Read lumasaaba Yokana 7 Bible Online

Yokana 7 - lumasaaba bible

Yokana 7

¹Lwanyuma lw'ebyo, Yesu waakyeendakakho mu Galilaaya, ne waalekha khukana khuukyenda mu Yuda ta, khulwekhuuba abe Bayudaaya baakhalile kamakyesi ke khuumwiira.

²Ne kamayiiya ke Bayudaaya ke Tsiweema nga kali aambi khukhwoola,

³babandaaye ba Yesu baamuloma bari, “N'urure ano utsye i Yuda, nio baleekelwa boowo b'eyo nabo babone kimilimo kyoowo kyeesi ukhola.

⁴Khulwekhuuba mbaawo ukholela shishiindu shoosi mu khwibisa, ate nga akana shimanyikhe mu lubuula ta. N'uba nga ukhola bibiindu bino, ni wiyokesanise isi shiibala.”

⁵Khulwekhuuba ni bayaaya beewe babeene sibaamufukiililamo ta.

⁶Aryo kila Yesu abaloma ari, “Isaawa yase inyene ishiili khukhwoola ta, ne inywe mwaambaasa muri isaawa yoosi iba niyo inyene iyo.

⁷Shiibala seshinyala shababiiyila inywe ta. Ne shayimbiiyila ise khulwekhuuba ise nokesanisa ndi kimilimo kyasho kili kimibi.

⁸Inywe mwabeene ni muniine mutsye khu mayiiya. Ise s'inaniinayo ari ta. Khulwekhuuba isaawa yase inyene ishiili khwoola ta.”

⁹Aryo n'amala khuubaboolela ibyo, umweene waarama i Galilaaya.

¹⁰Lwanyumakho babandaaye ba Yesu ni baamala khuuniina baatsya khu mayiiya, naye aryo waatsya yenyene, akhuba mu lubuula ta, ne mu shimoonyo busa.

¹¹Bayudaaya baamuweentsa khu mayiiya nga bareebana bari, “Umusaani uwatsana ali waheena?”

¹²Aabawo khukhwimoonyelesa khukali mu baandu, nga balala baloma bari, “Ali umuundu umulayi,” ne babaandi bari, “Taawe, akosaasakosaasa babaandu.”

¹³Ne alekha khubawo umuundu uloma lubuula ta, khulwe khuurya Bayudaaya.

¹⁴Ne kamayiiya ni kaaba koolile shinakari, Yesu waaniina mu Lisaayilo Likhulu, wananikha khuleekela.

¹⁵Bayudaaya beyaanga nga baloma bari, “Umusaani yuno buleekele buno abufuna aryeena, ate nga ashiili khufunakho khusoma ta?”

¹⁶Yesu waabeelamo ari: “Khuuleekela khuno sikhuli khukhwase ta, ne khuli khwoyo uwandumana.

¹⁷Umuundu yeesi n'akana khuukhola byeesi Wele akana, alimanya oba nga khuleekela khwase khuno khwaama isi Wele, namwe oba nga ise inganikha khulwe bunyala bubwase samweene.

¹⁸Uyo ukanikha khulwe bunyala bubweewe umweene, aba ewentsela shiriifwa umweene. Ne uyo uweetsa shiriifwa sh'oyo uwamurumana, aba uwa ŋali, naluundi s'abamo ni bubwoonaki ta.

¹⁹Musa s'abawa inywe kamakaambila? Ne mbaawo namutweela khus'inywe ukawaamba ta. Khulwashiina mukhakakho khukhuntsira?”

²⁰Wanamuundu waamwiilamo ari, “Iwe ulikho kimisaambwa! Naanu ukana khukhwiira?”

²¹Yesu waabilamo ari: “Inakhola kumulimo mutweela nanywe mwiyange.

²²Musa niye uwabawa shilomo she khukhwinjila imbalu (ne akhaba nga yaama isi baakuuka, akhuba isi Musa ta), ne inywe musheba umuundu akhaba ni khu shifukhu sha Sabato.

²³Noola musheba umwaana imbalu khu Sabato, nio kamakaambila ka Musa kalekhe khukhwonakisibwa ta, khulwashiina muukhalalila ise bari khulwekhuuba nawonesele umuundu khu Sabato?

²⁴Mukhakhalatsaka kumusaango nga mwiima khu biindu bye khu ngaaki byeesi mubona ni tsimoni ta, ne ni mube baŋali mu khukhala kumusaango.”

²⁵Mu mbuka nyene iyo, balala khu baandu be mu Yerusalemu baareeba bari, “Uyuno s'ali niye umuundu esi baweentsa khukhwiira?

²⁶Ne bona ali ano akanikha lubuula nga mbaawo sheesi bamukholakho ta. Inyala khuuba iri bawuli ilala bamanyile nga niye Kristo?

²⁷Ne ifwe kwamanya isi umusaani yuno ama. Kristo n'aliitsa, mbaawo ulimanya isi ama ta.”

