Read lumasaaba Yokana 6 Bible Online

Yokana 6 - lumasaaba bible

Yokana 6

¹Lwanyuma lw'ebyo, Yesu waambukha waatsya injelekha we nyaantsa Galilaaya, isi balaanga bari Tiberiya.

²Babaandu bakali baamuloondakho, khulwekhuuba abe baaboone bye kamakaanga bye khuuwonisa balwaale, byeesi Yesu aakhola.

³Yesu waniina khu lukiingi wekhala iyo ni baleekelwa beewe.

⁴Ne Kamayiiya ke Bayudaaya ke Khuubirakho abe kali aambi khukhwoola.

⁵Yesu n'enyusa tsimoni waabona babaandu bakali nga beetsa is'ali. Kila areeba Filipo ari, “Kane khukule waheena biilyo bibinyala byaliisa babaandu bano boosi?”

⁶Aaloma aryo khuukhakilisa Filipo, khulwekhuuba abe niye umweene waamanyile sheesi atsya khukhola.

⁷Filipo wamwiilamo ari, “Khuunyalisa buli mutweela khuulyakho khakhaandu khakhaba khakyeekhe khari, kane shiyile tsidinari tsitsoola nga bitoondo bibili nio biilyo bimale.”

⁸Mutweela khu baleekelwa ba Yesu, ulaangibwa Andereya, nga niye wandaaye uwa Simoni Petero, waaloma ari,

⁹“Iliwo ano umusoleeli mutweela uli ni kimikaati kye ŋaano kiraano, ni tsinyeeni tsibili. Ne khu baandu bano boosi, bino kane bikhole shiina?”

¹⁰Yesu waaloma ari, “Ni mulomele babaandu bekhale aasi.” Khulwekhuuba abawo bunyaasi bukali mu shisiintsa isho. Babekhala aasi abe boolesa nga basaani bikana biraano.

¹¹Lwanyuma Yesu wabukula kimikaati ikyo, wakiloombela tsikhabi. Nga waamalile, wakikabila babaaba bekhaale aasi. Wakhola shitweela ni tsinyeeni khukhwoolisa boosi baalya bekura nga ni bakana.

¹²Ne boosi ni baamala khuulya bekura, Yesu waalomela baleekelwa beewe ari, “Ni mubuusanise buubuya buburamiilekho, nio alekhe khubawo shishiindu shoosi shishonekha ta.”

¹³Baryo baabuusanisa buubuya, betsusa bibiipo liikhumi na bibili.

¹⁴Babaandu babaabawo ni baabona khaabonelo khe kamakaanga khano kheesi Yesu aakhola baaloma bari, “Ilala, oyuno niye umuŋoosi isi abe khuliindiilila khukhwiitsa mu shiibala.”

¹⁵Ne Yesu n'ashimanya ari baneetsa bamuwaambe ni kamaani bamwikyese umuyiinga, waabarurakho wilooselayo luundi yenyene, waatsya mu ngoongo.

¹⁶Imbuka ni yoola iye angoloobe, baleekelwa beewe beekha, baatsya khu nyaantsa.

¹⁷Baniina mu likhoŋolo, baatsya bambukha i Kaperunaumu. Antsye abe bwilabuule, ne Yesu abe ashiili khukhwoola isi bali ta.

¹⁸Abweene awo abe inyaantsa yananikhile khukululukha, khulwekhuuba abe imbewo ilikho iwuutsa ingali.

¹⁹Ne ni baaba nga batsiile ni likhoŋolo khumala tsi kilomita nga tsitaru namwe tsine, babona Yesu nga akyeendela khu meetsi nga etsa aambi ni likhoŋolo. Buuri bwabawaamba.

²⁰Ne Yesu waabaloma ari, “Mukharya ta. Ise niye uwiitsa.”

²¹Bakana bari engile mu likhoŋolo, ne lubaluba lyoola shanjelekha khu lwoomu abe isi balikho batsya.

²²Ne ni bwasha kumutikhinyi, babaandu babaaba isi likhoŋolo lyaama nio lyambukhe shanjelekha, bashebulila bari abawo likhoŋolo litweela lyonyene. Naluundi bashebulila bari Yesu s'atsiilamo atweela ni baleekelwa beewe ta, akhali nibo baatsya bonyene.

²³Akhali ndi abawo kamakhoŋolo kakaandi kakaama i Tiberiya, keetsa khu ndulo khwe nyaantsa, aambi ni mu shifwo mweesi baaliila kimikaati, kyeesi abe Umukasya amalile khuloombela ikhabi.

²⁴Nashiryo ni baabona bari Yesu s'aliyo ta, akhaba baleekelwa beewe, babaandu baniina mu makhoŋolo baatsya i Kaperunaumu, nga baweentsa Yesu.

