Read lumasaaba Yokana 3 Bible Online

Yokana 3 - lumasaaba bible

Yokana 3

¹Aabawo umuraangilisi mutweela, nga bamulaanga bari Nikodemusi, nga ali mu lituuli lye Bafarisaayo naluundi umuraangilisi mu Bayudaaya.

²Shiilo shitweela weetsa isi Yesu, waamuloma ari, “Umuleekeli, khwaamanya khuri iwe umuleekeli uwarumaniwa ni Wele. Khulwekhuuba mbaawo umuundu unyala khuukhola bye kamakaanga byeesi iwe ukhola bino ta, khuurusakho nga Wele ali ni naye.”

³Yesu wamwiilamo ari, “Ilala, ilala, ikhuloma ndi umuundu n'akhasaalibwa kumuluundi kwe khaabili ta, s'anyala khubona Buyiinga bwa Wele ta.”

⁴Nikodemusi waamureeba ari, “Umuundu umukhulu anyala aryeena khusaalikha luundi? Anyala khukhwiilayo munda ya maayi weewe nio wasaalikha kumuluundi kwe khabili?”

⁵Yesu waamwiilamo ari, “Ilala ikhuboolela muŋali ndi, akhali nga umuundu wasaalikhile khuubirira mu meetsi n'Umwoyo, s'anyala wenjila mu Buyiinga bwa Wele ta.

⁶Shishisaalikha khukhwaama mu mibili kye babaandu, shiba shili ni kumubili nga umuundu, ne shishisaalikha khuubirira mu Mwoyo, shiba nga imbewo.

⁷Shikhakhwiyaangisa ta nga ise n'ikhulomeele iwe ndi, ‘Buli mutweela akhiile khuusaalikha bushaakha.’

⁸Imbewo iwuutsa nga itsya buli oosi isi ikanile. Akhaba nga uwulila likono lyayo, ne s'umanya isi ilikho yaama, namwe isi ilikho itsya ta. Nasho shili shitweela busa ni n'oyo yeesi usaalikha nga abirira mu Mwoyo.”

⁹Nikodemusi waareeba ari, “Isho shinyalikha shiryeena?”

¹⁰Yesu waamukobolamo ari, “Ilala, iwe uli umuleekeli mu Isiraeli, ne s'umanya bibiindu bino ta?

¹¹Ikhuwandalasila ilala ndi, ifwe khukanikha khu biindu byeesi khumanyile. Naluundi khuboola khu byeesi khwabona. Ne mbaawo namutweela khusiinywe ufukiilila buurume bweefwe ta.

¹²Ne isi mushilobela khufukiilila nga nakanikhile isi muli khu bye mu shiibala, munyala muryeena mwafukiilila ni kane imbaboolele khu biindu bye mwikulu?

¹³Mbaawo uwaniinakho mwikulu ta, khurusakho uyo uweekha khukhwaama mwikulu, nga niye Umwaana w'Omuundu.

¹⁴“Nga Musa mu mubiimbi n'asuunga angaaki indemu isi babuumba busa, ni musaambo niyo ndweela Umwaana w'Omuundu naye alisuungibwa angaaki.

¹⁵Nio buli mutweela yeesi umufukiililamo abe ni bulamu bubukhawawo ta.

¹⁶“Ne lwekhuuba Wele akana naabi shiibala, kila awaanayo umwaana weewe natweela yenyene, ari nio buli muundu yeesi umufukiililamo alekhe khuhela ta, ne abe ni bulamu bubukhawawo ta.

¹⁷Lwekhuuba Wele s'arumana Umwaana weewe mu shiibala khukhalila shiibala kumusaango ta, ne akhali ndi arumana Umwaana weewe ari awonese shiibala.

¹⁸Uyo yeesi ufukiilila mu Mwaana mbaawo ulimukhalila kumusaango ta; ne uyo yeesi ukhafukiilila mu Mwaana ta, baamala khaale khumukhalila kumusaango. Lwekhuuba siwafukiilila mu lisiina ly'Omwaana wa Wele ta.

¹⁹“Shishaamilakho kumusaango shili shiri: ikhaba nga buwaanga bwayitsa mu shiibala, babaandu baayokesanisa bari bakana shishiilima khuuminyisa buwaanga. Khulwekhuuba bikholwa byaabwe bili bye bubwoonaki.

²⁰Abo boosi babaakhola bye bubwoonaki sibakana buwaanga ta, naluundi babiiyila buwaanga, khulwekhuuba sibakana bye bubwoonaki byaabwe byamanyikhana ta.

²¹Ne uyo ukhola bya ŋali, eetsa isi buwaanga, nio byeesi akhola bibonekhele ilala biri byeesi akhola bili ibyo byeesi Wele akana.”

²²Lwanyuma lwe'byo, Yesu waatsya ni baleekelwa beewe mu shisiintsa she Yuda. Waamenya ibweene iyo, nga abatisa.

²³Ne Yokana naye yaba ali i Ayenoni, shishiili aambi ni Salimu, nga abatisa, khulwekhuuba shiifwo isho shabamo kameetsi kamakali. Babaandu bakali baamutsyayo, waababatisa.

²⁴Abweene awo abe bashiili khuwaamba Yokana khumura mu mapuusu ta.

²⁵Nga bali awo, khukhaandisana khwabalukhwawo, nga batweela khu baleekelwa ba Yokana bakhaandisana n'Umuyudaaya. Abe balikho bakhaandisana khu bye khukhwipyeluusa.

²⁶Kila batsya isi Yokana bamuloma bari, “Umuleekeli, umuundu uwatsana isi waba ni naye shanjelekha sha Yorudaani, uyo isi wakanikhakho, naye ana ari alikho abatisa. Naluundi babaandu boosi balikho batsya isi niye.”

²⁷Yokana wabeelamo ari, “Mbaawo umuundu yeesi unyala khuuba ni shishiindu ta, akhali nga bashimuweele khukhwaama mwikulu.

²⁸Inywe mwabeene muli bajulisi baase, nga ni naloma ndi, ise s'indi niye Kristo ta. Ise narumanibwa khumwinyoowa ibweeni weewe.

²⁹Umusaani ukhweele, aba niye umweene uw'omweha. Ne umusaale w'oyo ukhweele ekhoya naabi, n'ema ambi warekeeresa likono lyooyo ukhweele. Nashiryo ari kumwikhoyo kwase kuli kumwitsufu.

³⁰Niye aakha khukhwiloosela, ne ise naakha khukhwikhilila.”

³¹Uyo uwaama mwikulu aba ali angaaki a buli shiindu; ne uyo uwaama mu shiibala aba uwe mu shiibala, naluundi akanikha khu bye mu shiibala. Ne uyo uwama mwikulu aba ali angaaki a buli shiindu.

³²Niye akanikha khu byeesi aabona naluundi byeesi aawulila, ne she khukhwiyaangisa, mbaawo ufukiilisa byeesi aloma ta.

³³Ne uyo ufukiilisa khuuboola khweewe, aba awandalasa ari Wele ali uwa ŋali.

³⁴Khulwekhuuba uyo isi Wele arumana, akanikha bilomo bya Wele, ni Wele aamuwa Umwoyo weewe mu bwitsufu.

³⁵Paapa akana umwaana weewe, naluundi waamuwaambisa bibiindu byoosi.

³⁶Uyo ufukiilila mu mwaana ali ni buulamu bubukhawawo ta. Ne uyo ukharekeeresa byeesi Umwaana aloma ta, s'alifuna buulamu ta. Khuurusakho ndi, alirama mu shitaambiso shishaama isi Wele.