Read lumasaaba Yokana 9 Bible Online

Yokana 9 - lumasaaba bible

Yokana 9

¹Yesu n'aba nga akyeenda, waabona umusaani uwasaalikha nga ali umubofu.

²Baleekelwa beewe baamureeba bari, “Umuleekeli, naanu niye uwoonaka kila umusaani uyu asaalikha nga ali umubofu? Niye umweene namwe basaali beewe?”

³Yesu welamo ari, “Sishili bari khulwe bibyoonako byeewe, namwe khulwe bye basaali beewe, kila umuundu uyu asaalikha nga umubofu ta. Ne khurusakho ndi ali umubofu nio akile bikholwa bya Wele biboneshele mu niye.

⁴Nga antsye ashiili kumuusi, shaakhila khukhole kimilimo kyooyo uwanduma ise. Mbaawo unyala waraamba kumulimo nga antsye bwelabuule ta.

⁵Nga ishiili mu shiibala, ise mba niye buwaanga bwe shiibala.”

⁶Yesu n'amala khuloma aryo, wafuutsa kamare aasi, waroka lifukhuulu mu mare, walihakha khu moni tsy'omusaani umubofu.

⁷Waloma umubofu ari, “N'utsye wisiinge mwitibo liliili i Siloamu” (Siloamu shimanyisa khuurumiwa). Nashiryo waatsya, wesiinga, waakobola nga tsimoni tsibona.

⁸Ne bahesanwa b'omusaani uyo, ni babaandu babaandi abe babamubonakho khaale nga wekhaale asabilisa, baloma bari, “Umusaani uyu s'ali niye uwekhalatsaka awo nga asabilisa?”

⁹Batweelakho baloma bari, “E e, niye.” Ne babaandi bakhaabisa nga baloma bari, “Taawe, s'ali niye ta. Uyuno amufwaanana busa.” Kila umusaani umweene aloma ari, “Niye ise.”

¹⁰Bamureeba bari, “Ne tsimoni tsoowo tsibimbushile tsiryeena?”

¹¹Umusaani uyo welamo ari, “Umuundu isi balaanga bari Yesu, arokile lifukhuulu, waambakha khu moni tsase, wanoma ari intsye mu Siloamu nisiinge. Nase natsya, nga ninisingile, tsimoni tsabimbukha.”

¹²Bamureeba bari, “Umusaani mweene uyo ali waheena?” Wabeelamo ari, “Ise simanya ta.”

¹³Bayila umusaani uwaba umubofu isi Bafarisaayo.

¹⁴Ne yaba khu shifukhu sheesi Yesu arokelamo lifukhuulu wabimbula tsimoni tsy'omusaani uyo, shaba sha Sabato.

¹⁵Bafarisaayo nabo luundi baareebelesa umusaani uyo, isaambo isi abimbukhamo tsimoni. Wabaloma ari “Ambakha liiloba khu moni tsase, natsya nasiinga mu moni mwase, narakikha khubona.”

¹⁶Batweela khu Bafarisaayo baaloma bari, “Seshinyalikha khuuba nga umuundu ukholile shino ama isi Wele ta, khulwekhuuba s'alondelela kamakaambila ke shifukhu sha Sabato ta.” Ne babaandi baloma bari, “Ne abe umuundu aba umwonaki khali anyalile aryeena khukhola bye kamakaanga nga bino?” Lwanyuma abawo khukhwawukhana akari abwe.

¹⁷Bafarisaayo luundi bareeba umusaani uwabakho umubofu bari, “Umusaani uyu iwe umulomakho uryeena, khukhwaama nga n'uloma uri akhubimbuule tsimoni?” Welamo ari, “Umusaani uyo ali umuŋoosi.”

¹⁸Ne Bayudaaya balekha khufukiilila bari umusaani uyo asaalikha nga ali umubofu, ne nga ari abona ta, khukhwoolisa ni balaanga basaali beewe.

¹⁹Bareeba basaala beewe bari, “Uyuno ali umwaana wenywe, isi muloma muri asaalikha nga ali umubofu? Shiitsa shiryeena waba nga aluno ari abona?”

²⁰Basaali beewe belamo bari, “Ifwe khwaamanyile khuri uyuno ali umwaana weefwe, naluundi khwaamanyile khuri asaalikha nga ali umubofu.

