Read lumasaaba Yokana 8 Bible Online

Yokana 8 - lumasaaba bible

Yokana 8

¹Nga buli mutweela welileyo ingo weewe, Yesu waatsya khu lukiingi lululaangibwa Zeyituni.

²Khu shifukhu shisheelakho nga antsye ashiili mamilimili, Yesu welayo mu Lisaayilo Likhulu. Babaandu boosi beetsa is'ali, naye wekhala aasi warakikha khu baleekela.

³Baaroni be Kamakaambila ka Musa atweela ni Bafarisaayo beetsa nga bareera umukhasi, isi bawaamba nga akhola bye buyeyani. Baamwiimisa akari mu baandu,

⁴kila bareeba Yesu bari, “Umuleekeli, umukhasi yuno bamuwaambiile khu bweene nga alikho akhola bye buyeyani.

⁵Khuulondekhana ni kamakaambila keefwe, Musa akhulakila ari bakhasi nga bano bari khwakha khubakhupa kamabaale baafwa. Ne iwe shino ushilomakho uri shiina?”

⁶Baaloma shino nga bakhakilisa Yesu busa, bari nio baamisilekho ilomo iye khuumuwabila isi baawuli. Ne Yesu wenama aasi waarona ni lulwaala lweewe.

⁷Ne ni beloosela khuumutsuntsumilisa, waakangamukha waabaloma ari, “Khayo uyo yeesi khus'inywe ukhaakholatsakakho shishonako ta, abe niye umukiboole khumukhupa libaale.”

⁸Yesu wenama luundi, waarona khwiloba ni lulwaala lweewe.

⁹Babaandu ni bawulila shino, barakikha khumolokha busa mbola sha mutweela tweela, khurakikha ni babafuura bukhulu. Khukhwoolisa Yesu n'aarama yenyene n'umukhasi nga ashimikha ibweeni weewe.

¹⁰Kila Yesu akaangamukha, waareeba umukhasi ari, “Batsana bali eena? Mbaawo ukhukhaliile kumusaango ta?”

¹¹Umukhasi welamo ari, “Umukasya, imbaawo ta.” Yesu waamuloma ari, “Ni nase s'ikhukhalila kumusaango ta. N'utsye, ne ukheelakho wonaka luundi ta.”

¹²Lwanyuma Yesu waalomela babaandu ari, “Ise niye buwaanga bwe shiibala. Umuundu yeesi uwunondelela ise, aliba ni buwaanga bubureera buulamu, naluundi s'alikyendela mu shiilima ta.”

¹³Bafarisaayo bamulomela bari, “Ari ulikho wiruuya wamweene khu bwoowo. Byeesi uloma si bili bya ŋali ta.”

¹⁴Yesu waabeelamo ari, “Abe nakhaba nga nikanikha khu samweene, byeesi inoma bili bya ŋali. Khulwekhuuba samweene namanya esi naama, naluundi esi indikho ntsya. Ne inywe simwamanya esi naama namwe esi indikho intsya taawe.

¹⁵Inywe mukhala kumusaango khulondekhana ni intsibirisa iye babaandu. Ne ise s'ikhalila umuundu yeesi kumusaango ta.

¹⁶Ne akhaba nga nakhalile kumusaango, khukhalawo khwase khuba khwa ŋali, khulwekhuuba ise s'ikhalawo senyene ta, imba ndi ni Paapa uwandumana ise.

¹⁷Ni mu makaambila keenywe sharonebwa shiri nga bujulisi bwe babaandu babili bwawaambakaane, shokesana shiri byeesi bakanikha bili bya ŋali.

¹⁸Ise samweene nikanikhakho, ni Paapa uyo uwanduma naye akanikha bibimaambakho.”

¹⁹Kila bamureeba bari, “Paapa woowo ali waheena?” Yesu wabeelamo ari, “Inywe simwayiimanya ise ta. Ni Paapa wase naye simwamumanya ta. Muba nga mumwamanya ise, khali ni Paapa naye mwamumanya.”

²⁰Bilomo bino Yesu abilomela ambi n'isanduukhu iye libikhilo lye Lisaayilo Likhulu, nga alikho aleekela babaandu. Ne s'abawo na mutweela uwakana khumuwaamba ari bamubowe ta, khulwekhuuba abe isaawa yeewe ishiili khukhwoola ta.

