Read lumasaaba Yokana 21 Bible Online

Yokana 21 - lumasaaba bible

Yokana 21

¹Lwanyuma lwa bino, Yesu weyokesana luundi isi baleekelwa beewe khu ndulo khwe inyaantsa iye Teberiyo. Eyokesana mu saambo yino:

²Simoni Petero, ni Tomasi ulaangibwa Mukhwana, ni Nasanaeli uwe Kana, mu Galilaaya, ni babaana ba Zebedaayo, ni baleekelwa babaandi babili, baaba bali atweela.

³Simoni Petero waabaloma ari, “Ise ndikho intsya khuloba tsinyeeni.” Nabo baaloma bari, “Khakhutsye ni nawe.” Baryo baarura ibulafu, benjila mwikhoŋolo. Ne mu shilo isho shoosi baalekha khuwaambakho shishiindu shoosi ta.

⁴Antsye ni bwasha kumutikhinyi, Yesu wemikha khu ndulo khwe nyaantsa, ne baleekelwa baalekha khumanya bari niye Yesu ta.

⁵Kila Yesu abareeba ari, “Basaale, mulikho na shoosi sheesi muwaambisile?” Baamwiilamo bari, “Taawe.”

⁶Yesu waabaloma ari, “Ni mutuume khatiimba kheenywe khu luwaande luulayi lwe likhoŋolo, kane muwaambe.” Ni baatuuma butiimba benyoola bari sibanyala ni khuubukhweesa ta, khulwe buukali bwe tsinyeeni.

⁷Lwanyuma umuleekelwa abe isi Yesu akana naabi waaloma Petero ali, “Uyo Umukasya!” Simoni Petero n'awulila aryo, webowa ingubo, khulwekhuuba abe waakyabuulemo. Ni abweene awo Petero waasuna mu meetsi.

⁸Baleekelwa babaaramile mwikhoŋolo baamuloondakho, nga bakhweesa khaatimba khakhetsuule tsinyeeni, khulwekhuuba baaba aambi ni khu ndulo khwe nyaantsa. Abe tsimita tsoola nga shitoondo shitweela.

⁹Ne ni boola khu ndulo, babona kamaanda awo nga kalikho kaaburukha, nga khulikho inyeeni, ni kumukaati.

¹⁰Yesu waabaloma ari, “Nimureerekho tsinyeeni tseesi mwaama khuwaamba ari.”

¹¹Simoni Petero waaniina mwikhoŋolo, waakhweesa khatiimba waakhareera khu ndulo. Abe khetsuule tsinyeeni tsimboofu, tsitsoola shitoondo shitweela ni kamakhumi karaano na tsitaru (153). Ne akhaba tsinyeeni tsaba tsingali tsiryo, khatiimba sikhaakhalikha ta.

¹²Yesu waabaloma ari, “Ni mwiitse mulyekho she kumutikhinyi.” Imbaawo na mutweela khu baleekelwa uwaamureeba ari, “Iwe naanu” ta. Boosi baaba baamanyile bari uyo Umukasya.

¹³Yesu waabukula kumukaati, waakubawa; waabawa ni inyeeni nayo musaambo nyene iyo.

¹⁴Kuno nikwo kumuluundi kukwakhola khataru, nga Yesu eyokesana isi baleekelwa beewe, lwanyuma lwe khulamukha khukhwaama mu bafu.

¹⁵Baryo ni baamala khuulya, Yesu waareeba Simoni Petero ari, “Simoni, umwaana wa Yokana, ilala iwe ungana ise khufuurisa bano boosi?” Petero waamwiilamo ari, “Ee, Umukasya iwe waamanya uri ise n'ikhukana.” Yesu waamuloma ari, “N'uliisatsake kamasheese kaase.”

¹⁶Yesu waamureeba luundi ari, “Simoni, umwaana wa Yokana, iwe ungana ise?” Petero waamwiilamo ari, “E e, Umukasya iwe waamanya uri ise ikhukana.” Yesu waamuloma ari, “Ni wayise kamasheese kaase.”

¹⁷Yesu waamureeba kumuluundi kwe khataru ari, “Simoni, mwaana wa Yokana, iwe ungana ise?” Petero waakhalala, bari khulwekhuuba Yesu waamureebile kumuluundi kukuukhola khataru ari, “Iwe ungana ise?” Ne Petero welamo ari, “Umukasya, iwe waamanya buli shiindu shoosi; waamanya uri ise ikhukana.” Yesu waamuloma ari, “Yaayisatsaka kamasheese kaase.

¹⁸Ilala, ilala, ikhuboolela indi, ni waba nga ushiili umusoleeli, wamweene webowatsaka lukhoba, waatsya isi wekanisatsaka. Ne n'ulikyela umusaakhulu, ulikolola kamakhono koowo, umuundu ukuundi busa akhubowe, akhusute akhuyile esi ukhekoomba khuutsya ta.”

¹⁹Yesu aaloma aryo nga okesana isaambo iye khuufwa khweesi Petero alifwamo, nga awa Wele shiriifwa. Yesu n'amala khuuloma aryo, waaloma Petero ali, “Inoondekho.”

²⁰Ne Petero n'eshebukha, waabona umuleekelwa uyo isi Yesu aakana naabi, nga waabaloondelekho. Umweene uyo niye uweyikamilila mu shifuba sha Yesu, nga balikho balya she ashilo. Luundi niye uwaaloma ari, “Umukasya, naanu niye unakhulyamo luwomelo?”

²¹Petero n'amubona, waareeba Yesu ari, “Umukasya, ne yuno?”

²²Yesu waamuloma ari, “Ise n'ingana ndi niye aramewo nga umulamu khukhwoolisa ise n'ingobola, iwe winaanayo shiina? Iwe n'unoondekho.”

²³Lwanyuma bilomo byaafuma mu be buulebe biri umuleekelwa uyo s'alifwa ta. Yesu s'aloma aryo ta, ne akhali aloma ari, “Ise n'ingana ndi aramewo mulamu khukhwoolisa nindikobola, iwe winaanayo shiina?”

²⁴Umuleekelwa mweene uyo niye ulikhumanyisa bujulisi buno, naluundi waaburona bwoosi. Ni nafwe khwaamanya khuri bujulisi bweewe buli bwa ŋali.

²⁵Iliwo bibiindu bibiindi swa busa byeesi Yesu akhola. Ne iba nga buli shitweela shiba shisharonebwa, nambaasa ndi khali ni shiibala shoosi sishandinyalisile khubuusa buurone bwoosi bubwandironewele ta.