²¹Ne ifwe sikhumanya nga n'abimbukhile tsimoni ta, namwe sikhumanya naanu umubimbuule tsimoni ta. Khukhwaama n'ali umuundu umukhulu, ni mumureebe umweene; lekha umweene ekanikhekho.”

²²Basaali beewe baaloma baryo khulwe khuurya baraangilisi be Bayudaaya, abe babaamalile khuukhalawo bari umuundu yeesi ukane alome ari Yesu niye Kristo, kane bamwikalewo khuutsya mu ntsu iye khukhwisaayilamo.

²³Shino nisho shishakila basaali beewe baaloma bari, “Ali umusaani umukhulu, ni mumureebe umweene.”

²⁴Lwanyuma balaanga umusaani abe uwaba umubofu kumuluundi kukukhola khabili, bamuloma bari, “Iwe n'uruuye Wele! Ifwe khwaamanyile nga umuundu uyu n'ali umwonaki.”

²⁵Umusaani wabeelamo ari, “Ise s'imanya oba ali umwonaki namwe ta. Ne ise shishiindu shitweela sheesi imanya shili ndi, naba umubofu, ne ari imbona.”

²⁶Bamureeba bari, “Ne akhukholile aryeena? Akhubimbuule aryeena tsimoni?”

²⁷Welamo ari, “Ise namalile khaale khubaboolela, ne simuwulila ta. Khulwashiina kila mukana niilemo luundi? Namwe nanywe muli khukana khukhwikyela baleekelwa beewe?”

²⁸Bamukhoma. Baloma bari, “Iwe niye uli umuleekelwa w'omusaani uyo. Ne ifwe khuli baleekelwa ba Musa.

²⁹Ifwe khwaamanya khuri Wele akanikha ni Musa, ne bibiwaambakana n'umusaani uyu, ifwe sikhumanya isi ama ta.”

³⁰Umusaani uyo wabeelamo ari, “Shino she khukhwiyaangisa! Khulwekhuuba muloma muri simumanya isi ama ta, ne bona ise wamimbuule tsimoni tsase.

³¹Feesi khwaamanya khuri Wele s'arekeeresa babonaki ta, akhali arekeeresa abo babamurya naluundi babaakhola sheesi akana.

³²Ne khukhwaama khukhubuumbibwa khwe shiibala khaale ni khaale, sishawulilikhanakho nga abawo umuundu yeesi uwabimbula tsimoni tsy'omuundu uwasaalikha nga ali umubofu ta.

³³Ne umuundu yuno nga khurusakho ama isi Wele, busa khali s'anyalile khukhola shishiindu shoositsana ta.”

³⁴Bamuloma bari, “Ne iwe nawe uwasaalikha nga uli umwonaki, iwe nawe unyala uryeena khukhuleekela ifwe?” Bamuwoona khukhwaama mu ntsu ye khukhwisaayilamo.

³⁵Yesu n'awulila bari bamuwoonile khukhwaama mu ntsu ye khukhwisaayilamo, ne n'akaanana umusaani uwatsana, waamureeba ari, “Ufukiilila mu Mwaana w'Omuundu?”

³⁶Umusaani welamo Yesu ari, “Musakhulu, n'umboolele niye naanu, ni nase kane imufukiililemo.”

³⁷Yesu wamuloma ari, “Wamuboone khaale, naluundi niye umweene yuno niye yeesi ulikho ukanikha ni naye.”

³⁸Waloma Yesu ari, “Umukasya, naafukiilile.” Aryo wafukhama aasi wesaaya Yesu.

³⁹Yesu waaloma ari, “Ise neetsa mu shiibala khulwe khukhala kumusaango. Nio akile baabofu babimbukhe tsimoni; ni naabo babaabona bekyele baabofu.”

⁴⁰Bafarisaayo babaaba ni Yesu ni baawulila bino kila baloma bari, “Ari kila uloma uri ifwe nafwe khuli baabofu?”

⁴¹Yesu wabeelamo ari, “Muba nga mumuuli baabofu, khali simuli ni kumusaango kwe bubwoonaki ta; ne ari ni muloma muri munyala khubona, shimanyisa shiri muli ni kumusaango kwe bubwoonaki.”