²⁵Ne babaandu ni banyoola Yesu shanjelekha we inyaantsa, bamureeba bari, “Umuleekeli, woolile ino liina?”

²⁶Yesu waabilamo ari, “Ilala, ise imbaboolela ndi, simulikho mumeentsa khulwekhuuba mwabona bye kamakaanga ta. Ne akhali ndi khulwekhuuba mwalya kimikaati mwekura.

²⁷Mukhamalila kamaani khu biilyo bibibola ta, ne akhali ndi ni mumalile kamaani khu biilyo bibikhawawo bye buulamu bubukhawawo ta. Ibyo nibyo byeesi kane Umwaana w'Omuundu abawe. Khulwekhuuba umweene uyo wamala khufukiilisibwa ni Wele Paapa.”

²⁸Nio baamureeba bari, “Kane khukhole khuryeena, nio khube nga khwoolelesile isho sheesi Wele akana khukhole?”

²⁹Yesu wabeelamo ari, “Sheesi Wele akana mukhole, nikhwo khufukiilila muuyo isi amala khurumana.”

³⁰Kila bamureeba bari, “Khabonelo shiina kheesi kane ukhole khubone, nio khukhufukiililemo? Unakhola khabonelo khe kamakaanga shiina?

³¹Bakuuka beefwe nga bali mu mubiimbi, baalya maanu, nga ni sharonebwa mu byaronebwa bikhosefu shiri, ‘Aabawa biilyo khukhwaama mwikulu ari balye.’ ”

³²Yesu wabeelamo ari, “Ilala, ilala, imbaboolela ndi s'ali Musa niye uwabawa biilyo khukhwaama mwikulu ta, akhali ndi Paapa wase niye uwabawa biilyo bya ŋali bibyaama mwikulu.

³³Khulwekhuuba biilyo byeesi Wele abawa nibyo ibyo bibiikha aasi khukhwaama mwikulu, naluundi byareera buulamu mu shiibala.”

³⁴Nabo baamwiilamo bari, “Umukasya, n'ukhuwaatsake ifwe biilyo ibyo busheele.”

³⁵Yesu waabaloma ari, “Ise nibyo biilyo bye buulamu. Uyo yeesi uwiitsa isi ise ndi, intsala s'ili mulya ta. Naluundi uyo ufukiilila mus'iise, bulesa sibulimulya ta.

³⁶Nga ise n'imbaboleele inywe, akhaba nga mwamboone, ne shitweela busa simukana khufukiilila mus'iise ta.

³⁷Buli uyo yeesi isi Paapa amba kane etse is'indi. Ne uyo yeesi uwiitsa is'indi, nase imwakaanila.

³⁸Khulwekhuuba ise sineekha khukhwaama mwikulu khukhola byeesi samweene ingana ta, ne akhali khukhola by'oyo uwanduma, byeesi akana.

³⁹Uwanduma sheesi akana nisho shino: ari ikhakosaasakho na mutweela kh'ubo beesi amba ta. Ne akhali ari imbalamuse boosi khu shifukhu shimaliilisi.

⁴⁰Khulwekhuuba shino nisho sheesi Paapa wase akana, ari buli muundu yeesi ubona Umwaana naluundi wamufukiilila, ari abe ni bulamu bubukhawawo ta. Ni nase indimulamusa khu shifukhu shimaliilisi.”

⁴¹Shino shaakila Bayudaaya beŋuluŋuunya, bari lwekhuuba abe Yesu walomile ari, “Ise niye biilyo bibyaama mwikulu byeetsa aasi.”

⁴²Kila baloma bari, “Uyuno s'ali Yesu, umwaana uwa Yusufu? Sikhwaamanya paapa weewe ni maayi weewe? Ari anyala aryeena waaloma ari ekha aasi khukhwaama mwikulu?”

⁴³Yesu waabeelamo ari, “Mukheŋuluŋuunya mwenyene na mwenyene ta.

⁴⁴Mbaawo umuundu unyala khukhwiitsa is'indi ta, khurusakho nga paapa uwanduma wamureerire is'indi. Ni nase indilamusa umuundu uyo khu shifukhu shimaliilisi.

⁴⁵Baŋoosi baarona bari, ‘Wele alibaleekela boosi.’ Buli muundu yeesi urekeeresa, naluundi weyika khukhwaama khu paapa, etsa is'indi.

⁴⁶Ne s'ili bari iliwo uwabonakho khu Paapa ta, khurusakho uyo uwama isi Wele, uyo niye waabonakho Paapa.

⁴⁷Ilala, imbaboolela ndi uyo ufukiilila, ali ni bulamu bubukhawawo ta.

⁴⁸Ise indi biilyo bibireera buulamu.

