Read lumasaaba Buraambi 11 Bible Online

Buraambi 11 - lumasaaba bible

Buraambi 11

¹Baarume ni baafukiilisi babaandi babaaba mu Yuda baawulila bari Banaambo nabo baafukiiliile Ilomo ya Wele.

²Ne Petero n'aniina i Yerusalemu, basaani baafukiilisi mu Yesu babenjila imbalu, baamwiŋuluŋuunyila nga baloma bari,

³“Lwashiina iwe watsya muungo mwe babaandu basiinde, waalya ni nabo?”

⁴Petero waasimama khuubaboolela byoosi, shitweelatweela nga eesi byarakikha,

⁵nga aloma ari: “Ise naba mu shiriimba she Yopa nga indi mu khuloomba, nafuna khuubonekhelwa. Mu nikhwo nabona shishiindu shiikha khukhwaama mwikulu, nga shifwaana nga isuukha ingali, nga yawaambibwile khu tsisoonda tsine, sheetsa isiindi.

⁶Ne ni nashofwasa nabonamo tsisolo tse bikyele bine tse khu shiibala, ni tsisolo tse mwirome, ni bibyalaama aasi, ni binywiinywi bye mu ngaaki.

⁷Lwanyuma nawulila likono linoma liri, ‘Petero yinyukha usale, ulye.’

⁸Ne nase naloma ndi, ‘Taawe Umukasya, lwekhuuba imbaawo shishiindu shoosi she mbikho namwe shiibi shishenjilatsakakho mu khanwa mwase ta.’

⁹Ne likono lyelamo ifuunda ye khabili khukhwaama mwikulu lyaloma liri, ‘Ukhalaangatsaka byeesi Wele amala khumiliisa uri bye mbikho ta.’

¹⁰Shino shakholebwa tsifuunda tsitaru, lwanyuma byoosi byaniinisibwa mwikulu.

¹¹Ni mu mbuka nyeneyo, basaani bataru babarumanibwa isiindi khukhwaama i Kayisaliya boolela khu ntsu isi nabamo.

¹²Umwoyo wanoma khuutsya ni nabo akhali khukhwikanakana ta. Ni bafukiilisi basesaba beesi naba nabo, baatsya ni nase, khwenjila mu ntsu y'omusaani uyo.

¹³Naye wakhuboolela nga n'abona malayika nga wemikhile mu ntsu yeewe, amulomela ari, ‘Rumanisa i Yopa, bakhulaangile Simoni ulaangibwa Petero.

¹⁴Naye alikhureerera bubakha bubuuli khuwonesa iwe ni be mu ntsu yoowo boosi.’

¹⁵Nase ni naba nga indakikha khukanikha, Umwoyo Umukhosefu wabeekhakho nga n'akhwiikha khusiifwe makiboole.

¹⁶Abweenewo nashebulila Ilomo y'Omukasya isi aaloma ari, ‘Yokana abatisa ni kameetsi, ne inywe mulibatisibwa n'Umwoyo Umukhosefu.’

¹⁷Aso, Wele noola abawa nibo shiwaanwa nga sheesi akhuwa ifwe ni khwafukiilila Umukasya Yesu Kristo, abe ise niye naanu uwandyakhiile khukhabisanisa Wele?”

¹⁸Boosi ni bawulila shino, basila busa balekha khukhwiŋuluŋuunya luundi ta, ne baruuya Wele nga baloma bari, “Aso, n'isi Banaambo, Wele wabaweele khukhwibiiyisa bibyoonako nio banyoole buulamu.”

¹⁹Ulwo abo boosi khu lwe khukubyeengebwa khukhwabawo khu lwa Sitefano nga n'amala khukhwiribwa, baarume bakyeenda boola i Foyinisiya, Kupuro ni Antiyoki, nga baboolela shilomo isi Bayudaaya bonyene, ne nga sibaboola isi babaandi ta.

²⁰Ne aabawo babaandi khu nibo bafukiilisi khukhwaama i Kupuro, ni Kurene, ni beetsa i Antiyoki, bakanikha isi be Kamanaambo kakaandi nabo, nga bababoolela kamakhuuwa kamalayi kakawaamba khu Mukasya Yesu.

²¹Kamaani k'Omukasya kaaba khu nibo, ni lituuli lye babaandu bakali bashuukha bekyela bafukiilisi mu Mukasya.

²²Kamakhuuwa kakawaamba khu bino ni kawulilikha isi bafukiilisi be mu Yerusalemu, baryo barumana Balunaba i Antiyoki.

²³Naye nga woleleyo, waabona bye bubweela bwa Wele, wekhoya, waabakhupilisa ari bawandalalile ilala mu mwoyo, behaambile ilala khu Mukasya.

²⁴Balunaba aba umusaani umulayi, uwetsula Umwoyo Umukhosefu ni khufukiilila. Baryo babaandu bakali bareerewa isi Umukasya.

²⁵Lwanyuma Balunaba waarurayo, watsya i Taruso khuweentsa Saulo.

²⁶Ne n'amunyoola, wamureera i Antiyoki. Baryo khumala kumwiiko kumubuufu, Balunaba ni Saulo babuusanatsaka ni bafukiilisi, baleekelatsaka babaandu bakali. Ne i Antiyoki iyo niyo isi baleekelwa banyoowa khulaangiwa bari Bakristo.

²⁷Awo mu bifukhu ibyo, baŋoosi beetsa i Antiyoki, nga baama i Yerusalemu.

²⁸Ne mutweela khu nibo uwaba alaangiwa Agabo, wimikha angaaki mu maani k'Omwoyo Umukhosefu, waboola nga intsala ingali n'itsya khubawo mu shiibala shoosi, (intsala iyi yakwawo mu bifukhu bya Kilawudiyo, nga niye Kayisaali).

²⁹Baryo baleekelwa bakhalawo nga buli mutweela n'anyala, khukhwakaanisa buyeeti isi bafukiilisi babamenya mu Yuda.

³⁰Shino baashikhola, baakaanisa biwaanwa byaabwe isi basakhulu nga babirira mu Balunaba ni Saulo.