Read lumasaaba Yokana 5 Bible Online

Yokana 5 - lumasaaba bible

Yokana 5

¹Lwanyuma lwe'byo, Yesu waniina i Yerusalemu, khubayo khu mayiiya ke Bayudaaya.

²Ne mu Yerusalemu, aambi ni kumulyaango kwe kamasheese aabawo liitibo, lililaangibwa mu lulimi Luheburaniya bari, “Besuzasa,” nga lilikho bikonelo biraano.

³Ne mu byeene ibyo, mwakonatsakamo balwaale bakali, nga mulimo baabofu, baleme, ni babakataala, nga baliindiilila kameetsi khuukululukha.

⁴Lwekhuuba abe Malayika w'Omukasya ekhatsaka mu litibo ilyo mu mbuka ikhali ndweela ta, waakulula kameetsi. Ari buli uyo uwanyoowa khuukwamo nga kameetsi kaakululukhile, awonesebwatsaka bulwaale bwoosi bweesi aaba ni nabwo.

⁵Ne yabayo umusaani uwaba walwaala khuumala kimiiko kamakhumi kataru na shinaane.

⁶Ne Yesu n'amubona nga waakonele awo, naluundi waamanya ari waamala awo imbuka indeeyi nga afwaana aryo, waamureeba ari, “Ukana uwonesebwe?”

⁷Umusaani umulwaale wiilamo ari, “Musakhulu, s'indikho n'umuundu yeesi unyala khukhuunjeeta khukhuuntsikhisa mwitibo, nga kameetsi kaakululukhile ta. Ise n'imba nga ndi khuutsya khukwamo, inyoola nga umuundu ukuundi wanyoowele khukhwikhamo khaale.”

⁸Aryo Yesu waamuloma ari, “Yinyukha, usute bulili bwoowo, ukyeende.”

⁹Khaangu akho, umusaani waawona, waasuta lusaamba lweewe, waakyeenda. Ne khu shifukhu khweesi bino byakholekhelakho, shaba shifukhu sha Sabato.

¹⁰Kila Bayudaaya baloma umusaani mweene uwawonesebwa bari, “Shili she kumusilo iwe khuusuta lusaamba lwoowo, khulwekhuuba shaleelo luli lwa Sabato.”

¹¹Umusaani uyo wabeelamo ari, “Umusaani uwumbonisile anomele ari suta lusaamba lwoowo ukyeende.”

¹²Nabo bamureeba bari, “Naanu umweene uyo, ukhulomele ari suta lusaamba lwoowo ukyeende?”

¹³Ne umusaani uwawonesebwa s'amanya oba naanu ta, khulwekhuuba Yesu aba warurilewo, khulwe bukali bwe babaandu babaabawo mu shifwo sheene isho.

¹⁴Lwanyumakho, Yesu waanyoola umusaani uwatsana mu Lisaayilo Likhulu, waamuloma ari, “Bona ari waawonisibwile. Ukheelayo wonaka luundi ta, khulwekhuuba shishiindu shishiminyisakho buubi shinyala shakhukholekhakho.”

¹⁵Umusaani uyo wenyukha waatsya waaboolela Bayudaaya ari Yesu niye uwamuwonesa.

¹⁶Shiryo shaakila Bayudaaya bakubyeenga Yesu, khulwekhuuba aawonesa umulwaale khu Sabato.

¹⁷Ne Yesu waabeelamo ari, “Paapa wase araamba khukhwoolisa ni aluno ari, ni nase inaamba.”

¹⁸Shino shaakila Bayudaaya beloosela khuukhalawo bari bamwiire. Khulwekhuuba sishaba ndi oneka khulwe khufuniaaka likaambila lya Sabato shonyene ta, ne ni khukhwiileekhaasa khu Wele, nga aloma ari Wele ali Paapa weewe.

¹⁹Awo Yesu wabeelamo ari, “Ilala, ilala, imbaboolela ndi, Umwaana s'anyala khukhola shishiindu shoosi khubweewe ta, khurusakho akhola sheesi abona Paapa weewe nga n'akhola. Khulwekhuuba shoosi sheesi umwaana abona Paapa weewe nga akhola, n'Umwaana naye akhola.

²⁰Khulwekhuuba Paapa akana umwaana weewe, aryo wamwokesa byoosi byeesi akhola, naluundi alimwokesa kimilimo kikiindi kimikali kikifuura kino, ni nanywe mwiyange.

²¹Khulwekhuuba nga Paapa n'alamusa baafu wabawa buulamu, n'umwaana naye aryo awa abo beesi aroboole buulamu.

²²Naluundi Paapa s'akhalila umuundu yeesi kumusaango ta, ne akhali wawa Umwaana bunyala bwoosi, khukhala kimisaango.

