Read lumasaaba Yokana 4 Bible Online

Yokana 4 - lumasaaba bible

Yokana 4

¹Bafarisaayo baawulila bari Yesu ali khuukalusa naluundi ali khuubatisa baleekelwa bakali khufuura Yokana.

²Akhaba nga Yesu umweene s'abatisa umuundu yeesi ta, khurusakho baleekelwa beewe nibo babaabatisa.

³Yesu n'ashimanyakho aryo, waarura mu Yuda, wakobolayo i Galilaaya.

⁴Nga atsya, waakana khuubirira mu Samariya.

⁵Aryo woola mu shiriimba she mu Samariya, shishilaangibwa shiri Sukure, nga shili aambi ni kumukuunda kweesi Yakobo aawa umwaana weewe Yusufu.

⁶Mu bweenemwo mwabamo isebele ya Yakobo. Ne Yesu n'aba nga waaluwile khu lwe lukyeendo, wikhala aasi aambi n'isebele iyo. Tsisaawa tsyaba nga tsisesaba tsye mwihangilwe.

⁷Lwanyuma umukhasi Umusamariya nga wetsile khutaha kameetsi, Yesu waamuloma ari, “N'umbekho kameetsi inywe.”

⁸Baleekelwa beewe baaba baatsiile mu shiriimba khuukula biilyo.

⁹Umukhasi Umusamariya uyo welamo Yesu ari, “Shinyalikha shiryeena iwe ubeele Umuyudaaya, khukhunoomba ise, umukhasi Umusamariya, kameetsi?” Lwekhuuba Bayudaaya ni Basamariya sibakholakana ta.

¹⁰Yesu waamuloma ari, “Uba nga umanyile shiwaanwa sha Wele nga ni shili, naluundi uba nga umanyile uyo ukhuloombile ari, ‘imbekho kameetsi inywe,’ Iwe wandimuloombile she khuunywa, ni naye yandikhuweele kameetsi kakareera buulamu.”

¹¹Umukhasi wamwiilamo ari, “Paapa, iwe s'uli ni she khuutayila kameetsi ta, naluundi isebele iyi, ili indeeyi naabi, ne kameetsi kano kakaareera buulamu, kane ukaamiise wahe?

¹²Iwe uli uwe angaaki naabi khufuura kuuka weefwe Yakobo uwakhuwa ifwe isebele yino, mweesi niye umweene anywatsaka, ni babaana beewe, atweela ni bibyaayo byaabwe?”

¹³Yesu wamuloma ari, “Umuundu yeesi unywa kameetsi ke isebele yino, bulesa buli mulya luundi.

¹⁴Ne umuundu yeesi unywa kameetsi keesi ise imuwa, buulesa sibulimulya luundi ta. Ilala kameetsi keesi ise imuwa kalikyela mu niye isebele itubukha, nga kamuwa buulamu bubukhawawo ta.”

¹⁵Umukhasi waamwiilamo ari, “Paapa n'umbe kameetsi ako, nio buulesa bulekhe khuundya luundi ta. Naluundi nio indekhe khukhwiitsatsaka ano khuutaha kameetsi ta.”

¹⁶Yesu waamulomela ari, “N'utsye, ulaange umuseetsa woowo, ukobole ano.”

¹⁷Umukhasi kila amwiilamo ari, “Ise s'indi n'umuseetsa ta.” Yesu waamwiilamo ari, “Khuuloma uri s'uli n'umuseetsa ta, waalomele sha ŋali.

¹⁸Lwekhuuba wakhwaalikha khu baseetsa baraano. Ni nooyo esi uli ni naye ari, s'ali umuseetsa woowo ta. Mu shino, waalomele bya ŋali.”

¹⁹Umukhasi waamwiilamo ari, “Paapa, iwe uli umuŋoosi!

²⁰Bakuuka beefwe besaayilatsaka khu lukiingi luno, ne inywe Bayudaaya muloma muri, mu Yerusalemu mwonyene nimwo mweesi khwakha khukhwisaayila.”

²¹Yesu waamuloma ari, “Mukhas'iwe, n'ufukiilile uri imbuka ili khukhwiitsa isi mulisaayila Paapa, akhuba khu lukiingi luno namwe mu Yerusalemu ta.

²²Inywe Basamariya simumanya naanu isi mwisaaya ta, ne ifwe Bayudaaya khumanya isi khwisaaya. Lwekhuuba buwonesi bwama mu Bayudaaya.

²³Ne imbuka ilyoola, ne khanome ndi yoolile khaale, isi babesaaya mu bwa ŋali, balisaaya Paapa mu Mwoyo ni muŋali, khulwekhuuba Paapa akana babaandu babaali nga abo khuumwisaaya.

²⁴Wele ali Umwoyo, nashiryo abo babaamwisaaya, baamwisaaya mu Mwoyo ni mu Ŋali.”

²⁵Umukhasi waamuloma ari, “Uyo isi baamala khuubiitakho tsikhabi (ulaangibwa ari Kristo), alikhukhwiitsa. Ni naye nga weetsile, ifwe alikhuboolela byoosi.”

²⁶Yesu waamuboolela lubuula ari, “Ise niy'oyu isi ulikho ukanikha ni naye.”

²⁷Ni abweene awo, baleekelwa beewe baakobola. Ne beyaanga khuubona nga abe Kristo alikho akanikha n'umukhasi. Ne mbaawo na mutweela uwareeba umukhasi ari shiina sheesi akana, namwe khuureeba Yesu bari lwashiina aba ali khuukanikha ni naye ta.

