Read lumasaaba Yokana 20 Bible Online

Yokana 20 - lumasaaba bible

Yokana 20

¹Kumutikhinyi khu shifukhu sha Sabiti, nga antsye ashiili mamiliimili, Malyamu Magadalena waatsya khu ŋani waabona nga baarusile libaale khu ŋani.

²Ni abweene awo, waatima waatsya isi Simoni Petero n'umuleekelwa ukuundi, isi abe Yesu aasiima, waabaloma ari, “Baarusile Umukasya mu ŋani, ne sikhumanya isi bamureere ta.”

³Petero n'umuleekelwa ukuundi tsana uyo, benyukha baatsya khu ŋani.

⁴Boombi baatsya nga batima, ne umuleekelwa ukuundi uyo waatima waalekha Petero. Niye wanyoowa khukhwoola khu ŋani.

⁵Wenama weshenga mu ŋani, waabona tsingubo tseesi abe baabowamo umufu nga tsili aasi, ne niye waalekha khukhwinjilamo ta.

⁶Simoni Petero uwaba waamulondilekho naye weetsa, ne niye wenjila mu ŋani burereefu. Waabona tsingubo abe tseesi baabowamo umufu nga tsili aasi.

⁷Ne shitambaala shishaba khu murwe kwa Yesu shaba nga seshili atweela ni tsingubo tsitsiindi ta. Nisho shaba nga shafuumbibwile shareebwile mu shifwo buraawa.

⁸Lwanyuma umuleekelwa ukuundi uyo, uwanyoowa khukhwoola khu ŋani, naye wenjilamo nio waabona, waafukiilila.

⁹Khulwekhuuba khukhwoolisa ano, abe sibamanyile bibyaronebwa bikhosefu ni biloma biri, alilamukha khukhwaama mu bafu ta.

¹⁰Baleekelwa belayo ingo waabwe.

¹¹Ne Malyamu waarama ibulafu we ŋani nga alila. N'aba nga ashiilila, bari eshenga mu ŋani,

¹²waabona bamalayika babili nga bakwaarire tsingubo tsiwaanga, nga bekhaale isi kumulaambo kwa Yesu kwaba. Umulala imurwe, ukuundi ibikyele.

¹³Baamureeba bari, “Mukhas'iwe, shiina kila ulikho ulila?” Wabeelamo ari, “Baarusile Umukasya wase mu ŋani, ne simanya isi bamureere ta.”

¹⁴N'amala khuuloma aryo, bari eshebukha, waabona Yesu nga weemikhile awo, ne waalekha khumanya ari niye Yesu ta.

¹⁵Yesu waamureeba ari, “Mukhas'iwe, shiina kila ulikho ulila? Ulikho uweentsa naanu?” Malyamu wamwaambasilisa khuuba nga niye uulima mu mukuunda ukwo. Waamuloma ari, “Paapa, noola iwe niye umwinyusilemo, n'umboolele isi umureere, kane intsye imuruseyo.”

¹⁶Yesu waamulaanga ari, “Malyamu!” Malyamu weshebukha waamuloma mu lulimi Luheburaniya ari, “Rabboni!”, Shishimanyisa shili “Umuleekeli.”

¹⁷Yesu waamuloma ari, “Ukhaantsihambakho ta, khulwekhuuba ishiili khuniina mwikulu isi Paapa wase ta. Ne n'utsye isi babandaayase baase, ubaboolele uri indikho iniina isi Paapa wase, naluundi Paapa wenywe, isi Wele wase, naluundi Wele wenywe.”

¹⁸Malyamu Magadalena waatsya waaboolela baleekelwa ari, “Imboone Umukasya!” Naluundi waababoolela bilomo byeesi Yesu aamuboolela.

¹⁹Lwanyuma lwe shifukhu sha Sabiti sheene isho, nga antsye bulikho bwilabula, abe baleekelwa ba Yesu beyikaliile mu ntsu, khulwe khuurya Bayudaaya. Yesu weetsa wabeemamo akari waabaloma ari, “Lukoosi lube ni nanywe.”

²⁰N'amala khuuloma aryo, waabokesa tsimbaaso tsye khu bikalabo byeewe, ni lubaaso lwe mu mbafu. Baleekelwa bekhoya naabi, ni baabona Umukasya.

²¹Yesu waabaloma luundi ari, “Lukoosi lube ni nanywe. Nga Paapa n'andumana ise, ni nase ari imbarumana inywe.”

²²N'amala ibyo, waababiitakho kumuukha, waabaloma ari, “Ni mufune Umwoyo Umukhosefu.

²³Abo boosi beesi kane mwiyakhilatsake bibyoonako byaabwe, kane bibeyakhilwe; ne abo boosi beesi mukane mulekhe khukhwiyakhila bibyoonako byaabwe, singene bibeyakhilwe ta.”

²⁴Mutweela khu baleekelwa liikhumi na babili, ulaangibwa Tomasi, namwe Mukhwana, s'aba ni baashe nga Yesu n'etsa ta.

²⁵Kila baleekelwa baashe bamuboolela bari, “Ifwe khuboone Umukasya.” Ne Tomasi waabaloma ari, “Khurusakho nga naboone tsimbaaso tsye kimisumaali khu bikalabo byeewe; imaambe lulwaala lwase mu mbaaso itso, naluundi nga nakhutiila lulwaala lwase mu lubaaso lwe mu mbafu mweewe, s'inyala naafukiilila ta.”

²⁶Ne lwanyuma lwe bifukhu shinaane, baleekelwa ba Yesu ndi luundi abe beyikaliile mu ntsu, kwaluno nga Tomasi ali ni nabo. Akhaba nga kimilyango kyaba kimikale, Yesu weetsa weema akari aabwe, waabaloma ari, “Lukoosi lube ni nanywe.”

²⁷Waaloma Tomasi ari, “N'ureere lulwaala lwoowo, ulutiile ano. N'ubone tsimbaaso tsye khu bikalabo byase. N'ureere kumukhono kwoowo utiile mu mbafu mwase. Ukhaba ni khukhwiririkana ta, ne n'ufukiilile.”

²⁸Tomasi weelamo ari, “Uli Umukasya wase, naluundi uli Wele wase.”

²⁹Yesu waamureeba ari, “Ufukiilila khulwekhuuba wamboonekho? Nga bali ni tsingabi abo babafukiilila nga bashiili khumbonakho ta.”

³⁰Yesu akhola bye kamakaanga bibiindi bikali mu moni tsye baleekelwa beewe, bibikhaaronebwa mu burone buno ta.

³¹Ne bino byaronebwa nio iwe ufukiilile uri Yesu niye Kristo, Umwaana wa Wele; ni khuubirira mu khufukiilila ukhwo, ube ni bulamu khulweewe.