²¹Lwanyuma Yesu waabaloma luundi ari, “Ise ikhaatsye. Mulimeentsa ne simulinyoola taawe. Mukhaafiile mu byoonako byeenywe. Isi ise ndi khuutsya, inywe simunyala mweetsayo ta.”

²²Kila Bayudaaya bereeba bari, “Shiina kila aloma ari, ‘Isi ise ndi khuutsya, inywe simunyala mwetsayo ta?’ Ali khuutsya khukhwiyira namwe, amanyisa shiina?”

²³Wabeelamo ari, “Inywe muli khu shiibala aasi, ne ise naama mu ngaaki. Inywe muli be mu shiibala muno, ne ise s'indi uwe mu shiibala muno ta.

²⁴Shino shishikilile nabalomela ndi mulifwiila mu byoonako byeenywe. Muŋali mulifwiila mu byoonako byeenywe, akhali nga mwafukiiliile muri, ‘Ise niye uli nga n'indi.’ ”

²⁵Baamureeba bari, “Ne iwe naanu?” Naye Yesu waabeelamo ari, “Ise ndi nga ni mbalomeele khukhwaama makiboole.

²⁶Ise ndi ni bibiindu bikali bye khubakanikhakho, naluundi ndi ni bikali bibikila nabakhalila kumusaango. Ne shonyene ndi uwandumana ise, umweene ali uwe bwa ŋali. Ni nase imboolela babaandu be mu shiibala ibyo byeesi nawulila khukhwaama khu niye.”

²⁷Ne babaandu sibaamanya bari Yesu aba alikho akanikha khu bya Paapa weewe ta.

²⁸Yesu waababoolela ari, “Ni mulimala khusuunga Umwaana w'Omuundu, abweene awo mulimanya muri ise niye umweene uyo. Naluundi mulishimanya muri imbaawo sheesi ikhola mu bunyala bwase ta. Ne akhali inoma ibyo byeesi Paapa andekeela khuloma.

²⁹Uyo uwandumana ise ali ni nase. Shiwayindekha senyene ta, khulwekhuuba buli busheele ise ikhola bibimwikhoyesa niye.”

³⁰Babaandu bakali babawulila Yesu nga aloma bibiindu bino, bamufukiililamo.

³¹Abweene awo Yesu waalomela Bayudaaya babamufukiililamo ari, “Singa mulondelela khuleekela khwase, ilala kane mube baleekelwa baase,

³²ni nanywe mulimanya bwa ŋali. Ni bwa ŋali ubwo bulibakangulula inywe mube bakangulule.”

³³Bamukobolamo bari, “Ifwe khuli babetsukhulu ba Iburayimu. Sikhwabatsakakho bakulwa b'omuundu yeesi ta. Ari ukhulomela uryeena uri khuliba baakangulule khukhwaama mu bubowe?”

³⁴Yesu wabeelamo ari, “Ilala, imbaboolela muŋali ndi, buli muundu yeesi ukhola shishonako, aba umukulwa uwe shishonako.

³⁵Umukulwa s'amenya muungo biilo ni biilo ta. Ne umwaana uwe mu ntsu amenya muungo biilo ni biilo.

³⁶Ne nashiryo, noola umwaana abakangulula inywe khuuba balekhuule, mulibeela ilala bakangulule.

³⁷Namanyile nga muli babetsukhulu ba Iburayimu, ne muweentsa khukhuntsira ise, khulwekhuuba simufukiilisa byeesi ise indeekela ta.

³⁸Ise inganikha khu byeesi Paapa wase amala khukhuntsokesanisa. Ne inywe mukhola byeesi paapa wenywe amala khubaboolela.”

³⁹Bamukobolamo bari, “Iburayimu niye paapa weefwe.” Yesu naye wabeelamo ari, “Muba mumuuli babaana ba Iburayimu, khali mukhola buraambi nibwo butweela nga bweesi Iburayimu akhola.

⁴⁰Ne nga ni shibonekha, muweentsa khukhuntsira ise, ate ise ndi umuundu ubaboolela bya ŋali byeesi nawulila khukhwaama isi Wele. Iburayimu s'akholakho shishiindu nga inywe sheesi mukhola shino ta.

