweela khu basilikhale wawuna mu mbafu mwa Yesu ni liifumo. Khaangu akho, mwamamo kamafuki ni kameetsi.

³⁵Umuundu uwabona bino awa bujulisi, ni bujulisi bweewe buli bwa ŋali. Niye wamanya ari byeesi akanikha bili bya ŋali, nio nanywe mufukiilile.

³⁶Khulwekhuuba bino byakholebwa khukhwoolelesa bibyaronebwa bikhosefu biri, “Mbaawo na litweela khu makuumba keewe lyeesi balifuniaaka ta.”

³⁷Ni bibyaronebwa bikhosefu bibiiindi byaloma biri, “Balilola khuuyo esi baawuna lifumo.”

³⁸Lwanyuma lweebyo, Yusufu uwe Alimaseya, naye uwaba umuleekelwa uwa Yesu uwe mushimoonyo busa khulwe khuurya Bayudaaya, waatsya waloomba Pilato ari amufukiilise arusewo kumulaambo kwa Yesu. Pilato n'amufuukiilisa, weetsa wasuta kumulaambo, waatsya ni nakwo.

³⁹Ne Nikodemusi, uweetsa isi Yesu mu shilo makiboole, naye weetsa, nga wareerere bye khukhwihakha bibiwunya bulayi, bibyoolesa tsikilo nga kamakhumi musaafu na tsiraano.

⁴⁰Basaani bano boombi bayila kumulaambo kwa Yesu, bakubowa mu ngubo imiliwu atweela ni bibiwunya bulayi, nga ni yaba isaambo iye Bayudaaya iye khuusiikha.

⁴¹Mu shifwo isho esi Yesu aatsaangililwa aabawo kumukuunda. Mu mukuunda umwo mwabamo iŋani imbya busa, nga abe baakhusiikhatsakamo umufu yeesi ta.

⁴²Mu ŋani yeneeyo nimwo mweesi baalisa Yesu, nga ni yaba abe ili aambi, naluundi shaba shifukhu she Bayudaaya she khukhwirekekhela Kamayiiya.