²⁸Umukhasi waalekha isoongwe yeewe, waakobolayo mu shiriimba, waaboolela babaandu ari,

²⁹“Ni mwiitse mubone umuundu uwumboolele byoosi byeesi ise nakhola. Manya umweene uyu anyala khuuba niye Kristo?”

³⁰Ni abweene awo babaandu bakali baama mu shiriimba baatsya isi Yesu aba.

³¹Ne bino byoosi biba biryo, baleekelwa ba Yesu abe balikho bamwikontselela bari, “Umuleekeli, n'ulyekho biilyo.”

³²Ne niye wabeelamo ari, “Ise ndi ni biilyo byeesi indya, byeesi inywe mukhamanyile ta.”

³³Lwanyuma baleekelwa bekuta bonyene bari, “Manya ikhabawo umuundu umurereere biilyo?”

³⁴Yesu waabaloma ari, “Biilyo byase nikhwo khuukhola sheesi uyo uwanduma akana, ni khukhwoolelesa kumulimo kweewe kweesi aamba.

³⁵Inywe simuloma muri ishiramayo kimyeesi kine nio likyesa lyoole ta? Imbaloma ndi ni mwinyuse tsimoni tseenywe mubone kimikuunda! Kyaamalile khaale khuulaba, kyoolile likyesa.

³⁶Ni aluno, uyo ukyesa balikho bamuwa kumukheemba kweewe, naluundi abuusanisa bibyaamo khulwe buulamu bubukhawawo ta. Nio manya umumiitsi ni nooyo ukyesa banyale khukhwikhoyela atweela.

³⁷Aluno iliwo shilomo shino sha ŋali shishiloma shiri, ‘Mutweela amiitsa, ukuundi wakyesa.’

³⁸Ise nabarumanile khukyesa ibyo byeesi mukhakhalabanila ta. Babaandi busa babaraamba kumulimo, ne inywe mukyesa bibyaama mu maani kaabwe.”

³⁹Bakali khu Basamariya babaama mu shiriimba umwo, bafukiilila mu Yesu khu lwe bujulisi bw'omukhasi uyo uwaaloma ari, “Amboolele byoosi byeesi ise nakhola.”

⁴⁰Baryo Basamariya beene ni beetsa isi Yesu, bamuloomba bari amenyekho ni nabo. Naye warama ibweene iyo khumala bifukhu bibili.

⁴¹Babaandi bakali busa bamufukiililamo khu lwe bilomo byeewe.

⁴²Baryo baloma umukhasi tsana bari, “Ari khufukiilila akhuba bari khu lweebyo byeesi iwe ukhuboolele ta, ne khulwekhuuba fwabeene khwamuwulile, luundi khwaamanyiile ilala khuri umusaani yuno niye Umuwonesi we shiibala.”

⁴³Lwanyuma lwe bifukhu bibili ibyo, Yesu waarurayo waatsya i Galilaaya.

⁴⁴Lwekhuuba Yesu umweene aloma ari, “Umuŋoosi s'ali ni shiriifwa khu shaalo she waabwe ta.”

⁴⁵Aryo n'ola i Galilaaya, babaandu be Galilaaya bamwikhoyela, lwekhuuba baaba baboone buli shiindu sheesi akhola mu Yerusalemu, khu Mayiiya ke Khuubirakho. Nabo baaba batsiile khu mayiiya keene ako.

⁴⁶Yesu ndi luundi wakyeniyakho mu shaalo isho she Kana, mu Galilaaya. Ibweene iyo esi aakalusila kameetsi khukhwikyela iviini. Ne i Kaperunaumu, aabayo umusaani umukhulu mu buwuli, uwe shiriifwa, uwaba n'umusoleeli weewe, nga umulwaale.

⁴⁷Umusaani uyo n'awulila ari Yesu waamile i Yuda wolile i Galilaaya, waatsya isi Yesu ali, waamuloomba ari atsye awonese umusoleeli weewe, lwekhuuba abe atsya khufwa.

⁴⁸Yesu wamuloma ari, “Inywe ni mukhalibona bubonelo bubwiyangisa, ni bye kamakaanga, simulifukiilila na khakyeekhe ta.”

⁴⁹Ne umuundu uwe shiriifwa uyo, waaloma ari, “Musakhulu, ni wiitse khutsye nga umwaana wase ashiili khufwa ta.”

⁵⁰Ne Yesu waamulomela ari, “N'utsye, umusoleeli woowo kane awone.” Umusaani uyo wafukiilila sheesi Yesu aamulomela, waatsya.

⁵¹Ne n'aba nga ashiili khu ntsila atsya, babakaanisi beewe, beetsa bamwakaanana, baamuboolela bari, “Umusooleli woowo waawonile.”

⁵²Kila abareeba tsinyaanga tseesi umusoleeli aawonelamo. Baamuloma bari, “Kamayima kaamururirekho ingoloobe, khu saawa musaafu.”

⁵³Aryo paapa w'omusooleli washebulila ari isaawa nyene iyo, nimwo mweesi Yesu alomela ari, “Umusooleli woowo kane awone.” Ni abweene awo, umusaani uyo umweene ni be mu ntsu mweewe boosi bafukiilila mu Yesu.

⁵⁴Akhano nikho khabonelo khakheyangisa, khe khaabiili kheesi Yesu aakhola nga n'ama i Yuda wiitsa i Galilaaya.