⁴¹Inywe mulikho mukhola sheesi paapa wenywe amala khukhola.” Balomela Yesu bari, “Ifwe sikhwasaalikha khukhwaama mu buyeyani ta. Wele umweene niye Paapa weefwe.”

⁴²Yesu wabakobolamo ari, “Iba nga Wele niye Paapa wenywe umweene, khali mungana ise. Khulwekhuuba ise naama isi Wele, bona ari indi ano. Ise shineetsa khulwe bunyala bubwase samweene ta, ne khurusakho ndi Wele andumana.

⁴³Khulwa shiina kila mukharekeeresa mwamanya byeesi ise inoma? Shishireera shino shiri ndi simunyala mwekhalilikha mwarekeeresa buurume bwase ta.

⁴⁴Inywe muli babaana ba Sitaani! Uyo niye paapa wenywe, naluundi mukana khuumenya khulondekhana ni sheesi paapa wenywe akana. Khukhwaama makiboole, paapa wenywe ali umwiiri, naluundi s'akana bwa ŋali ta. Khulwekhuuba paapa wenywe s'alimo bwa ŋali ta. N'aloma bye bubeeyi aba wakholile shishiindu shishiili shiisaalikhana isi niye. Khulwekhuuba niye ali umubeeyi, naluundi ali paapawe uwe bubeeyi.

⁴⁵Shishikila mwalekha khukhufukiilila ise, bari khulwekhuuba ise inganikha bya ŋali.

⁴⁶Naanu khus'inywe unyala wantsuntsumilisa ise ari indi ni shishonako? Ne noola inoma bya ŋali, khulwashiina mukhabifukiilila?

⁴⁷Umuundu uwama isi Wele arekeeresa bilomo bya Wele. Ne ilomo ikila inywe mwalekha khurekeeresa ta, ili ndi simuli ba Wele ta.”

⁴⁸Bayudaaya baloma bari, “Ifwe sikhubeele batuufu khuloma khuri uli Umusamariya, naluundi ulikho shisaambwa?”

⁴⁹Yesu wabeelamo ari, “Ise s'indikho shisaambwa ta. Ise niisamo Paapa wase shiriifwa. Ne inywe muumbirisamo ise tsimoni.

⁵⁰Ise s'imeentsa shiriifwa shishase ta. Ne iliwo ushiweentsa, naluundi niye ukhala kimisaango.

⁵¹Ilala, ilala imbaboolela ndi, umuundu yeesi uwaamba shilomo shase, s'alifwa ta.”

⁵²Kila Bayudaaya baloma bari, “Ari khwashihandalasile nga ulikho shisaambwa! Iburayimu wafwa, ni baŋoosi nabo baafwa, ne iwe ari uloma uri umuundu yeesi uwaamba shilomo shoowo s'alifwa ta?

⁵³Kuuka weefwe Iburayimu wafwa. Wambaasa uri iwe umufuura niye? Ni baŋoosi nabo baafwa. Iwe wilaanga khuuba naanu?”

⁵⁴Yesu waaloma ari, “Iba nga bari nifumisa samweene, khukhwifumisa khwase khali khwandibeele khwa busa; ne Paapa wase niye uwufumisa ise. Niye mutweela isi inywe muloma muri ali Wele weenywe.

⁵⁵Inywe simwamumanya ta, ne ise namumanya. Imba nga ulomile ndi sinamumanya ta, khali nase imbeele umubeeyi, nga inywe ni muli babeeyi. Ne ise namumanya naluundi intsiililila khu byeesi aloma.

⁵⁶Kuuka wenywe Iburayimu ekhoya khubona ari abona bifukhu bye khukhwiitsa khwase. Ilala abibona, naluundi wekhoya.”

⁵⁷Bayudaaya bamuloma bari, “Iwe ushiili khwoolesa ni kimiiko kye bukhulu kamakhumi karaano ta, unyala uryeena waloma uri waabona khu Iburayimu?”

⁵⁸Yesu wiloosela ari, “Ilala, ilala imbaboolela ndi, Iburayimu nga ashiili khusaalikha ta, ise nga indiwo.”

⁵⁹Ni abweene awo babukula kamabaale bari bamukhupe, ne Yesu webisa, waarura mu Lisaayilo Likhulu, waatsya.