Read lumasaaba Buraambi 1 Bible Online

Buraambi 1 - lumasaaba bible

Buraambi 1

¹Uwe Lukoosi Tefilo, ise naamala khaale khuukhuronela mu bwitsufu bibiindu bibiwaamba khwiibyo byoosi byeesi Yesu aakhola luundi waaleekela,

²khukhwoolesa khu shifukhu khweesi aaniinisibwilakho mwikulu. Ne nga ashiili khuniinisibwa ta, aawa biilakilo byeewe isi baarume abe beesi aamala khuurobola, khuubirira mu Mwoyo Umukhosefu.

³Lwanyuma lwe khuufwa khweewe, eyokesana isi Baarume beewe, nga abawa bubonelo bukali bubwokesanisila ilala buri niye ali umulamu. Aababonekhela mu bifukhu kamakhumi kane, nga ababoolela kamakhuuwa kamalayi ke Buyiinga bwa Wele.

⁴Aryo shifukhu shitweela nga ashiili ni nabo, waabalakila ari, “Mukharura mu Yerusalemu ta, ne ni muliindilile shiwaanwa sheesi Paapa aabalomela, sheesi mubeele mumbulila ise nga inganikhakho.

⁵Lwekhuuba Yokana aabatisa ni kameetsi, ne nanywe mu bifukhu bikyeekhe bibiitsa, mulibatisibwa n'Umwoyo Umukhosefu.”

⁶Baryo baarume ni baabuusana atweela ni Yesu, bamureeba bari, “Umukasya, mu bifukhu bino ari wutsya khukobosela ba Isiraeli Buyiinga?”

⁷Yesu wabeelamo ari, “Sishili isi inywe khumanya bifukhu, namwe inyaanga isi Paapa ara mu bunyala bweewe ta.

⁸Ne mulifuna kamaani, Umwoyo Umukhosefu n'alimala khukhwiikha khwiinywe, ni nanywe muliiba bajulisi baase mu Yerusalemu, ni mu Yuda mwoosi, ni mu Samariya, ni khukhwoolesa isi shiibala shakama.”

⁹Aryo Yesu n'amala khuukanikha bino, waayilibwa mu ngaaki nga boosi babona, ni lifuumbi lyaamubisa, baalekha khumubona luundi ta.

¹⁰Ne ni baaba nga bashofwaasa mwikulu nga Yesu atsya, bona abonekhawo khaangu akho basaani babili, nga bakwaarire tsingubo tsiwaanga, beetsa beema aambi ni nabo. Baryo basaani bano baaloma baleekelwa bari:

¹¹“Basaani be Galilaaya, shiina shibeemisile ano nga mulolele mu ngaaki? Yesu mweene uyu ubarusiwilekho waayilibwa mwikulu, alikobola aryo musaambo nyeneyo, nga ni mumuboone nga atsya mwikulu.”

¹²Lwanyuma baarume baakobolayo i Yerusalemu, nga baama khu lukiingi lulaangiwa lwe kimisaala Kimizeyituni, luluuli aambi ni Yerusalemu, nga lukyeendo aambi luli i kilomita nga ndweela.

¹³Ne ni benjila mu Yerusalemu, baniina mu shiseenge she khu ngaaki abe mweesi bamenya. Mu baarume babaabawo mwabamo; Petero, Yokana, Yakobo, ni Andereya, Filipo ni Tomasi, Batolomayo ni Matayo, Yakobo umwaana wa Alufayo ni Simoni uwaba Zelote, ni Yuda umwaana wa Yakobo.

¹⁴Bano boosi betubaasila atweela mu khuloomba akhali khukoosa ta, atweela ni bakhasi babaandi, ni Malyamu maayi wa Yesu, ni babandaaye ba Yesu.

¹⁵Mu bifukhu ibyo, Petero wiima akari mu be buulebe, mu lituuli lilyaba lyoola babaandu shitoondo shitweela ni kamakhumi kabili (120), waaloma ari:

¹⁶“Bebuulebe, bafukiilisi bashaase, bibyaronebwa bikhosefu byaakhila byoolelesebwa, byeesi Umwoyo Umukhosefu aalomela khaale khuubirira mu Dawudi, nga arumbula ibyo bibiwaamba khu Yuda, uwaranjilila babaandu babaawaamba Yesu.

¹⁷Yuda mweeneyo aabalibwila atweela ni nafwe, luundi waakabananila atweela ni nafwe mu mulimo kuno.

¹⁸Yuda yuno aakula kumukuunda ni tsinusu tse bubwoonaki bweewe, mu bweenemwo mweesi aakwa mafumala, waarundukha ni kamala keewe koosi kaaweela ibulafu.

¹⁹Babaandu boosi be mu Yerusalemu baawulila shilomo shino, baryo kila balaanga kumukuunda ukwo mu lulimi lwe waabwe bari, ‘Akeludama,’ kamakhulu kaasho ndi, ‘Kumukuunda kweesi kamafuki kaatsutsukhamo.’

²⁰“Lwekhuuba mu burone bwe Zabuli sharonebwa shiri, ‘Khayo intsu yeewe ilekhebwe busa, ilekhe khubawo umuundu ukibamo ta.’ Luundi sharonebwa shiri, ‘Khayo ibewo umuundu ukuundi uyila bukhulu bweewe.’

²¹“Nashiryo shikhwakhila ifwe khurobolayo umuundu ubeelatsakile ni nafwe mu bifukhu byoosi khukhwaama nga Umukasya Yesu n'akyendaatsaka ni nafwe,

²²khukhwamila ilala khu bifukhu byeesi Yokana abatisatsakila, khukhwoolesa khu shifukhu khweesi Yesu akhurusibwakho waniinisibwa mu ngaaki. Umuundu uyo aakha waba mutweela khwiifwe nga umujulisi we bye khulamukha khwa Yesu.”

²³Baryo baareera kamasina ke babaandu babili: Yusufu uwalaangiwa Balusaba (luundi uwamanyikhana nga Yusito), ni Matiya.

²⁴Lwanyuma baloomba bari, “Umukasya, iwe waamanya kumwoyo kwa buli mutweela, n'ukhwokese khu babili bano, naanu yeesi uroboole

²⁵khuuyila shiifwo shino she bubwakaanisi bwe buurume bweesi Yuda aalekha, waatsya esi abe akhila khuuba.”

²⁶Baryo baakhupa khaakokha khuukhalawo naanu khu baandu babili uyila shiifwo isho. Khaakokha khaakwa khu Matiya, aryo niye waabaliwila atweela ni baarume liikhumi na mutweela.