⁴⁹Akhaba nga baakuuka beenywe nga bali mu mubiimbi baalya maanu, ne bakyelawo baafwa.

⁵⁰Ne bino nibyo biilyo bibiikha aasi khukhwaama mwikulu, nio buli muundu yeesi ubilyakho alekhe khufwa ta.

⁵¹Ise indi biilyo bibireera buulamu, bibyeekha aasi khukhwaama mwikulu. Umuundu yeesi ni kane alye khu biilyo bino, kane abe umulamu biilo ni biilo. Naluundi biilyo byeesi kane imbe shiibala nio akile shibe ni bulamu, nikwo kumubili kwase.”

⁵²Ni abweene awo abalukhawo khukhaandisana akari e Bayudaaya boonyene na boonyene nga baloma bari, “Umusaani uyu anyala aryeena khukhuwa ifwe kumubili kweewe ari khulye?”

⁵³Yesu waabaloma ari, “Ilala, ilala, imbaboolela ndi ni mulekha khuulya kumubili kw'Omwaana w'Omuundu, mwalekha ni khuunywa kamafuki keewe, singene mube ni bulamu mus'iinywe ta.

⁵⁴Uyo yeesi ulya kumubili kwase, wanywa ni kamafuki kaase, aliba ni bulamu bubukhawawo ta, ni nase indimwinyusa ekyele umulamu khu shifukhu shimaliilisi.

⁵⁵Khulwekhuuba kumubili kwase kuli biilyo bya ŋali, ni kamafuki kaase niko she khuunywa sha ŋali.

⁵⁶Umuundu ulya kumubili kwase, wanywa ni kamafuki kaase, aba amenya mus'iise, ni nase imba imenya mu niye.

⁵⁷Nga ise n'indi umulamu khulwekhuuba Paapa uwanduma ali umulamu, aryo naye umuundu ulya kumubili kwase aliba umulamu khu lwase.

⁵⁸Nashiryo bino nibyo biilyo bibyeekha aasi khukhwaama mwikulu. Sibili nga byeesi baakuuka beenywe baalya ta. Khulwekhuuba bakyelawo baafwa. Ne uyo ulya khu biilyo bino, aliiba umulamu biilo ni biilo.”

⁵⁹Bino Yesu abilomela i Kaperunaumu, nga ali mu ntsu iye khukhwisaayilamo aleekela.

⁶⁰Bakali khu baleekelwa beewe ni baawulila bino, kila baloma bari, “Khuuleekela khuno khuli khwe saambo imaangafu naabi. Naanu unyala khuurekeeresa bino?”

⁶¹Ne akhaba nga mbaawo uwaboolela Yesu ta, ne umweene waamanya busa ari baleekelwa beewe balikho beŋuluŋuunya khu shiindu shino. Kila abalomela ari, “Shisheene isho shonyene shaabamalilemo kamaani?

⁶²Ne siinga mubona Umwaana w'Omuundu nga aniina atsya isi aaba makiboole?

⁶³Umwoyo uwa Wele niye ukaba buulamu; khulwekhuuba kamaani ke kumubili kw'omuundu mbaawo sheesi kakhola ta. Bino byeesi imbaboolela bireera Umwoyo uwa Wele, naluundi bireera buulamu.

⁶⁴Ne iliwo batweela khus'inywe babaakhafukiilila ta.” Khulwekhuuba Yesu aamanyilawo khukhwaama makiboole abo babaakhafukiilila ta, akhaba ni n'oyo abe wutsya khumulyamo luwomelo.

⁶⁵Yesu waabalomela ari, “Shishikilile kila imbaboolela ndi, mbaawo umuundu na mutweela unyala khukhwiitsa is'indi ta, khurusakho nga Paapa wamunyalisiile khushikhola.”

⁶⁶Khulwe shisheene isho, khukhwaama abweene awo, bakali khu baleekelwa beewe bamururakho, balekha khukyendatsaka ni naye luundi ta.

⁶⁷Lwanyuma Yesu wareeba liikhumi na babili ari, “Ne inywe? Ni nanywe mukana khuutsya?”

⁶⁸Simoni Petero wamukobolamo ari, “Umukasya, ne ndi khuba khuutsya isi naanu? Bona iwe uli ni bilomo bibireera buulamu bubukhawawo ta.

⁶⁹Naluundi ifwe khwafukiilile nga khumanya khuri iwe Umukhosefu uwama isi Wele.”

⁷⁰Yesu welamo ari, “S'ali ise samweene niye uwabarobola inywe liikhumi na babili? Ne mutweela khus'inywe ali Sitaani.”

⁷¹Yesu aba akanikha khu Yuda, umwaana wa Simoni Isikalyoti. Khulwekhuuba akhaba nga aba mutweela khu liikhumi na babili, abe niye wutsya khulya mu Yesu luwomelo.