²³Nio akile boosi bawe Umwaana shiriifwa, nga ni bawa Paapa shiriifwa. Umuundu yeesi ukhawa Umwaana shiriifwa ta, s'anyala wawa Paapa uwarumana Umwaana shiriifwa ta.

²⁴“Ilala imbaboolela ndi, umuundu yeesi uwulila shilomo shase, naluundi waafukiilila uyo uwandumana, ali ni buulamu bubukhawawo ta. Ni naye sibali mukhalila kumusaango ta. Khulwekhuuba waakhalisa khaale khukhwaama mu khufwa, wenjila mu bulamu.

²⁵Ilala, ilala, imbaboolela ndi imbuka iliitsa, khanome ndi yoolile, isi baafu baliwulila likono ly'Omwaana wa Wele. Ni naabo babaaliwulila, baliba balamu.

²⁶Khulwekhuuba Paapa umweene nga n'ali shisina she buulamu, aryo wawa Umwaana naye khuuba shisina she buulamu,

²⁷Naluundi wamuwa bunyala khukhala kimisaango, khulwekhuuba ali Umwaana w'Omuundu.

²⁸Shino shikhabeyangisa ta, khulwekhuuba imbuka ili khukhwiitsa esi abo boosi babaali mu ŋani baliwulila likono lyeewe,

²⁹barure ibulafu we tsiŋani. Abo babaakholatsaka bilayi balilamukhila buulamu, ne abo babaakholatsaka biibi, balilamukhila kumusaango.

³⁰“Ise mu bunyala bwase shinyala khuukhola shishiindu shoosi ta. Ne ise ikhala busa kumusaango nga Paapa n'anomela. Nashiryo khuukhala kumusaango khuno khuli khwa ŋali, khulwekhuuba ise s'imeentsa khuukhola bibyase khu bwase busa ta, ne njeeba sheesi uyo uwandumana akana.

³¹Ne n'imba nga imanyisa bibyase khubwase, aba khuumanyisa khwase sikhuba khwa ŋali ta.

³²Ne aliwo ukuundi umanyisa bibimaamba khus'ise, ni nase imanya ndi ibyo byeesi amanyisa khus'ise bili bya ŋali.

³³Inywe mwarumana baarume isi Yokana, ni naye waababoolela bibiwaamba khu ŋali.

³⁴Ne ise sinimalila khukhuboola khw'omuundu khukhuwaamba khus'ise ta, ne akhali ise inoma bino nio akile inywe muwonesebwe.

³⁵Yokana aba niye itaala iyaburukha yakhoselela naabi. Ni nanywe mu mbuka ifwiiti mwakanakho khusangaalila buwaanga bweewe.

³⁶Ne aliwo shishiindu shishifuura Yokana bukhulu shishinganikhakho khwiise, sheesi imanyisa ndi nikyo kimilimo kyeesi Paapa amba khukhola, kimyeene ikyo kyeesi ise ikhola, khukhwokesana nga Paapa niye uwandumana.

³⁷Ni Paapa uwandumana ise niye umweene uboola bibimaamba khwiise, akhaba nga inywe simwawulila likono lyeewe ta, namwe simwamubonakho nga n'afwaana ta.

³⁸Ni shilomo sheewe sishili mus'iinywe ta, khulwekhuuba simufukiilila uyo esi Paapa arumana ta.

³⁹“Muwentselesa mu byaronebwa bikhosefu khulwekhuuba mwaambaasa muri, mulinyoola buulamu bubukhawawo ta, khuubirira mu nibyo. Ne mwalekha khumanya muri mu byaronebwa ibyo, mulimo bibileekela khus'ise ta.

⁴⁰Ne inywe simukana khukhwiitsa isi ise ndi, nio akile mufune buulamu ta.

⁴¹Ise shiniweentsela shiriifwa khukhwaama mu baandu ta.

⁴²Ne inywe ise naabamanya bulayi naabi. Mu myoyo kyeenywe simulikho ni khuukana Wele ta.

⁴³Ise neetsa mu lisiina lya Paapa, ne inywe simwayifukiilila ta. Ne singa ukuundi etsa mu lisiina lilyeewe umweene, kane mumufukiilile.

⁴⁴Munyala muryeena khuufukiilila ni muba nga mukana khuwebwa shiriifwa mwenyene na mwenyene, ne nga simuweentsa shiriifwa shishaama isi Wele, uyo yenyene uli Wele ta?

⁴⁵“Mukhambaasa muri ise niye ulibawabilayo isi Paapa ta. Ne Musa isi mwaramo bubwiyikinwa bwenywe niye ulibawabilayo.

⁴⁶Muba nga mumwafukiilila Musa, khali ni nase mufukiilile, lwekhuuba Musa arona bibimaamba khus'ise.

⁴⁷Ne noola simufukiilila byeesi niye arona ta, munyala muryeena khufukiilila bilomo byeesi ise inoma?”