Read lumasaaba Yokana 2 Bible Online

Yokana 2 - lumasaaba bible

Yokana 2

¹Khu shifukhu shikhola khataru, abawo kamayiiya ke bukhwaale i Kana, mu Galilaaya, ni maayi wa Yesu naye abayo.

²Yesu ni baleekelwa beewe nabo baaba babalaangile khu mayiiya.

³Ne iviini niyawawo, maayi wa Yesu wamuloma ari, “Sibali ni iviini ta.”

⁴Yesu wamulomela ari, “Mukyelemawe, ubeele uryeena ni nase?”

⁵Ne maayi weewe waloma babakaanisi ari, “Ni mukhole shoosi shoosi sheesi kane abalomele.”

⁶Aabawo kamayingu kasesaba ke kamabaale, nga buli litweela litsyamo tsisoongwe nga tsitaru. Kamayingu kano kaaraambisibwa ni Bayudaaya lwe khukhwipyeluusa, nga isaambo yaabwe ni yaba.

⁷Yesu waloma babakaanisi ari, “Ni mwitsuse kamayingu ako ni kameetsi.” Nabo baketsusa khukhwoolela ilala khu minwa.

⁸Lwanyuma waabaloma ari, “Ni mutahekho muyilile umuraangilisi we kamayiiya.” Babakaanisi baatahakho baamuyilila.

⁹Umuraangilisi we kamayiiya n'amuusakho kameetsi ari kakaaba kekyelile iviini, waalekha khumanya isi yaama ta. Ne babakaanisi babaataha kameetsi nibo baaba abe baamanyile. Aryo walaanga umusaani ukhweele, waamwiisa andulo,

¹⁰waamuloma ari, “Buli muundu anyoowa khukaba iviini ifuura bulayi, nio lwanyuma lwayo wesawo ilikho aasi, nga babaandu bekurire. Ne bona iwe waabiikhile iviini indayi inyene khukhwoolesa ari.”

¹¹Khano nikho khabonelo khe kamakaanga kheesi Yesu aanyoowelakho khuukholela i Kana, mu Galilaaya. Aryo wokesanisa shiriifwa sheewe, ni baleekelwa beewe baamufukiililamo.

¹²Lwanyuma lwe'sho, Yesu weekha i Kaperunaumu, nga ali atweela ni maayi weewe, ni bayaaya beewe, ni baleekelwa beewe. Ibweene iyo, baamalayo bifukhu bikyeekhe biri.

¹³Kamayiiya ke Bayudaaya ke Khuubirakho kaaba abe kali aambi khukhwoola, kila Yesu aniina i Yerusalemu.

¹⁴Ne mu Lisaayilo Likhulu wanyoolamo babaandu nga bakulisa tsikhaafu, tsisheese, ni kamawuusi. Ni babaandi nga bekhaale abweene awo, bayuusaŋana tsinusu.

¹⁵Aryo Yesu wabukula kimikosi warukhamo kumusariti, wabatimisa boosi khurura mu Lisaayilo Likhulu, atweela ni tsisheese, ni tsikhaafu. Wahanyaka tsinusu ts'abo babaaba nga bayuusaŋana tsinusu. Wafumalikhaka ni tsimeetsa tsaabwe.

¹⁶Waloma abo babakulisa kamawuusi ari, “Bino ni mubirusewo ano! Shimwaakha mwakalusa intsu ya Paapa wase, mwakikesa khuuba intsu ye khukulaanilamo ta.”

¹⁷Baleekelwa beewe bashebulila bibyaronebwa bikhosefu bibiloma biri, “Libuba lye khukana intsu yoowo liburukha mus'iise nga kumulilo.”

¹⁸Baryo baraangilisi be Bayudaaya bakobolamo Yesu nga bamureeba shireebo bari, “Khabonelo shiina khe kamakaanga kheesi uli ni nakho khukhwokesana khari uli ni bunyala khukhola bibiindu bino?”

¹⁹Yesu wabeelamo ari, “Ni mufuniaake Lisaayilo Likhulu lino, ni nase indilyombekhela mu bifukhu bitaru.”

²⁰Bayudaaya kila bamwiilamo bari, “Lisaayilo Likhulu lino lyayila kimiiko kamakhumi kane na kisesaba khulyombekha, ne iwe unyala khulyombekhela mu bifukhu bitaru byonyene?”

²¹Ne Lisaayilo Likhulu lyeesi Yesu aba nga alomakho, lyaba kumubili kweewe kumweene.

²²Ne n'amala khulamukha khukhwaama mu bafu, baleekelwa beewe bashebulila bari aloma shino. Baryo bafukiilila bibyaronebwa bikhosefu ni bilomo byeesi Yesu aloma.

²³Aryo Yesu n'aba nga ali mu Yerusalemu khu Mayiiya ke Khuubirakho, babaandu bakali bafukiilila lisiina lyeewe, khulwe bubonelo bwe kamakaanga bweesi akhola.

²⁴Ne Yesu walekha khubeyikina ta, lwekhuuba abe wabamanya boosi bulayi.

²⁵Sishekombebwa umuundu yeesi khumuboolela khubiwaamba khu baandu ta, lwekhuuba umweene amanya bibiindu bibyaba mu myoyo kye babaandu.