²⁸Ne Yesu n'aba nga ashileekela mu Lisaayilo Likhulu, waalomela angaaki lukali ari, “Ilala mwayimanya ise? Ni esi naama mwamanyayo? Ise sinayitsa khu lwase samweene ta. Ise nayitsa khu lwooyo uli uwa ŋali, uwandumana ise. Inywe simwamumanya ta.

²⁹Ne ise namumanya, khulwekhuuba naama is'ali, naluundi niye uwandumana ise.”

³⁰Lwanyuma lwa bino bakhakakho khumuwaamba, ne mbaawo namutweela uwamutiilakho kumukhono ta, khulwekhuuba abe isaawa yeewe inyene yaba ishiili khukhwoola ta.

³¹Akhaba nga byaba biryo, ne bakali khu lituuli lye babaandu bamufukiilila, nga baloma bari, “Kristo n'aliitsa, alikhola bubonelo bukali khufuura umusaani yuno bwakhola?”

³²Bafarisaayo bawulila babaandu nga bekuta khu biindu bibiwaamba khu Yesu. Baryo Bafarisaayo tsana ni Basaayi bakhulu barumana basilikhale be Lisaayilo Likhulu, bari bamuwaambe.

³³Ne Yesu waaloma ari, “Indi ni nanywe imbuka yino injeekhe, ne lwanyuma intsye isi uyo uwandumana.

³⁴Mulimbeetsa ne simulinyoola ta, ni isi ndiba simunyala mwetsayo ta.”

³⁵Lwanyuma Bayudaaya baloma bonyene na bonyene bari, “Umusaani uyu akana khuutsya ena isi khukhanyala khwamunyoolela ta? Manya akana khuutsya mu Bayudaaya babasalanila mu Buyonaani, atsye aleekele Bayonaani?

³⁶Amanyisile shiina ni lomo isi alomele ari, ‘Mulimbeetsa ni simulinyoola ta,’ luundi ari, ‘Isi ise intsya simunyala mwetsayo ta.’ ”

³⁷Khu shifukhu shishimaliilisayo she kamayiiya, luundi nga nisho shishifuura bukhulu, Yesu wiima walangilila ari, “Noola umuundu yeesi bulesa bumulya, ni etse isi ise ndi anywe.

³⁸Nga bibyaronebwa bikhosefu ni biloma biri, ‘Buli muundu ufukiilila mus'iise, tsintsitsi tsye kameetsi tsilirurukukha khukhwaama mu mwoyo kweewe.’ ”

³⁹Shino Yesu ashiloma nga amanyisa Umwoyo uyo, esi abo babamufukiilisamo baaba batsya khufuna, khulwekhuuba Yesu aba ashiili khwisibwamo shiriifwa ta.

⁴⁰Batweela khu baandu be mwituuli ni bawulila bilomo bino, baloma bari, “Ilala umusaani yuno ali umuŋoosi.”

⁴¹Babaandi baloma bari, “Uyuno Kristo,” ne babaandi bari, “Kristo anyala aryeena khukhwaama mu Galilaaya?

⁴²Bibyaronebwa bikhosefu sibiloma biri, Kristo alyaama munda iya Dawudi, mu Beselehemu, shiriimba mweesi Dawudi amenyatsaka?”

⁴³Baryo babaandu bawukhanamo khulwa Yesu.

⁴⁴Babaandi khu nibo bakana bamuwaambe, ne alekha khubawo uwakhakakho khumuwaamba ta.

⁴⁵Lwanyuma basilikhale be Lisaayilo belayo isi basaayi bakhulu, ni Bafarisaayo babaabarumana. Basaayi bakhulu ni Bafarisaayo bareeba basilikhale bari, “Khulwashiina mukhamureerire ano?”

⁴⁶Basilikhale babeelamo bari, “Mbaawo umuundu na mutweela uwakanikhatsakakho nga umusaani uyu n'akanikha ta!”

⁴⁷Bafarisaayo bareeba basilikhale bari, “Ni nanywe umusaani uyu wababorosile?

⁴⁸Mwabonakho na mutweela khu baraangilisi, namwe khu Bafarisaayo umufukiilila?

⁴⁹Ne khu lituuli lino, abo babaakhamanya kamakaambila ka Musa ta, bali ni shitsubo khukhwaama isi Wele.”

⁵⁰Ne mutweela uwe mu lituuli lyaabwe, ulaangibwa Nikodemusi, uwaba abe waatsyakho khaale isi Yesu, wareeba ari,

⁵¹“Kamakaambila keefwe kafukiilisa khukhalila umuundu kumusaango, nga ashiili khunyoowa khukhwiwotsakho, ni khuumanya shiina sheesi akholile ta?”

⁵²Baamukobolamo bari, “Ni nawe waama i Galilaaya? N'usome mu byaronebwa bikhosefu, uwentselese, kane ubone nga mbaawo umuŋoosi uwaama i Galilaaya ta.”

⁵³Baryo buli muundu welayo ingo weewe.