Read lumasaaba Buraambi 10 Bible Online

Buraambi 10 - lumasaaba bible

Buraambi 10

¹Aabawo umuundu ulaangiwa Koruneliyo abe umenya i Kayisaliya, uwaba umuraangilisi uwe liye lililaangibwa lye ba Itali.

²Umusaani yuno aaba umuundu umwilama nga niye ni be mu ntsu yeewe boosi baaba besaaya Wele. Aaba nga ayeeta Bayudaaya nga abakabila bibiindu bya busa, naluundi abe abuya nga aloomba Wele.

³Lutweela khu nyaanga nga syeenda tse angoloobe, wabonela ilala bulayi bubweene shifwaani sha malayika wa Wele nga enjila mu ntsu naluundi nga amulaanga lisiina ari, “Koruneliyo.”

⁴Koruneliyo walolelela malayika ni khuurya khukali, kila amureeba ari “Umukasya, shiina?” Malayika naye waamwiilamo ari, “Khuuloomba khwoowo ni buyeeti bwoowo bweesi uwaanayo isi babaandu byaniinile naluundi byafukiilisibwile ni Wele.

⁵Ni aluno ari rumana babaandu batsye i Yopa, batsye balaange Simoni ulaangiwa Petero,

⁶umenya wa Simoni, uwala kamahaafu, intsu yeewe ili aambi ni nyaantsa.”

⁷Ne malayika uwamukanikhayo n'amala khuutsya, Koruneliyo walaanga babili khu baraambi beewe, n'umusilikhale umwiyikinwa uwisaaya Wele uli mutweela yenyene khukhwaama muubo abe babamuraambila.

⁸Aryo waababoolela byoosi bibyaba byabeelewo, waabarumana i Yopa.

⁹Khu shifukhu shisheelakho, ni baaba nga bali khu lukyeendo lwaabwe nga bembiiyisile shiriimba isho, Petero waaniina khu ntsu khu ngaaki khuutsya khuloomba. Tsisaawa tsaba nga tsisesaba tse kumuusi.

¹⁰Nga ali khubweenekhwo intsala yamulya, wewotooma ari khali aliilekho khakhaandu. Ne ni baaba nga bashirengakharengekha she khuulya, wafwaana nga uroora.

¹¹Waabona likulu nga lyaabimbukhile, ni shishiindu shaamamo nga shiikha is'ali nga shifwaana nga isuukha ingali, yaba yikhisibwa khu shiibala nga yawaambibwiile khu mbeka tsoosi tsine.

¹²Mu suukha yino mwabamo bisolo bya buli shikuuka shoosi, ni nebyo bibyalaamila aasi, ni binywiinywi bye mu ngaaki.

¹³Kila awulila likono limuloma liri, “Petero, yinyukha usale, ulye.”

¹⁴Ne Petero waaloma ari, “Umukasya, senyala nashikhola taawe. Lwekhuuba ise ishiili khulyatsakakho shishiindu shoosi she kumusilo namwe shikhali shipyeluuse ta.”

¹⁵Petero wawulila likono ifuunda ye khabili nga limuloma liri, “Byeesi Wele amala khuŋoonaŋoona, iwe ukhabilaanga khuuba bye kumusilo ta.”

¹⁶Shishiindu she suukha shino sheyokyesanisa kimiluundi nga kitaru, lwanyuma shenyusibwa khaangu shelayo mwikulu.

¹⁷Aryo Petero n'aba nga ashikanakana mu mwoyo kweewe khulwe shifwaani ari manya makhulu shiina kakashiilimo, khaangukho babaandu beesi Koruneliyo arumana boola, beema khu mulyaango. Abe bamalile khaale khureebelesa babokesele intsu ya Simoni.

¹⁸Balaanga babaaliyo nga bakana bamanye oba nga Simoni Petero abe amenya abweene awo.

¹⁹Ne Petero aaba nga ashambaasa khu biindu bibibonekhele, Umwoyo waamuloma ari, “Bona iliwo babaandu bataru babaali khukhuweentsa.

²⁰Yinyukha wiikhe aasi, naluundi utsye ni nabo, akhali khumala imbuka ta, lwekhuuba ise niye ubarumanile.”

²¹Petero weekha aasi isi babaandu bano babaama isi Koruneliyo waabaloma ari, “Iseese niyooyu isi mulikho mukana. Lomo shiina ibareerire?”

²²Nabo baaloma bari, “Koruneliyo umuraangilisi we basilikhale, niye ali umuundu umulayi naluundi ali umuundu urya Wele, isi babaandu be linaambo lye Bayudaaya basiima. Malayika Umukhosefu amuboolele ari akhurumanise iwe utsye mu ntsu yeewe, umuboolele byeesi uli ni nabyo.”

²³Aryo Petero wabakaanila wabenjisa mu ntsu, wabawa bukono antsye bushe nio batsye. Shifukhu shishelakho, Petero wenyukha watsya ni nabo, atweela ni be buulebe babaandi babaama i Yopa nabo batsya ni naye.

²⁴Ni khu shifukhu shisheelakho, boola mu shiriimba Kayisaliya. Abe Koruneliyo waabaliindiliile khukhwoola, naluundi aba waabuusanisile baalebe ni basaale beewe atweela.

²⁵Petero n'enjila mu ntsu, Koruneliyo wamwakaanila wakwa aasi mu bikyele byeewe nga amwisaaya.

²⁶Ne Petero wamwinyusa khu ngaaki nga aloma ari, “Yinyukha khu ngaaki, akhaba nase indi umuundu busa nga iwe.”

²⁷Baryo Petero ni Koruneliyo baatsya nga bakanikha, ne ni benjila mu ntsu, banyoola babaandu bakali babusaane.

²⁸Petero waabaloma ari, “Inywe mweesi mwamanyila ilala muri, shifuniaaka likaambila singa Umuyudaaya akholakana namwe wakyeniyila umuundu yeesi uli umunaambo. Ne Wele wantsokesanisile ari, sinandyakhiile khuloma umuundu yeesi ndi ali uwe mbikho namwe umubi ta.

²⁹Nashiryo nga ni munaangile, ise sindobile khukhwiitsa ta. Ari imbareeba ndi shiina shishikilile mwaanaanga?”

³⁰Koruneliyo waaloma ari, “Bifukhu byabirire bine khukhwaama nga bino nibyakholikha: tsaba tsinyaanga nga syeenda tse angoloobe nga ndi mu ntsu yase indi mu khuloomba, khaangukho nabona umuundu nga ali mu bikwaaro bibimelamela nga wantsimile ibweeni.

³¹Wanoma ari, ‘Koruneliyo, Wele wawuliile khuloomba khwoowo ni bubweela bwoowo isi babaandu, lweesho Wele wakhukhebuliile.

³²Nashiryo rumanisa i Yopa, bakhulaangile Simoni ulaangiwa Petero etse. Amenya mu ntsu ya Simoni uli aambi ni nyaantsa, nga ali uwala kamahaafu.’

³³Nase lubaluba nakhurumanisa, ni nawe wakholile bulayi khukhwiitsa. Nashiryo fweesi khuli ano mu moni tsa Wele khurekeerese byoosi byeesi Umukasya akhulakiile iwe khuloma.”

³⁴Petero waarakikha khukanikha nga aloma ari, “Mu ŋali ari ise naboone ndi Wele s'aromboosa mu baandu ta.

³⁵Ne mu buli linaambo lyoosi ibo boosi babamurya naluundi babaakhola bilayi, Wele abafukiilila.

³⁶Wele asiindikha shilomo sheewe isi babaandu ba Isiraeli nga abakaanisa kamakhuuwa kamalayi ke lukoosi khuubirira mu Yesu Kristo uli Umukasya wa boosi.

³⁷Ise sinaakha khubakhebusa bilomo bibyakholikhile mu Yuda mwoosi khurakikhila i Galilaaya, lwanyuma lwe khubatisibwa khweesi Yokana alaangilila ta.

³⁸Mwamanya isaambo yeesi Wele arobolamo Yesu uwe Nazareesi n'Umwoyo Umukhosefu atweela ni kamaani. Isaambo isi akyeenda nga akhola bilayi, naluundi nga awonisa abo boosi abe beesi Sitaani aminilisa, lwekhuuba abe Wele ali ni naye.

³⁹Ifwe khuli bajulisi be bibiindu ibyo byoosi byeesi akhola mu shibala she Bayudaaya ni mu Yerusalemu. Bamwiira nga bamutsaangilila khu musalaba kwe kusaala.

⁴⁰Ne Wele waamulamusa khukhwaama mu bafu khu shifukhu she khataru, naluundi waamwokesanisa mu lubuula.

⁴¹Ne sishaba isi babaandu boosi ta, ne isi ifwe beesi Wele aarobola khaale khuuba bajulisi. Ifwe khwalya naluundi khwanywa ni naye nga waamalile khulamukha khukhwaama mu bafu.

⁴²Niye uwakhulakila ifwe khuutsya khuboole Kamakhuuwa Kamalayi isi babaandu, ni khuwayo bujulisi khuri uyo niye isi Wele arobola khuuba umukayi we balamu ni baafu.

⁴³Uyo niye isi baŋoosi boosi baweelakho bujulisi bari, khuubirira mu lisiina lyeewe, buli mutweela umufukiilila alifuna shishiyakhilo she bibyoonako.”

⁴⁴Aryo Petero n'aba nga ashikanikha, Umwoyo Umukhosefu weekha khu boosi babaaba bamurekeeresa.

⁴⁵Bafukiilisi mu Kristo babaaba Bayudaaya babeetsa ni Petero ni baabona shino beyaanga, khubona bari shiwaanwa sh'Omwoyo Umukhosefu shaweebwile akhaba isi Banaambo nabo.

⁴⁶Lwekhuuba bawulila Banaambo bano nga bakanikha mu nimi tsitsiindi, naluundi nga baruuya shiriifwa sha Wele. Kila Petero abareeba ari,

⁴⁷“Iliyo umuundu yeesi unyala khukhwimana khubatisibwa khwe kameetsi isi babaandu bano babamalile khufuna Umwoyo Umukhosefu nga ifwe ni khwafuna?”

⁴⁸Aryo Petero walakila ari babatisiwe mu lisiina lya Yesu Kristo. Lwanyuma bamuloomba bari amenyekho ni nabo bifukhu bikyeekhe biri.